Azər Badamov: “Strateji Yol Xəritəsində müəyyən edilən hədəflərin bəzilərinin artıq icrası uğurla başa çatdırılıb, bu mənada deyə bilərəm ki, beynəlxalq agentliklərin öz açıqlamalarında Azərbaycan haqqında verdikləri proqnoz bugünki reallığı əks etdirir”
Aydın Hüseynov: “Dünya bazarında neftin qiymətinin artması kimi amillər ona rəvac verir ki, ölkəmizdə dayanıqlı və dinamik sistem formalaşsın, bu isə beynəlxalq reytinqi müəyyənləşdirən təşkilatların diqqətini cəlb edir”
Son zamanlar beynəlxalq agentliklər qarşıdakı illərdə Azərbaycanda iqtisadi artımın sürətlənəcəyini proqnoz edir. Bu günlərdə "Moody’s” beynəlxalq reytinq agentliyi 2019-cu ildə Azərbaycanda iqtisadi artım templərinin sürətlənəcəyini bildirib.
Agentliyin hesabatında deyilir ki, ölkə iqtisadiyyatında bu ilin ilk 6 ayındakı göstəricilər onu deməyə əsas verir ki, əvvəlki illərdə başlanan və hazırda davam etdirilən islahatlar nəticələrini verməkdədir. Əlverişli xarici mühit, ötən il neft qiymətinin orta hesabla 54 dollar olması, milli valyutanın sabitliyi və inflyasiyanın azalması Azərbaycan iqtisadiyyatının bərpasına gətirib çıxarıb: “Biz gözləyirik ki, Azərbaycanda ÜDM-in artımı bu il 1,5 faiz, gələn il 3 faiz artacaq. Bu, neft qiymətinin bahalaşmasının davam etməsi və Azərbaycan məhsullarının ixracının artımı ilə izah olunur”.”
"Moody’s” beynəlxalq reytinq agentliyinin 2019-cu ildə Azərbaycan iqtisadiyyatında sürətli artım tempinin baş verəcəyilə bağlı proqnozunun nəyə əsaslandığını öyrənmək məqsədilə ekspertlərə müraciət etdik.
Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Azər Badamov bildirdi ki, bu, ölkə iqtisadiyyatının ayrı-ayrı sektorlarında müşahidə edilən artımla bağlıdır: “Məlumdur ki, ilin ilk 6 ayı ərzində ölkənin iqtisadi potensialında artım müşahidə edilib və bu tendensiyanın ilin sonunadək davam edəcəyi gözlənir. Strateji Yol Xəritəsində bu məsələ ayrıca qeyd olunub və müvafiq addımlar atılmaqdadır. Nəzərə almaq lazımdır ki, hazırda iqtisadiyyatın fərqli sferalarına dövlət dəstəyi göstərilir. Yol Xəritəsində müəyyən edilən hədəflərin bəzilərinin artıq icrası uğurla başa çatdırılıb. Bu mənada deyə bilərəm ki, beynəlxalq agentliklərin öz açıqlamalarında Azərbaycan haqqında verdikləri proqnoz bugünkü reallığı əks etdirir. Hesab edirəm ki, qarşıdakı illərdə iqtisadi artım proqnoz ediləndən daha çox olacaq. Çünki bu il bir neçə sənaye müəssisəsi fəaliyyətə başlayıb. Bundan başqa, ölkənin turizm potensialı artmaqdadır. Aqrar sahə üzrə ayrı-ayrı layihələrin icrası həyata keçirilir. Ənənəvi kənd təsərrüfatı sahələri yenidən dirçəldilir”.
Millət vəkili Aydın Hüseynov qeyd etdi ki, “Moody’s” kimi beynəlxalq maliyyə reytinqini müəyyənləşdirən mötəbər agentliklər Azərbaycanla bağlı çox nikbin proqnozlar verir: “Bu isə təsadüfi deyil. 2016-cı ildən başlayaraq Prezident İlham Əliyev Azərbaycan iqtisadiyyatının, demək olar ki, bütün sektorlarını əhatə edən strateji yol xəritəsi tərtib etdi. Başlıca məqsəd ölkə iqtisadiyyatının neftdən asılılığını minimuma endirmək idi. Qeyri-neft sektorunun şaxələndirilmiş şəkildə inkişaf etdirilməsi perspektiv olaraq qarşıya qoyulub. Artıq o hədəflərə çatılıb.
Qeyri-neft sektoru getdikcə daha sürətlə inkişaf edir, ümumi daxili məhsulun tərkibində bu sektorun çəkisi artır, kənd təsərrüfatı, turizm, sənaye və digər sahələrdə çox böyük nailiyyətlər əldə olunub. Qısacası, ölkənin ixrac potensialı daha da genişlənib.
Digər tərəfdən maliyyə-bank sektorunda aparılan dərin islahatlar öz nəticəsini verməkdədir. Dünya bazarında neftin qiymətinin artması kimi amillər ona rəvac verir ki, ölkəmizdə dayanıqlı və dinamik sistem formalaşsın. Bu isə beynəlxalq reytinqi müəyyənləşdirən təşkilatların diqqətini cəlb edirvə onlar təhlillər aparır. Azərbaycanla bağlı hesabatlar faktlara, araşdırmalara, ölkəmizdə gedən proseslər və onların nəticələrinə əsaslanır”.
Günel CƏLİLOVA
