Könül Nuriyeva: “Aqrar məhsulların satış qiymətində azalmanın yaşanması bazarda bolluğa səbəb olur”
Açıqlanan statistik rəqəmlərə əsasən, Azərbaycanda illik inflyasiya 3,2%-ə düşüb. 2018-ci ilin yanvar-may aylarında istehlak məhsullarının və xidmətlərin qiymətləri 2017-ci ilin müvafiq dövrünə nisbətən 3,2% artıb.
Dövlət Statistika Komitəsinin yaydığı məlumatda qeyd olunur ki, bu müddətdə ərzaq məhsullarının qiymətlərində 3,2%, qeyri-ərzaq mallarının qiymətlərində 3,9%, əhaliyə göstərilən ödənişli xidmətlərin qiymətlərində 2,6 % artım qeydə alınıb.
Rəsmi statistikaya əsasən, cari ilin may ayında aprel ayına nisbətən ərzaq məhsulları 1,3% ucuzlaşıb, əhaliyə göstərilən ödənişli xidmətlər 1,6% bahalaşıb, qeyri-ərzaq mallarının qiyməti isə sabit qalıb. Ümumilikdə, istehlak məhsullarının və xidmətlərin qiymətləri əvvəlki ayla müqayisədə eyni səviyyədə olub.
Xatırladaq ki, 2018-ci ilin yanvar-aprel aylarında istehlak məhsullarının və xidmətlərin qiymətləri 2017-ci ilin müvafiq dövrünə nisbətən 3,5%, o cümlədən ərzaq məhsullarının qiymətləri 3,7%, qeyri-ərzaq mallarının qiymətləri 4,1%, əhaliyə göstərilən ödənişli xidmətlərin qiymətləri 2,8% artıb.
Cari ilin aprel ayında mart ayına nisbətən istehlak məhsulları və xidmətləri 0,2%, o cümlədən ərzaq məhsulları 0,5% ucuzlaşıb, qeyri-ərzaq mallarının və əhaliyə göstərilən ödənişli xidmətlərin qiymətləri isə sabit qalıb.
İqtisadçı-ekspert Könül Nuriyeva “Bakı-Xəbər”ə açıqlamasında qeyd etdi ki, dövlət və Mərkəzi Bankın həyata keçirdiyi humanitar və fiskal siyasət nəticəsində inflyasiyanın səviyyəsi aşağı düşüb: “Uçot dərəcəsinin aşağı salınması da inflyasiyanın qeyd olunan səviyyəyə düşməsinə səbəb olur. Eyni zamanda, əhalinin nominal gəliri də artıb. Bununla yanaşı, məhsul və xidmətlərin qiymətində stabillik yaşanır. Əsasən kənd təsərrüfatı məhsullarında mövsümi amillərdən asılı olaraq qiymətində azalma qeydə alınır. Aqrar məhsulların satış qiymətində azalmanın yaşanması bazarda bolluğa səbəb olur. Bu da inflyasiyanın azalmasına təsir göstərən əsas amillərdən biridir”.
Həmsöhbətimiz onu da vurğuladı ki, inflyasiyanın 3,2 faizə düşməsi dövlətin bu sahədə apardığı siyasətin uğurlu nəticəsidir.
Günel CƏLİLOVA
