Aydın Hüseynov: “Reallıq ondan ibarətdir ki, Azərbaycan sənayesinin brendi olan SOCAR çox uğurla dünyada özünü tanıtmaqdadır”
Məlum olduğu kimi, Azərbaycan Dövlət Neft Şirkəti (SOCAR) yaxın aylarda Pakistana mayeləşdirilmiş təbii qaz tədarükünə başlayacaq. Bu barədə “Pakistan LNG Limited” operator şirkətindən məlumat verilib. Şirkətin verdiyi məlumatda qeyd olunur ki, SOCAR şirkətin bu məsələ ilə bağlı elan etdiyi tenderin qaliblərindən biri olub.
Mayeləşdirilmiş təbii qaz SOCAR tərəfindən iki hissədə tədarük olunacaq. 140 min kubmetr həcmdə olan hissələrdən birincisi oktyabrın 10-11-də, ikincisi 20-21-də tədarük ediləcək.
Qeyd edək ki, iyulun 26-da keçirilmiş tenderin qalibləri SOCAR-la yanaşı, “GUNVOR International”, “BB Energy”, “Trafigura Pte” şirkətləri olub.
Məlumat üçün qeyd edək ki, Azərbaycanla Pakistan arasında çox yaxın münasibətlər var. İki ölkə arasında bir sıra iqtisadi sahələrdə əlaqələr mövcuddur. Müdafiə, humanitar sahələrdə də əməkdaşlıq genişdir və Heydər Əliyev Fondu tərəfindən Pakistanda bir sıra layihələr həyata keçirilib. Azərbaycanda bir sıra Pakistan şirkətləri fəaliyyət göstərirlər. İqtisadi əməkdaşlığın genişləndirilməsi məqsədilə işgüzar dairələrin iştirakı ilə müxtəlif tədbirlər, biznes forumları keçirilir. Pakistandan Azərbaycana gələn turistlərin sayı ildən-ilə artır. O da məlumdur ki, Pakistan enerjiyə ehtiyacı olan ölkədir. Bu baxımdan SOCAR-ın yaxın aylarda Pakistana mayeləşdirilmiş təbii qaz tədarükünə başlayacağının əhəmiyyətini ekspertlər necə şərh edirlər?
Məsələyə münasibət bildirən millət vəkili Aydın Hüseynov buna müsbət prizmadan yanaşdı: “Azərbaycanla Pakistan arasında çox sıx siyasi əlaqələr var. Azərbaycan dövlətinin müstəqilliyini ilk tanıyan dövlətlərdən biri Pakistan olub. İki ölkə arasında çox sıx əlaqələr qurulub. Getdikcə bu siyasi əlaqələr iqtisadi əlaqələrin daha da genişlənməsinə öz təsirini göstərir. SOCAR-ın Pakistana mayeləşdirilmiş təbii qaz tədarükünə başlaması birinci növbədə şirkətin beynəlxalq nüfuzunun artması deməkdir. Reallıq ondan ibarətdir ki, Azərbaycan sənayesinin brendi olan SOCAR çox uğurla dünyada özünü tanıtmaqdadır. Nəzərə almaq lazımdır ki, Avropada, Gürcüstanda, Rusiyada SOCAR çox böyük layihələr həyata keçirir. Pakistanla da enerji sahəsində əlaqələrin qurulub genişləndirilməsi iqtisadi baxımdan hər iki tərəfə səmərə verəcək. Eyni zamanda, bu ölkə ilə bizim ticarət əlaqələrimizin daha da genişlənməsinə təkan verəcək. Ona görə də bu yöndə əlaqələrin genişləndirilməsini alqışlayıram. Hesab edirəm ki, bu bizim xeyrimizədir”.
Vidadi ORDAHALLI
