Azər Allahverənov: “Çünki şərait bunu tələb edirdi”
Xəbər verildiyi kimi, şəhərətrafı və qəsəbələrarası marşrutlar üzrə sərnişindaşımanın yeni tarifləri açıqlanıb. Bakı Nəqliyyat Agentliyindən verilən məlumata görə, 125 və 199 nömrəli şəhərətrafı marşrutların nağdsız ödəniş sistemi ilə fəaliyyət göstərməsi nəzərə alınaraq, gediş haqqı tarifi 0,35 manat səviyyəsində müəyyən edilib.
"28 May” metrostansiyası - Hava Limanı istiqamətində fəaliyyət göstərən H1 nömrəli ekspress marşrutun tarifində dəyişiklik edilməyib. Həmin marşrut üzrə gediş haqqı tarifi 1,30 manat təşkil edir.
Şəhərətrafı və qəsəbələrarası marşrutların başlanğıc və son dayanacaqları arasındakı məsafədən asılı olmayaraq sərnişinin bir istiqamət üzrə ödəyəcəyi gediş haqqı məbləği (gedəcəyi məsafədən asılı olaraq) tarif cədvəlinə uyğun olaraq müəyyən edilir. Cədvəldən məlum olur ki, şəhərətrafı və qəsəbələrarası marşrutlar üzrə sərnişindaşımanın qiyməti məsafədən asılı olaraq minimum 30, maksimum 90 qəpik olacaq.
Ümumilikdə sözügedən tarifləri ekspertlər necə dəyərləndirir?
Məsələyə münasibət bildirən nəqliyyat sahəsi üzrə ekspert Azər Allahverənov buna bir neçə rakursdan yanaşır: “Hesab edirəm ki, bu gözlənilən addım idi. Çünki 2-3 il ərzində yanacağın qiyməti bir neçə dəfə artmışdı və şübhəsiz ki, yanacağın artması istər-istəməz nəqliyyat vasitələrinin də göstərdiyi xidmətə öz təsirini göstərməli idi. Sadəcə olaraq, yanacağın qiymətinin artımı devalvasiya dövrünə düşmüşdü. Bir çox xidmətlərin, eləcə də ərzağın qiymətinin qalxması müşahidə olunurdu. Hökumət ictimai nəqliyyatda qiymətin qalxmaması üçün əlindən gələni etdi və demək olar ki, ilyarım-iki il qiymətlər olduğu kimi qaldı. Bildiyim qədərilə, metropoliten uzun müddətdir ki, rentabelli işləmir və dövlətin verdiyi subsidiyalar hesabına qalır. Şübhəsiz ki, metronun da qiymətinin artımı ilə bağlı bir neçə dəfə fikir söylənmişdi. Lakin son olaraq Tarif Şurası o qərarı verməmişdi. İndi görünür, maliyyə bazarında müəyyən sabitliyin hökm sürməsi, inflyasiya, devalvasiya, qiymət artımı təhlükəsi olmadığından artıq Tarif Şurası bu addımı atdı. Bu addım gözlənilən idi, çünki gedən müzakirələr fonunda bir neçə dəfə qiymət artımı məsələsi müzakirə olunmuşdu. Nəzərə almaq lazımdır ki, Tarif Şurası bu qərarı verməyə məcbur idi. Çünki şərait bunu tələb edirdi. Hesab edirəm ki, bunun sayəsində nəqliyyatda olan neqativ hallar, köhnə avtobuslar, istismara yararsız avtobusların xəttə buraxılması kimi hallar baş verməyəcək. Qiymət artımı infrastukturun yaxşılaşmasına təsir edəcək”.
Vidadi ORDAHALLI
