Qadir Bayramlı: “Aqrar sektorda 7 faizlik artım yetərli deyil, nəzərə almaq lazımdır ki, Azərbaycanın kənd təsərrüfatının potensialı daha böyükdür”
Son illər ölkəmizdə kənd təsərrüfatının modernləşdirilməsi, aqrar sektorda mövcud problemlərin həllinə sistemli və kompleks yanaşılması, dövlətin inzibati və maliyyə resurslarından səmərəli istifadə olunması, ölkənin aqrar potensialının təbliği istiqamətində mühüm uğurlar əldə edilib. Aqrar sahənin inkişaf etdirilməsi istiqamətində atılan addımlar artıq öz müsbət nəticələrini verməkdə, bu sahədə həm məhsuldarlığın, həm də ixracın həcmi artmaqdadır.
Açıqlanan statistik rəqəmlərə əsasən, bu ilin yanvar-iyul aylarında Azərbaycanda 4 001,2 mln. manatlıq kənd təsərrüfatı məhsulu istehsal edilib. Dövlət Statistika Komitəsinin yaydığı məlumatda qeyd olunur ki, bu, ötən ilin eyni dövrü ilə müqayisədə 6,5% çoxdur.
Son 1 ildə bitkiçilik məhsullarının istehsalı 11%, heyvandarlıq məhsullarının istehsalı isə 2,5% artıb. Bu il avqustun 1-nə kimi tarlalardan 534,2 min ton və yaxud ötən ilin eyni dövrünə nisbətən 1,5% çox kartof, 925,7 min ton (15,6% çox) tərəvəz, 308,1 min ton (1,1% az) bostan məhsulları, 207,4 min ton (2,7% çox) meyvə və giləmeyvə, 4,2 min ton (2,1% çox) üzüm, 535,2 ton (20,5% çox) yaşıl çay yarpağı, 1,8 min ton (eyni səviyyədə) günəbaxan, 2,1 min ton (5,7% çox) tütün, qarğıdalı da daxil olmaqla 3 009,3 min ton payızlıq və yazlıq dənli və dənli paxlalı bitkilər yığılıb.
Hesabat dövründə diri çəkidə ət istehsalı 3% artaraq 280,8 min ton, süd istehsalı 1,2% artaraq 1 199,4 min ton, yumurta istehsalı 0,7% artaraq 1 022,4 mln. ədəd, yun istehsalı isə 1,4% azalaraq 14,7 min ton olub.
Bundan başqa, 7 ay ərzində ölkədə 514 ton barama istehsal edilib ki, bu da son 20 ilin ən yüksək göstəricisidir.
Bu ilin yanvar-iyul ayları ərzində ölkənin aqrar sektorunun 7 faiz böyüməsi barədə fikir bildirən Azərbaycan Dövlət İqtisad Universitetinin dosenti Qadir Bayramlı “Bakı-Xəbər”ə açıqlamasında qeyd etdi ki, son zamanlar kənd təsərrüfatı sahəsinin inkişafı ilə bağlı səmərəli tədbirlər görülməkdədir. Görülən işlərin nəticəsi özünü göstərir: “Hesab edirəm ki, aqrar sektorda 7 faizlik artım yetərli deyil. Nəzərə almaq lazımdır ki, Azərbaycanın kənd təsərrüfatının potensialı daha böyükdür. Aqrar sektorda yüksək nailiyyət əldə etmək üçün intensiv təsərrüfata keçmək lazımdır. Aqrar sığortanın tətbiqini gücləndirmək lazımdır. Fermerlərin üzləşdikləri problemlərlə birbaşa maraqlanmaq lazımdır. Onların fikirləri dinlənilməlidir. Bütün bunlar reallaşarsa, aqrar sektorda inkişaf daha yüksək səviyyədə olar”.
Həmsöhbətimizin sözlərinə görə, kənd təsərrüfatında artımı təmin etmək üçün fermerlərin bazara çıxışını asanlaşdırmaq lazımdır. Həmçinin, subyektiv maneələr aradan qaldırılmalıdır: “Fermerlərə müstəqillik verilməlidir. Eyni zamanda, kənd təsərrüfatı sahəsi taraz inkişaf etdirilməlidir. Bir sahənin inkişafı hesabına digər sahələri daraltmaq olmaz. Eləcə də kənd təsərrüfatına yararlı torpaqların sayını artırmaq lazımdır”
Q.Bayramlı onu da vurğuladı ki, kənd təsərrüfatı məhsullarının xam şəkildə satışı üçün aqrar sənaye inkişaf etdirilməlidir: “Nəzərə almaq lazımdır ki, emal olunmuş aqrar məhsullar daha çox gəlir gətirir. Bütün bunlar həyata keçirilərsə, bu, ölkənin qida təhlükəsizliyinə öz töhfəsini verər”.
Günel CƏLİLOVA
