“Ona görə də prosesləri davamlı olaraq ciddi təhlil etmək lazımdır”
Azərbaycan Dövlət Neft Fondu (ARDNF) tərəfindən investisiya strategiyasının optimallaşdırılması, investisiya portfelinin diversifikasiyasının təmin edilməsi və uzunmüddətli gəlirliliyin yüksəldilməsi məqsədilə ARDNF-nin investisiya portfelinin əsasını təşkil edən aparıcı iqtisadiyyatlara malik ölkələrin (ABŞ, Avrozona və Birləşmiş Krallıq) valyutaları ilə yanaşı digər ölkələrin valyutalarında ifadə olunan aktivlərə də sərmayə qoyuluşları həyata keçirilir.
Məlum olduğu kimi, bu barədə Fondun açıqlamasında bildirilir. Məlumata görə, bu istiqamətdə ARDNF-nin investisiya portfelində Çin yuanı, Koreya vonu, Avstraliya dolları, Rusiya rublu və Türkiyə lirəsi də daxil olmaqla digər valyutalar da yer alır.
ARDNF-nin investisiya portfelində cari ilin ikinci rübünün sonuna təqribən 0,9% pay təşkil edən Türkiyə dövlət istiqrazları və təqribən 0,9% pay təşkil edən Rusiyadakı investisiyalar (VTB bankın səhmləri və Moskva şəhərində “Tverskaya 16” ünvanında yerləşən ofis-ticarət mərkəzi) cari bazar konyunkturası nəzərə alınmaqla Fondun hazırkı investisiya strategiyası və müvafiq orta və uzunmüddətli real gəlirlilik gözləntiləri ilə uyğunluq təşkil edir.
Bununla yanaşı, ARDNF tərəfindən son zamanlar qeyd edilən ölkələrdə özünü daha çox büruzə verən geosiyasi risqlər də nəzərə alınmaqla bütün investisiya portfelinin cari vəziyyəti, bazar konyunkturası və gözləntilər ciddi şəkildə təhlil olunur və zəruri olduqda çevik taktiki addımlarla investisiya portfelinə müvafiq dəyişikliklər edilir.
O da məlumdur ki, son zamanlar qonşu Türkiyənin iqtisadiyyatında təbəddülatlar yaşanır. Ölkənin milli valyutası olan lirə dollara nisbətdə ucuzlaşır. Vəziyyətin nə zaman nizama düşəcəyi isə bəlli deyil. Belə vəziyyətdə Azərbaycan Dövlət Neft Fondu Türkiyədə inflyasiya və iqtisadi vəziyyətlə baglı oz investisiya portfelində hansı dəyişikliklər etməlidir?
Məsələyə münasibət bildirən iqtisadçı alim Əli Əlirzayevin sözlərinə görə, Neft Fondu prosesləri davamlı təhlil etməli və şəraitə uyğun qərar verməlidir: “Neft Fondunun ehtiyatlarının tərkibində türk lirəsinin çəkisi aşağıdır. İinvestisiya portfelində vəziyyət fərqlidir. Bu baxımdan narahatlığa elə bir əsas yoxdur. O da məlumdur ki, Neft Fondu Türkiyədə bir sıra böyük layihələri maliyyələşdirir. Bununla bağlı bir sıra işlər görülüb və görüləcək. Ona görə də prosesləri davamlı olaraq ciddi təhlil etmək lazımdır. Lazım gələrsə, bəzi layihələri təxirə salmaq da olar. Ancaq buna elə bir ciddi zərurət yoxdur. Məsələ ondadır ki, vəziyyət hələ o dərəcədə kritik səviyyədə deyil. Hansısa zərurət yaranarsa, o zaman Neft Fondu investisiya portfelinə yenidən baxa bilər. Ola bilsin ki, bəlli bir dövrdən sonra ölkədə gedən iqtisadi proseslər nizama düşsün. Çünki Türkiyə iqtisadiyyatı böyükdür. Baxaq görək Türkiyədə proseslər necə nəticələnəcək”.
Vidadi ORDAHALLI
