Müslüm İbrahimov: “Son illər energetika və nəqliyyat sektoru sahəsində bir sıra böyük layihələrə imza atılıb”
“İqtisadiyyatımız inkişaf edir. Bu il də yaxşı nəticələr olacaq. Gələn il daha yaxşı nəticələr olacaq. Artıq ilkin proqnozlar verilib”. Xəbər verildiyi kimi, bu fikirləri Prezident İlham Əliyev Qaradağ rayonunun Lökbatan qəsəbəsində Qarabağ, Böyük Vətən müharibələri, Çernobıl əlillərinə və şəhid ailələrinə mənzillərin və avtomobillərin verilməsi mərasimində söyləyib.
Dövlət başçısı vurğulayıb ki, gələn il sürətli inkişaf ili olacaq: “Maliyyə imkanlarımız daha da genişlənəcək və ölkə qarşısında duran əsas vəzifələrin, infrastruktur layihələrin, eyni zamanda və ilk növbədə, sosial məsələlərin həlli üçün biz bu vəsaitdən istifadə edib sizin problemlərinizi həll edəcəyik”.
Reallıq ondan ibarətdir ki, artan neft gəlirlərinin bazar iqtisadiyyatının əsas tələb və şərtlərindən olan qeyri-neft sektorunun formalaşdırılmasına yönəldilməsi, özəl bölmənin təkmilləşdirilməsi sürətli iqtisadi inkişaf dinamikası əldə etməyə şərait yaradır. İqtisadi şaxələndirmənin, qeyri-neft sektorunun formalaşdırılması istiqamətində həyata keçirilən əhatəli tədbirlər öz nəticəsini verir. Bunun nəticəsidir ki, Dünya Bankı və Avropa Yenidənqurma və İnkişaf Bankı Azərbaycanda gedən prosesləri yüksək dəyərləndirirlər. İqtisadi inkişaf sayəsində Azərbaycan öz daxili tələbatını daha böyük həcmdə yerli istehsal hesabına təmin edir. Digər tərəfdən, vətəndaşların alıcılıq qabiliyyəti artır. Makroiqtisadi vəziyyətin yaxşılaşdırılması, manatın məzənnəsinin sabit səviyyədə saxlanması üçün sadalananlar çox mühüm amillərdəndir.
Cari ilin altı ayında 67 min iş yeri açılıb ki, onlardan 58 mini daimidir. Ölkə iqtisadiyyatına 6 milyard dollar sərmayə qoyulub. İnflyasiya cəmi 3 faizdir. Əhalinin pul gəlirləri 9,3 faiz artıb. İnflyasiyanın aşağı səviyyədə olması onu göstərir ki, ölkədə makroiqtisadi sabitlik tam təmin edilir.
Bütün bu deyilənlərin fonunda, ölkə başçısı gələn ilin sürətli inkişaf ili olacağını deyərkən nəyə əsaslanır?
Məsələyə münasibət bildirən iqtisad elmləri doktoru Müslüm İbrahimovun sözlərinə görə, sürətli iqtisadi inkişafı şərtləndirəcək bir sıra faktorlar var: “Son illər energetika və nəqliyyat sektoru sahəsində bir sıra böyük layihələrə imza atılıb. Bu o deməkdir ki, Azərbaycan neft və qazın istehsalında, ixracında öz rolunu daha da artıracaq. Nəqliyyat layihələrinin işə düşməsi sayəsində Azərbaycanın tranzit gəlirləri artacaq. Digər tərəfdən, biz görürük ki, artıq iqtisadiyyatın qeyri-neft sektorunda artım var. Sözügedən sahənin normativ-hüquqi bazası var. İnfrastruktur baxımından sözügedən sahənin inkişafı üçün kifayət qədər iş aparılıb. Eyni zamanda onu da qeyd etmək lazımdır ki, son bir-iki ildə milli iqtisadiyyatın inkişafına dair Strateji Yol Xəritəsi qəbul olunub. Onun monitorinqi göstərir ki, artıq müvafiq strukturlar Strateji Yol Xəritəsinin reallaşmasında lazımi işləri aparırlar. Artıq burada nəticələr də əldə olunur. Ümumiyyətlə, gələn il dünya iqtisadiyyatında baş verəcək tendensiyalara baxanda inkişaf gözlənir. O mənada ki, neft və qazın qiymətində artım olacaq. Bu da Azərbaycanın gəlirlərini artıracaq. Bundan əlavə, texniki məhsul olan pambıq və barama istehsalının artması nəticəsində gəlirlər artacaq. Paralel olaraq emal infrastrukturunun formalaşması da onu göstərir ki, biz bu sahələrdən də gəlir əldə edəcəyik. Bütün bu gəlirlərin sayəsində Azərbaycanda alıcılıq qabiliyyəti artacaq. Yerli şirkətlərin gəlir əldə edib rəqabət qabiliyyətini daha da artırması nəticəsində ixrac imkanlarını artıracaqlar. Bütün bunlar onu deməyə əsas verir ki, gələn il həqiqətən sürətli iqtisadi inkişaf olacaq və maliyyə gəlirləri artacaq”.
Vidadi ORDAHALLI
