Müslüm İbrahimov: “Ölkədə az miqdarda istehsal olunmuş, amma ekoloji cəhətdən təmiz orqanik məhsullara Almaniyada maraq böyükdür”
Məlum olduğu kimi, bu günlərdə Almaniya Federativ Respublikasının Federal Kansleri xanım Angela Merkel Cənubi Qafqaz turnesi çərçivəsində Azərbaycanda da səfərdə oldu.
Merkelin Azərbaycana rəsmi səfəri həm ikitərəfli münasibətlər baxımından, həm də Avropa İttifaqı-Azərbaycan münasibətləri baxımından olduqca mühüm bir səfər idi. Hər nə qədər bu səfər siyasi səfər təəssüratı bağışlasa da, heç şübhəsiz, bu səfərin olduqca ciddi iqtisadi tərəfləri də var idi. Məsələ ondadır ki, son illər iki ölkə arasında iqtisadi əlaqələr genişlənir. Azərbaycanda 150 alman müəssisəsi fəaliyyət göstərir. Çox yaxşı olardı ki, bundan sonra Almaniya Azərbaycan iqtisadiyyatının müxtəlif sektorlarına böyük həcmdə sərmayələr qoysun.
Təsadüfi deyil ki, A.Merkel Prezident İlham Əliyevlə birgə mətbuat konfransı zamanı jurnalistlərin suallarını cavablandırarkən deyib ki, Almaniya Azərbaycanın istədiyi bütün sahələrdə iştirak edə bilər: “Mən buraya işgüzar nümayəndə heyəti ilə birgə gəlmişəm. Şirkətlər tərəfindən müxtəlif təkliflər var. Qeyd edə bilərəm ki, tikinti və infrastruktur sahələrində, eləcə də tikinti materialları sahəsində layihələr var. Biz aqrar sahədə, kənd təsərrüfatı maşınlarının texnologiyası, eləcə də rəqəmsallaşdırma, təhsil sahələrində fəaliyyət göstərə bilərik. Bundan başqa, təhlükəsizliklə bağlı sənədlərin - pasportların, şəxsiyyət vəsiqələrinin və banknotların hazırlanması sahəsində də alman şirkəti iştirak edir. Burada çox böyük, geniş seçim var. Biz Azərbaycanın istədiyi bütün sahələrdə iştirak edə bilərik. Qeyd etdiyim kimi, Azərbaycanda artıq 150 müəssisəmiz fəaliyyət göstərir. Biz digər alman şirkətlərini dəvət edirik ki, onlar da burada iştirak etsinlər”.
Maraqlıdır, bəs ekspertlər bunu necə dəyərləndirirlər? Almaniya Azərbaycanda iqtisadiyyatın hansı sahələrində fəal iştirak edib böyük sərmayələr qoya bilər?
Məsələyə münasibət bildirən iqtisad elmləri doktoru Müslüm İbrahimov bununla bağlı bir sıra məqamlara toxundu: “Hazırda Almaniya Azərbaycanda bioorqanik məhsulların istehsalına maraq göstərir. Sənayeləşmiş kənd təsərrüfatı məhsullarının istehsalı ilə bağlı Almaniya şirkətləri böyük imkanlara malikdirlər. Ona görə də sözügedən məhsulların istehsalına böyük maraq göstərirlər. Azərbaycanda az miqdarda istehsal olunmuş, amma ekoloji cəhətdən təmiz orqanik məhsullara Almaniyada maraq böyükdür. Nəinki Almaniyada, bir sıra inkişaf etmiş digər ölkələrdə belə kənd təsərrüfatı məhsullarına maraq böyükdür. Bu sahə ilə məşğul olan fermerlərin fəaliyyəti onları çox maraqlandırır. Ona görə ki, fermer təsərrüfatları belə məhsulları becərərkən kimyəvi elementlərdən az istifadə edirlər. Bu səbəbdən istehsal etdikləri məhsul ekoloji cəhətdən təmiz olur. Bundan başqa, elə məhsullar var ki, onların Almaniyada istehsalı məhduddur. Burada söhbət meyvə-tərəvəz məhsullarından gedir. Məsələn, nar və ondan hazırlanan müxtəlif məhsulların adını çəkmək olar. Almaniyanın kənd təsərrüfatı sahəsində çox böyük uğurları var. Hesab edirəm ki, Azərbaycan bundan bəhrələnməlidir. Onlar kənd təsərrüfatında yüksək texnologiyalardan istifadə etməyi prioritet hesab edirlər. Prezident İlham Əliyev də bir neçə dəfə vurğulayıb ki, kənd təsərrüfatında qabaqcıl texnologiyalardan istifadə olunmalıdır. Hesab edirəm ki, Almaniya bununla bağlı Azərbaycana yardım göstərə bilər. Bu, Azərbaycan üçün önəmlidir. Avropa təcrübəsi göstərir ki, kənd təsərrüfatı daha çox elm tutumludur, nəinki əmək tutumlu. Burada yüksək texnologiyalar, innovasiyalar öz əksini tapa bilər. Bu baxımdan hesab edirəm ki, iki ölkə arasında bu sahədə əməkdaşlıq Azərbaycanda kənd təsərrüfatında daha çox intensiv metodlardan istifadə olunmasına təkan verə bilər. Burada məhsul istehsalının artımından söhbət gedir. Daha sonra bu məhsulları Avropa ölkələrinə ixrac etmək mümkündür. Kənd təsərrüfatının rəqəmsallaşdırılmasında Almaniya Azərbaycana kömək edə bilər”.
Vidadi ORDAHALLI
