Rəsul Cahangirli: “Bu ölkədən fərqli olaraq, Azərbaycanda iqtisadiyyat hərtərəfli inkişaf edir”
Bu gün Cənubi Qafqazda ən acınacaqlı vəziyyətdə olan ölkə Ermənistandır. Ermənistanın işğalçı, təcavüzkar siyasəti nəticəsində regional və beynəlxalq miqyasda təcrid vəziyyətinə düşməsi bu ölkə daxilində mövcud olan ağır social-iqtisadi vəziyyəti daha da ağırlaşdırıb. Ermənistan ciddi sosial-iqtisadi və demoqrafik böhranla üz-üzə qalıb.
20 il hakimiyyətdə olan “Qarabağ klanı”nın, kriminal rejimin qəbul etdiyi qərarlar vətəndaşların geniş etirazına səbəb olmaqla yanaşı, ölkədə sosial vəziyyəti daha da pisləşdirib. Bu ilin mayında ölkədə “məxməri inqilab” dalğasında hakimiyyətə gələn yeni qüvvələr də yaranmış bu çətinlikləri aradan qaldıra bilmir. Yeni hakimiyyət manevrləri davam etdirməyə çalışsa da, Ermənistan faktiki olaraq iflasın astanasındadır. Eyni zamanda, Ermənistanın sosial problemləri aradan qaldırmaq üçün kifayət qədər güc və potensiala malik olmaması nəticəsində ortaya çıxan problemlər hakimiyyətlə xalq arasında qarşıdurmaya zəmin yaradır. Hazırda bütün sahələrdə iflasa uğrayan Ermənistanın dövlət borcu da rekord səviyyəyə çatıb. Ermənistan Mərkəzi Bankının hesabatına əsasən, ölkənin xarici borcu gəlirləri 60 faiz üstələyir. Bu baxımdan yeni hökumət yaranan problemləri həll etmək iqtidarında deyil. Çünki Ermənistan tamamilə iflasa uğrayıb və borc içində olan ölkənin rəhbərliyi nə edəcəyini bilmir. Son rəsmi məlumatlara əsasən, ölkənin ümumi borcu 7 milyard dolları ötüb.
Ancaq bundan fərqli olaraq, Azərbaycanda vəziyyət tam bunun əksinədir. Ölkə iqtisadiyyatı dinamik inkişaf edir. Bu da öz növbəsində uğurlu sosial siyasət yeritməyə imkan verir. Bu baxımdan Ermənistanda və Azərbaycanda hazırkı sosial siyasətlərin müqayisəsi ortaya hansı mənzərəni çıxarır? Sosial siyasət kimdə nə səviyyədədir?
Məsələyə münasibət bildirən ekspert Rəsul Cahangirlinin də sözlərinə görə, Ermənistanda sosial siyasət bərbad vəziyyətdədir: “Məsələ ondadır ki, Ermənistan iqtisadiyyatı ötən 20 il ərzində yerində sayıb. Əvvəlki hakimiyyət işğalçılıq siyasəti apardığı üçün regionda bütün layihələrdən kənarda qalıb. Bu da öz növbəsində Ermənistanı iqtisadi gəlirlərdən məhrum edib. Hazırkı Paşinyan hökuməti də əvvəlki rejimin siyasətin davam etdirsə, vəziyyət dəyişməyəcək. Nəzərə almaq lazımdır ki, Ermənistandaki ağır vəziyyət üzündən əhali kütləvi şəkildə ölkəni tərk edib. Bunu rəsmi səviyyədə də etiraf edirlər. Paşinyan nə qədər islahat aparsa da, işğalçı siyasətə son qoymasa, ölkə ağır iqtisadi, sosial, demoqrafik böhrandan çıxa bilməyəcək. İqtisadiyyat acınacaqlı durumda olanda, təbii ki, normal sosial siyasətdən söhbət gedə bilməz. Ermənistandan fərqli olaraq, Azərbaycanda iqtisadiyyat hərtərəfli inkişaf edir. Müasir dövrün tələblərinə uyğun olaraq islahatlar aparılır. Neft gəlirləri qeyri-neft sektorunun inkişafına yönəldilir. Əhalinin aztəminatlı təbəqəsinə ünvanlı sosial yardım verilir. Ölkədə ictimai əhəmiyyətli bütün sosial infrastruktur dövlət vəsaiti hesabına yenidən qurulub. Məktəblər, xəstəxanalar tikilib, yollar yenidən qurularaq təzələnib. O baxımdan iki ölkə arasında bununla bağlı böyük fərq var”.
Vidadi ORDAHALLI
