Aydın Hüseynov: “Bütün bunlar əhalinin yaşayış səviyyəsinin yaxşılaşmasına öz müsbət təsirini göstərib”
“Mən istəyirəm ki, ölkəmizin hər bir guşəsində insanlar daha da yaxşı yaşasınlar, onların həyat səviyyəsi yüksəlsin”. Bunu İsmayıllı rayonunun Lahıc qəsəbəsinə təbii qazın verilməsi mərasimində iştirak edən Prezident İlham Əliyev yerli sakinlərlə görüşündə deyib.
Dövlət başçısı qeyd edib ki, turizm Azərbaycanda prioritet istiqamətlərdən biridir: “Mənə verilən məlumata görə, Lahıcda hotellər tikilir, bir hotel indi məktəbin önündə inşa edilir. Mən bunu da alqışlayıram”.
Ölkə Prezidenti onu da qeyd edib ki, “nə qədər çox turist gəlsə, ölkəmizə o qədər də çox pul gələcək”. O bununla bağlı bir sıra statistik rəqəmləri sadalayıb: “Bax, turistlərin sayı 2016-cı ildə 22 faiz, 2017-ci ildə 20 faiz, bu ilin 7 ayında 9 faiz artıb və bu proses davam edir. Hər gələn turist xidmət sektorunun inkişafına xidmət göstərir. Mən istəyirəm ki, hər bir yerdə, ölkəmizin hər bir guşəsində insanlar daha da yaxşı yaşasınlar, onların həyat səviyyəsi yüksəlsin, dolanışıq yaxşı olsun. Ona görə biz bütün lazımi infrastruktur layihələrini icra edirik ”.
Bütövlükdə, İlham Əliyev 2003-cü ildə prezident seçiləndən sonra insanların yaşayış səviyyəsinin yaxşılaşdırılması üçün bir çox işlər görülüb. Neft gəlirləri səmərəli şəkildə istifadə edilərək bir sıra böyük sosial-iqtisadi layihələr həyata keçirilib. Regionların inkişafına dair proqramlar qəbul olunub. Nəticədə bütün bölgələrdə yeni iş yerləri açılıb və s.
Bütün bu deyilənlərin fonunda, bəs ekspertlər ölkədəki inkişafı necə dəyərləndirirlər? Yəni ötən illər ərzində ölkənin hər yerində insanların daha yaxşı yaşamasına, onların həyat səviyyəsinin yüksəlməsinə nə dərəcədə nail olunub?
Məsələyə münasibət bildirən millət vəkili Aydın Hüseynovun sözlərinə görə, aparılan məqsədyönlü siyasət sayəsində buna əsaslı şəkildə nail olmaq mümkün olub: “Prezident İlham Əliyevin həyata keçirdiyi siyasətin ən başlıca məqsədi Azərbaycan vətəndaşlarının yaşayış səviyyəsini yüksəltməkdir. Onların sosial rifah halının yaxşılaşdırılmasıdır. Ona görə də təkcə Bakıda və böyük şəhərlərdə yox, ölkənin bütün regionlarında, hətta ən ucqar dağ kəndlərində belə, insanların həyat səviyyəsinin yaxşılaşdırılması ilə bağlı böyük işlər görülüb. Təsadüfi deyil ki, İlham Əliyev 2003-cü ildə Prezident seçiləndən sonra, 2004-cü ildə “Regionların sosial-iqtisadi inkişafına dair Dövlət Proqramı”nı qəbul etdi. Ümumən, indiyə qədər 3 belə proqram qəbul olunub və regionların inkişafı ilə bağlı sistemli, kompleks işlər görülüb. Bütün regionlarda öncə sosial infrastruktur yenidən quruldu. Daha sonra bölgələrdə sənaye infrastrukturu quruldu. Yeni emal müəssisələri və digər obyektlər tikildi. Nəticədə çoxsaylı yeni iş yeri açıldı. Sözügedən proses indi də davam edir. Bu günə qədər 12 min kilometrdən çox yol çəkilib, 3 mindən çox məktəb, 700-dən çox xəstəxana, idman kompleksləri tikilib. Eyni zamanda, bölgələrdə çoxsaylı turizm mərkəzi fəaliyyət göstərir. Yeni-yeni sənaye sahələri, kənd təsərrüfatı ilə bağlı yeni-yeni aqrar komplekslər fəaliyyətə başlayıb. Bütün bunlar, əlbəttə ki, əhalinin yaşayış səviyyəsinin yaxşılaşmasına öz müsbət təsirini göstərib. Eyni zamanda, bu, Prezident İlham Əliyevin həyata keçirdiyi siyasətin bariz nəticəsidir. Bu, əhalinin ölkənin istənilən guşəsində həyat səviyyəsinin yaxşılaşmasına öz müsbət təsirini göstərir”.
Vidadi ORDAHALLI
