Əli Əlirzayev: “Bunun sayəsində ölkədə bu sahəyə aid istehsal müəssisələri fəaliyyət göstərəcək və yeni iş yerləri açılacaq”
Latviya tekstil istehsalçıları Azərbaycan vasitəsilə MDB bazarlarına daxil olmaq istəyirlər. Belə ki, Latviyadakı tekstil məhsullarının istehsalçıları öz məhsullarını MDB ölkələri bazarlarına daha çox ixrac etmək məqsədilə Azərbaycanda birgə istehsal müəssisələri yaratmağı planlaşdırırlar.
Bu barədə mətbuata açıqlamasında Azərbaycanın Tekstil İstehsalçıları və İxracatçılar Assosiasiyasının sədri, "Gilan Textile Park" şirkətinin rəhbəri Mehriban Axundova bildirib.
Onun sözlərinə görə, hazırda bununla bağlı danışıqlar davam edir: “Xüsusilə Latviyanın alt paltar istehsalçıları bununla maraqlanırlar. Çünki hazırda Avropa ölkələri üçün mövcud gömrük rüsumları və vergilərindən dolayı MDB bazarlarına çıxmaq sərfəli deyil. Birlik ölkələri ilə sərbəst ticarət, ölkəmizdə birgə istehsalın yaradılması bu ölkələrə hazır məhsulların ixracını gömrük ödənişlərindən azad edəcək”.
Assosiasiya sədrinin sözlərinə görə, artıq Latviya Geyim İstehsalçıları Assosiasiyası ilə danışıqlar aparılıb və bu ilin sonunadək müvafiq razılaşmalar əldə oluna bilər. Bundan əlavə, payızın ilk aylarında Rusiyanın Tekstil Məhsulları İstehsalçıları Birliyinin sədri ilə bu sahədə birgə planların hazırlanması üçün şərtlərin müəyyənləşdirilməsi nəzərdə tutulur. Assosiasiyanın sədri onu da bildirib ki, Azərbaycanın tekstil məhsullarına xaricdə böyük tələbat var. O hesab edir ki, yerli tekstil məhsulları xarici bazarda, ilk növbədə, ekoloji təhlükəsizlik standartları və beynəlxalq standartlara cavab verən yüksək keyfiyyətə görə rəqabət apara bilərlər.
Azərbaycanda bu sektorun inkişafına dəstək olmaq üçün Tekstil İstehsalçıları və İxracatçılar Assosiasiyası yaradılıb. Təşkilatı yaratmaq təşəbbüsü toxuculuq sektorunda iştirak edən sahibkarlar tərəfindən irəli sürülüb. Ümumiyyətlə, belə sənaye assosiasiyaları dövlət və özəl sektor arasında münasibətlərin və əlaqələrin inkişafına xidmət edir.
Ümumilikdə, sadalanan sözügedən imkanları ekspertlər necə dəyərləndirirlər? Məsələyə münasibət bildirən iqtisadçı-alim Əli Əlirzayevin sözlərinə görə, sözügedən təşəbbüs perspektivli hesab oluna bilər: “Məsələ ondadır ki, Azərbaycan regionda başlıca tranzit ölkədir. Ölkənin MDB ölkələri ilə geniş əlaqələri var. MDB ölkələri ilə qarşılıqlı əlaqələrə dair bir sıra razılaşmalar mövcuddur. Bütün bunlar olan yerdə sözügedən imkanlardan istifadə etmək daha sərfəlidir. İqtisadi cəhətdən bu həm onlar, həm də bizim üçün sərfəlidir. Azərbaycan tranzit ölkədir və istənilən mal ərazimizdən keçə bilər. Latviya Avropa İttifaqının üzvüdür. Əlbəttə, Azərbaycanla Latviyanın birgə tekstil müəssisələri yaratması tərəflərin xeyrinə olacaq. Bunun sayəsində Azərbaycanda bu sahəyə aid istehsal müəssisələri fəaliyyət göstərəcək və yeni iş yerləri açılacaq. Tekstil sahəsi qeyri-neft sektoruna aid olan sahədir. Bu sahənin Azərbaycanda inkişafına ehtiyac var. Söhbət keyfiyyətli tekstil sektorunun yaradılmasından gedir. Latviyanın qazancı o olacaq ki, birgə müəssisələr sayəsində MDB bazarına sərfəli şərtlərlə daxil olacaq. Yəni əlavə gömrük rüsumları ödəməyəcəklər. Nəticədə daha çox qazanacaqlar. O baxımdan hesab edirəm ki, bu məsələ ilə bağlı geniş işləmək lazımdır. Biz bütün mümkün və sərfəli vasitələrlə çalışmalıyıq ki, Azərbaycanda emal və istehsal sektoru inkişaf etsin. Bazarın tələblərinə uyğun istehsal sektoru qurulsun”.
Vidadi ORDAHALLI
