İlqar Hüseynli: “Ona görə də bu ölkəni çətin iqtisadi proseslər gözləyir”
Hazırda Rusiya rublu ABŞ dolları qarşısında sürətlə ucuzlaşmaqda davam edir. Ötən həftə ərzində dollar 5 rubl bahalaşaraq 68 rubldan yuxarıda möhkəmlənib. Bu, rublun aprel enişindən sonra yeni tarixi minimumudur. 2015-ci ilin yanvarından bu yana rublun belə sürətli enişi müşahidə olunmamışdı.
Rublun eniş səbəbləri əsasən siyasi xarakterlidir. Məsələ ondadır ki, Rusiya iqtisadiyyatı ABŞ-ın sanksiyalarının təsirilə zəifləməkdədir. Belə ki, ötən həftə Senat Rusiyaya qarşı yeni sanksiyalar paketini təsdiqləyib. Rusiyalı ekspertlər tezliklə 1 dolların 70 rubldan baha olacağını da istisna etmirlər.Onu da əlavə edək ki, Rusiya Mərkəzi Bankı avqustun 9-dan bu günədək dollar alışı həyata keçirməyib.
Rusiya rublunun sürətlə zəifləməsi digər ölkələrin pullarına da təsir göstərib. “BRİCS ölkələri” adlanan qrupda Rusiya ilə birlikdə təmsil olunan Braziliya və CAR-ın milli valyutaları peso və rand da uyğun olaraq 3,1% və 2,7% zəifləyiblər.
Rusiya iqtisadiyyatı ilə sıx bağlı olan ölkələrdən biri də Ermənistandır. Şübhəsiz ki, rublun ucuzlaşması Ermənistanın pul vahidi olan dramın məzənnəsinə təsirsiz ötüşməyəcək. Onsuz da Ermənistanda iqtisadi vəziyyət yaxşı deyil. Ermənistandakı həbs dalğası və siyasi müstəvidə baş verən təlatümlər ölkənin iqtisadi həyatını çökdürüb. Xüsusən son günlər düşmən ölkədə müşahidə olunan ərzaq bahalaşması erməniləri acınacaqlı duruma salıb. Onsuz da can verən Ermənistan iqtisadiyyatı mövcud siyasi gərginliklərdən dolayı daha bərbad vəziyyətə düşüb. Bununla yanaşı, İrana qarşı tətbiq edilən sanksiyalar da Ermənistana mənfi təsir göstərəcək. Ona görə də Rusiya rublunun sürətlə ucuzlaşması və digər proseslər Ermənistan dramının aqibətinə necə təsir göstərəcək?
Məsələyə münasibət bildirən ekspert İlqar Hüseynlinin fikrincə, sözügedən proseslər Ermənistan iqtisadiyyatına və milli valyutasına təsirsiz ötüşməyəcək: “Rusiya və İranda milli valyutaların kəskin şəkildə ucuzlaşması regionda yerləşən digər ölkələrin də valyuta bazarına təsir edir. Xüsusən də Ermənistana. Nəzərə almaq lazımdır ki, Ermənistan işğalçı siyasət apardığı üçün Azərbaycan və Türkiyə tərəfindən blokadaya salınıb. Ermənistan iqtisadiyyatı daha çox Rusiyadan asılıdır. Rusiya rublunun kəskin ucuzlaşması şübhəsiz ki, Ermənistana təsirsiz ötüşməyəcək. Nəticədə Ermənistan öz milli valyutası olan dramı inflyasiyanın təsirindən qoruya bilməyəcək. Beləliklə, onların milli valyutası dəyərdən düşəcək. Ermənistana az-çox güclü diaspor köməyi var, amma bu yetərli deyil. Çünki Ermənistanın iqtisadi gücünün region ölkələrindən asılı olması dramı çətin vəziyyətdə qoyur. Ona görə də Ermənistanı çətin iqtisadi proseslər gözləyir”.
Vidadi ORDAHALLI
