Vüqar Bayramov: “DOST” mərkəzlərinin fəaliyyətə başlaması vətəndaşların bu xidmətlərə əlçatanlığının şəffaf şəkildə təmin edilməsinə imkan yaradacaq” Eldəniz Səlimov: “DOST” çox qısa dövrdə hamının dostu olacaq”
Xəbər verildiyi kimi, Azərbaycanda DOST Agentliyi yaradılıb. Prezident İlham Əliyev bir neçə gün öncə əhalinin məşğulluğu, əmək, sosial müdafiə və təminat sahələrində idarəetmənin təkmilləşdirilməsi ilə bağlı əlavə tədbirlər haqqında Fərman imzalayıb.
Fərmana əsasən, əhalinin məşğulluğu, əmək, sosial müdafiə və təminat sahələrində vətəndaşlara göstərilən xidmətlərin keyfiyyətinin yüksəldilməsi, şəffaflığın artırılması, innovativ həllərin tətbiqi və elektron xidmətlərə keçidin sürətləndirilməsi, habelə süründürməçilik hallarının qarşısının alınması və vətəndaş məmnunluğunun artırılması məqsədilə Əhalinin Sosial Müdafiəsi Nazirliyinin tabeliyində “Dayanıqlı və Operativ Sosial Təminat Agentliyi” publik hüquqi şəxs (DOST Agentliyi) yaradılıb.
Fərmanda əhalinin məşğulluğu, əmək, sosial müdafiə və təminat, habelə Əmək və Əhalinin Sosial Müdafiəsi Nazirliyinin fəaliyyət istiqamətlərinə uyğun digər sahələrdə xidmətlərin həyata keçirilməsini təmin edən “DOST” mərkəzlərinin yaradılması müəyyən edilib.
Yeni yaradılan DOST Agentliyinin əhalinin məşğulluğu sahəsində hansı işlər görəcəyini aydınlaşdırmaq məqsədilə ekspertlərə müraciət etdik.
Millət vəkili Eldəniz Səlimov bildirdi ki, Azərbaycanda böyük, dinamik, sürətli inkiaf getsə də, respublikamız dünyanın lider dövlətləri sırasında öncül mövqelərdə bərqərar olsa da, bəzi sahələrdə hələ də problemlər qalmaqda idi: “Bu haqda tez-tez parlamentin komitə və plenar iclaslarında həmkarlarımız tərəfindən iradlar, tənqidlər və konstruktiv təkliflər səslənirdi. Yəni bir sıra məsələlərdə vətəndaşların incidilməsi, süründürməçilik, məmur özbaşınalığı, bürokratiya halları yaşanır və davam edirdi. Düzdür, bu halların qarşısının alınması üçün dövlət, dövlət rəhbəri tərəfindən mütəmadi addımlar atılır, fərman və sərəncamlar verilir, yerində olmayan məmurlarla bağlı ciddi ölçülər götürülürdü, elə “ASAN xidmət”in yaradılması və effektli fəaliyyətini buna misal göstərmək olar, amma bununla belə, hələ də özlərini qanunlardan yuxarı görənlər tapılırdı.
Təbii ki, bu kimi hallar Azərbaycan dövlətini, ilk növbədə, hər bir addımında Azərbaycan vətəndaşını düşünən ölkə Prezidentini heç cür razı sala, qane edə bilməzdi.
Xatırladım ki, Prezident 4 iyul müşavirəsində və 8 iyul iclasında bu istiqamətdə ciddi xəbərdarlıq etmişdi, bürokratik əngəllərə, məmur özbaşınalığına dözülməyəcəyini bəyan etmişdi. Odur ki, bu fərmanı həm də həmin tarixi toplantıların məntiqi davamı və yekunu kimi qiymətləndirmək olar.
Hesab edirəm ki, “DOST” çox qısa dövrdə hamının dostu olacaq”.
İqtisadçı-ekspert Vüqar Bayramov qeyd etdi ki, Əmək və Əhalinin Sosial Müdafiəsi Nazirliyinin tabeliyindəki Dayanıqlı və Operativ Sosial Təminat Agentliyinin fəaliyyətinin təşkili, "DOST” mərkəzlərinin yaradılması bu sahədə şəffaflığın artırılması, vətəndaşlara daha səmərəli və əlçatan xidmətlərin tətbiq edilməsi məqsədi daşıyır: “DOST”un yaradılması sosial sferada “ASAN xidmət” modeli kimi qiymətləndirilir. Bu sənəd çox vacib idi. Sosial xidmətlərin keyfiyyətinin artırılması, bu sferadakı çatışmazlıqların aradan qaldırılmasında "DOST” mərkəzləri əhəmiyyətli rol oynayacaq. Daha çox pensiyaların təyinatında yol verilən nöqsanlar, ünvanlı sosial yardımın verilməsində mövcud olan qanunsuzluqlar diqqət çəkirdi. Bu sferada şəffaflığın yaradılması üçün böyük mexanizm, model hazırlanmasına ehtiyac var idi. Ona görə “DOST”, praktik olaraq, bu modelin yaradılmasıdır.
Nəticə etibarilə "DOST” mərkəzləri sosial sferada şəffaflığın təmin edilməsinə imkan verəcək. Vətəndaş və məmur arasındakı ünsiyyətin minimumlaşdırılması sayəsində daha əlverişli mühit yaradılacaq. “DOST” mərkəzlərinin fəaliyyətə başlaması əvvəlki illərdə mövcud olan sosial problemlərin aradan qaldırılmasına, vətəndaşların bu xidmətlərə əlçatanlığının şəffaf şəkildə təmin edilməsinə imkan yaradacaq”.
Günel CƏLİLOVA
