Fatimə Hacıbəyli: “Sahibkar qadınlar istehsal etdikləri milli geyimləri və digər məhsulları “Made in Azerbaijan” brendi ilə xaricə ixrac edirlər”
Azərbaycanın sahibkar qadınları istehsal etdikləri milli brendləri MDB və Avropa ölkələrinə ixrac etməyi düşünürlər. Ölkəmizdə qadın iş adamlarının sayı sürətlə artır. Sahibkar qadınlar yeni brendlər hazırlayaraq Avropa və MDB ölkələrinə ixrac edirlər.
Azərbaycan Sahibkar Qadınlar Assosiasiyasının sədri Səkinə Babayeva media nümayəndələrinə açıqlamasında qeyd edib ki, hazırda 143 mindən artıq qadın sahibkarlıq fəaliyyəti ilə məşğuldur: “Bu kifayət qədər yüksək rəqəmdir. Gələcəkdə işguzar xanımların sayı daha da artacaq. Hazırda ölkəmizdə ümumdaxili məhsulun 80 faizi özəl sektorun payına düşür. Bu statistikada sahibkar xanımların öz töhfəsi var”.
S.Babayeva qeyd edib ki, “Made in Azerbaijan” brendi adı altında milli geyim və digər məhsullar işgüzar xanımlar tərəfindən istehsal olunur və xaricə ixrac edilir: “Hazırda Assosiasiyanın əsas fəaliyyəti Azərbaycanın biznes fəaliyyətində qadınların iştirakını və rolunu artırmaqdır”.
Sahibkar qadınların istehsal etdikləri məhsulun xaricə ixrac olunması işgüzar xanımların sayının artması ilə bağlıdır.
“Vəfa” Sosial İctimai Birliyinin rəhbəri Fatimə Hacıbəyli “Bakı-Xəbər”ə açıqlamasında qeyd etdi ki, Azərbaycanda həyata keçirilən iqtisadi islahatlar işgüzar xanımlar üçün yeni imkanlar yaradır: “Azərbaycan iqtisadiyyatında inkişaf yaşanır. İqtisadiyyatın inkişafı istiqamətində görülən işlər işgüzar insanların ruhlanmasına səbəb olub. Biznes sahəsində tək bəylər deyil, eyni zamanda, xanımlar da öz sözünü deyir. Bəllidir ki, artıq Azərbaycanda Sahibkar Qadınlar Assosiasiyası fəaliyyət göstərir. Belə bir Assosiasiyanın olmağı Azərbaycan iqtisadiyyatının güclü olmağından xəbər verir”.
Həmsöhbətimizin sözlərinə görə, sahibkar qadınlar istehsal etdikləri milli geyimləri və digər məhsulları xaricə ixrac edirlər: “Bu o deməkdir ki, xanım sahibkarların istehsal etdikləri məhsul daxili bazarı təmin etməklə yanaşı, xaricə də ixrac olunur. “Made in Azerbaijan” brendi adı altında milli geyimlərin xaricə ixrac olunması həm iqtisadiyyata müsbət təsir edəcək, həm də ölkənin tanıdılmasına”.
Birlik sədri hesab edir ki, qadın sahibkarlığın inkişafı yoxsulluğun azalmasına, qadınların iqtisadi və sosial nüfuzunun artmasına və bir çox hallarda cəmiyyətdə gender bərabərsizliyinin aradan qaldırılmasına yardım edəcək: “Onu da qeyd edim ki, son zamanlar Azərbaycan qadınları arasında sahibkarlıq meylləri güclənib. Qadın sahibkarlar əsasən tekstil və kənd təsərrüfatı sahəsində aktiv idilər. Ancaq indi vəziyyət müsbətə doğru dəyişib. Qadın sahibkarlar tək aqrar, səhiyyə və təhsil sahəsi deyil, eyni zamanda, turizm, biznes, informasiya təhlükəsizliyi sektorlarında ciddi fəallıq göstərirlər. Sahibkar qadınların sayının artması cəmiyyət üçün ciddi əhəmiyyət daşıyır”.
Günel CƏLİLOVA
