Bahadur Bilalov: “Xəzər dənizində kruiz turizm sisteminin yaradılması vacibdir” Ruslan Atakişiyev: “Dəniz turizminin inkişaf etdirilməsi dövlət büdcəsinə əlavə gəlir gətirər”
“Xəzər dənizində kruiz turizm sistemi yaradılmalıdır”. Bunu Rusiyanın Azərbaycandakı yeni səfiri Mixail Boçarnikov keçirdiyi mətbuat konfransında deyib.
Diplomat qeyd edib ki, indi Xəzərdə mehriban qonşuluq əlaqələrini möhkəmləndirən beynəlxalq hüquqi rejim yaradılıb: “Bu çox vacib tarixi hadisədir. Ümumi xarakter daşıyan bu Konvensiya yaxın zamanlarda Xəzər regionu ölkələrinin dövlət başçılarının qərarı ilə yaradılmış yüksək səviyyəli işçi qrupunun fəaliyyəti nəticəsində konkret layihələrə yol açacaq. Yüksək səviyyəli işçi qrupunun birinci iclasının 2018-ci ilin sonuna qədər Azərbaycanda keçirilməsi nəzərdə tutulur. Mən hələlik hansı layihələrin hazırlanacağını bilmirəm. Ola bilər ki, layihələrdən biri Xəzər dənizində kruiz turizmi sisteminin yaradılması olsun. Bunda həm ölkələr, həm də səyahət etmək istəyən insanlar maraqlıdır. Bu, hələlik bir fikirdir, amma istərdim ki, qısa zamanda reallaşsın”.
Xəzər dənizində kruiz turizm sisteminin yaradılmasının vacibliyi barədə danışan turizm sahəsiz üzrə ekspert Bahadur Bilalov “Bakı-Xəbər”ə açıqlamasında qeyd etdi ki, bu vacibdir. Turizmin bu növü olduqca maraqlıdır: “Xəzər dənizində kruiz turizm sistemi yaradılarsa, şəxsən mən bundan istifadə edərəm. Səfər zamanı bir neçə ölkənin liman şəhərlərini görmək mümkün olacaq. Ənzəli, Həştərxan, Aktau limanlarında olmaq olduqca maraqlıdır. Maraqlı bir ideyadır”.
Həmsöhbətimiz onu da bildirdi ki, Xəzər olduqca təlatümlü bir dənizdir: “Tez-tec güclü küləklər, iri dalğalar olur. Təhlükəsizlik baxımından Xəzər dənizində kruiz turizminin yaradılması müəmmalıdır. Ancaq layihə varsa və reallaşarsa, bundan Xəzəryanı ölkələr yalnız mənfəət əldə edə bilər”.
İqtisadçı-ekspert Ruslan Atakişiyev bizimlə söhbətində vurğuladı ki, turizm sahəsində müxtəlif imkanlar mövcuddur. Xəzər dənizinin ətrafında olan ölkələrlə turizm əlaqələrinin genişlənməsi ölkə iqtisadiyyatı üçün əhəmiyyətlidir: “Kruiz turizmi dünyada geniş yayılmış sistemlərdən biridir. Məsələn, İsveçrədə gəmiyə minən istənilən şəxs Fransanın hər hansı bölgəsinə səfər edə bilər. Xəzər dənizi vasitəsilə qonşu ölkələr və digər ölkələrin vətəndaşları turist kimi ölkəmizə səfər edə bilərlər. Dəniz vasitəsilə qonşu ölkələrlə müxtəlif mənada iqtisadi əməkdaşlıq etmək mümkün ola bilər”.
İqtisadçının fikrincə, dəniz turizminin inkişaf etdirilməsi dövlət büdcəsinə əlavə gəlir gətirər.
Günel CƏLİLOVA
