Fuad İbrahimli: “Körfəz ölkələri Azərbaycan üçün yeni bazardır”
Xəbər verildiyi kimi, Azərbaycan milli məhsulların Fars körfəzi ölkələrinin bazarlarına ixrac coğrafiyasını genişləndirmək məqsədilə 2018-ci ilin sonuna qədər Birləşmiş Ərəb Əmirliklərinə iki ixrac missiyası göndərməyi planlaşdırır. Bu barədə media nümayəndələrinə açıqlamasında Azərbaycanın Dubaydakı ticarət nümayəndəsi Elnur Əliyev bildirib.
E.Əliyev deyib ki, xüsusilə meyvə-tərəvəz, meyvə şirələri, bal, quru süd, ət, çay və fındıq kimi məhsulların Fars körfəzi ölkələrinə ixracını və bu regionda fəaliyyət göstərən ticarət şəbəkələrinə çıxışını təmin etmək üçün danışıqlar davam etdirilir.
Onun sözlərinə görə, ixrac missiyalarının yerli istehsalçıların iştirakı ilə əsas məqsədi "Made in Azerbaijan" milli brendinin BƏƏ və digər Fars körfəzi ölkələrinin bazarlarında təşviqindən ibarətdir.
E.Əliyev onu da bildirib ki, Dubaya ixrac edilən Azərbaycan kənd təsərrüfatı məhsullarının keyfiyyəti çox yüksəkdir, lakin Dubay bazarının çox inkişaf etdiyini nəzərə alsaq, keyfiyyətlə yanaşı, məhsulların sabit tədarükünə daha böyük diqqət yetirilir: “Fikrimcə, bu, ixrac malları və məhsullarının BƏƏ-nin rəqabətli bazarlarında uğurla təşviqi üçün vacib meyarlardan biridir. Bizim şirkətlər arzuolunan nəticə əldə etmək üçün bu istiqamətdə ciddi irəliləməlidirlər. Azərbaycan öz ixrac potensialından çıxış edərək ciddi işlər görüb və bu istiqamətdə razılaşmalar yalnız BƏƏ ilə deyil, həm də Avropanın aparıcı ölkələri ilə əldə olunub. Gələcəkdə milli məhsulların xüsusilə Fars körfəzi ölkələrinin bazarlarına ixrac coğrafiyasını genişləndirmək məqsədilə danışıqların aparılması nəzərdə tutulur".
Azərbaycan Körfəz ölkələrinə meyvə-tərəvəz ixrac edərsə, bunun ölkə iqtisadiyyatına hansı müsbət təsirləri ola bilər?
Mövzu barədə danışan iqtisadçı-ekspert Fuad İbrahimli “Bakı-Xəbər”ə açıqlamasında qeyd etdi ki, bu proses reallaşarsa, ölkə iqtisadiyyatına yalnız müsbət təsir göstərər: “Məlumdur ki, Azərbaycan tərəfi əsasən şimal ölkələrinə meyvə-tərəvəz ixrac edib. Qonşu ölkələrə məhsul ixrac edirik. Azərbaycan məhsulu şimal zonasında öz mövqeyini qoruyub saxlayır. Ancaq Fars körfəzi ölkələri Azərbaycan üçün yeni bazardır. Körfəz ölkələri ilə əməkdaşlıq Azərbaycan iqtisadiyyatına yeni nəfəs verəcək”.
Həmsöhbətimiz onu da bildirdi ki, Fars körfəzi ölkələri tərəvəz ixraca baxımından formalaşmış bölgədir. Qeyd olunan bazara daxil olmaq və rəqabətə tab gətirmək asan olmayacaq: “Amma biz hazırkı rəqabətlə o bazara daxil ola bilsək, birmənalı şəkildə mənfəət əldə edəcəyik”.
Günel CƏLİLOVA
