Rəsul Cahangirli: “Sərmayələrin cəlbi üçün ölkədə geniş və çoxşaxəli potensial var”
Bu günlərdə ABŞ-ın Özəl Xarici İnvestisiyalar Korporasiyasının (OPİC) vitse-prezidenti David Bohigian və ABŞ-ın digər rəsmi nümayəndələri Bakıya səfərləri çərçivəsində Azərbaycanın hökumət müəssisələrinin rəhbərləri ilə görüşlər keçiriblər.
Səfərin məqsədi Amerikanın regiona yatırımlarının təşviqi, tərəfdaşların gücləndirilməsi və iqtisadi inkişafa, sabitliyə aparıb çıxaran işgüzar əlaqələrin dərinləşdirilməsinə yardım etmək idi.
"OPİC təbii resursların mənimsənilməsinə, energetika və infrastruktura yönəlmiş yatırımlar vasitəsilə Azərbaycanı və onun xalqını dəstəkləməyə çalışır", - deyə Bohigian bildirib.
Onun sözlərinə görə, Azərbaycanda və regionda ABŞ-dan daha çox investisiya cəlb etmək üçün cəzbedici imkanlar var. Bu investisiyalar özəl sektoru gücləndirməyə və daha yaxşı həyat qurmağa kömək edir. Azərbaycan şəffaflığı, sabitliyi, keyfiyyəti və yerli icmalara, ətraf mühitə hörməti təşviq edən investisiyalara sadiq qalaraq, öz xalqı üçün müsbət yoldan gedir.
"Biz Azərbaycan hökuməti ilə əməkdaşlığa ümid edirik, belə ki, hökumət bu yoldan irəliləyir və ABŞ-ın ölkələrimizin iqtisadiyyatına və xalqlarına fayda verəcək gələcək investisiyaları üçün şərait yaradır", - deyə OPİC-in vitse-prezidenti bildirib.
ABŞ-ın nümayəndə heyəti iqtisadiyyat nazirinin müavini Rüfət Məmmədov, İnvestisiyalara Yardım Agentliyinin (AzPromo) direktoru Fuad Cəfərov və İqtisadiyyat Nazirliyi yanında Kiçik və Orta Sahibkarlığın İnkişafı Agentliyinin idarə rəisi Şamil Süleymanlı ilə görüşlər keçirib.
Nümayəndə heyəti, həmçinin, amerikalı biznes liderləri ilə görüşüb.
Hazırda OPİC-in Azərbaycana 11 milyon dollar investisiyası var. 2013-cü ildə OPİC banklardan birinə kiçik və orta müəssisələrin portfelinin genişləndirilməsi üçün ümumilikdə 7,5 mln. ABŞ dolları məbləğində kredit verib. Bu kreditlər fermerlərə və kənd təsərrüfatı sənayesinə fayda verib.
Ümumilikdə, OPİC-in təbii resursların mənimsənilməsinə, energetika və infrastruktura qoymaq istədiyi sərmayələri ekspertlər necə dəyərləndirirlər?
Məsələyə münasibət bildirən ekspert Rəsul Cahangirlinin sözlərinə görə, bununla bağlı Azərbaycanda çoxşaxəli imkanlar mövcuddur: “ABŞ investorları Azərbaycan iqtisadiyyatının müxtəlif sahələrinə sərmayə qoya bilərlər. ABŞ-ın Özəl Xarici İnvestisiyalar Korporasiyası Azərbaycanda nəinki təbii resursların mənimsənilməsinə, energetika və infrastruktura, eyni zamanda digər sektorlara da sərmayə qoya bilər. Çünki Birləşmiş Ştatlardan sərmayələrin cəlbi üçün ölkədə geniş və çoxşaxəli potensial var. Sadəcə, bunu öyrənmək və bundan səmərəli şəkildə istifadə etmək lazımdır. Bununla yanaşı, son 3 ildə aparılan sistemli və köklü islahatlar sayəsində investisiyaların cəlbi üçün hərtərəfli şərait yaradılıb. Nəzərə alsaq ki, Azərbaycanda qeyri-neft sektorunun inkişaf etdirilməsi başlıca məqsəd olaraq qarşıya qoyulub, o zaman ABŞ sərmayəsinin ölkəyə gəlməsi üçün böyük perspektivlər var. Son illər Azərbaycanda hökumətin vəsaiti hesabına böyük infrastruktur layihələri həyata keçirilib. Sahibkarların, xarici investorların ölkə iqtisadiyyatına sərmayə qoymaları üçün infrastrukturun olması vacib faktorlardan biridir. Bu sahədə mövcud olan problemlər, demək olar, tamamilə aradan qaldırılıb. O da bir reallıqdır ki, Azərbaycan iqtisadiyyatında, xüsusən də qeyri-neft sektorunda ABŞ sərmayəsinin çəkisi yetərli səviyyədə deyil. Hesab edirəm ki, bu istiqamətdə səyləri, təmasları daha da artırmaq və genişləndirmək lazımdır. Çünki bundan hər iki tərəf qazanacaq. Ən başlıcası isə, bu, Azərbaycanda qeyri-neft sektorunun inkişafına öz müsbət töhfəsini verəcək”.
Vidadi ORDAHALLI
