Rəsul Cahangirli: “Hesab edirəm ki, belə bir qərarın verilməsi...”
Tarif (qiymət) Şurasının iyulun 30-da təsdiqlədiyi yeni tariflər ictimai nəqliyyatda sərnişindaşıma xidməti üzrə artan xərclərin qarşılanmasına, avtobus parkının yenilənməsinə, nəqliyyat vasitələrinin saz vəziyyətdə saxlanmasına və son nəticədə isə bu sahədə xidmət səviyyəsinin yüksəldilməsinə müsbət təsir göstərəcək.
Bu barədə Bakı Nəqliyyat Agentliyinin (BNA) yaydığı məlumatda qeyd olunub.
Sözügedən məsələ ilə bağlı qurumdan bildiriblər ki, bu səbəbdən də bu sektorda fəaliyyət göstərən hüquqi və fiziki şəxslər təhlükəsiz və keyfiyyətli sərnişindaşıma işinin təşkilinə daha ciddi və məsuliyyətlə yanaşmalıdır. Eyni zamanda, bütün müntəzəm marşrut xətləri üzrə daşıyıcılar nağdsız ödəniş sisteminə keçidi də sürətləndirməlidir: "Vətəndaşa rahat və təhlükəsiz nəqliyyat xidmətlərinin göstərilməsini hər zaman qarşısına prioritet məqsəd qoyan Bakı Nəqliyyat Agentliyi bir daha xəbərdarlıq edir ki, işinə laqeyd və məsuliyyətsiz yanaşan daşıyıcılar marşrut şəbəkəsindən kənarlaşdırılacaq. Bütün müntəzəm marşrut xətlərinin müsabiqəyə çıxarılması ilə bağlı qərarın qəbulu da məhz bu məqsədə xidmət edir”.
Sərnişindaşımada vacib olan məqamlardan biri də onlara göstərilən xidmətin səviyyəsini qaldırmaqdır. Çünki qiymətlərin artırılması nəticə etibari ilə göstərilən xidmətin səviyyəsinin yüksəlməsinə gətirib çıxarmalıdır.
Maraqlıdır, sözügedən məsələ ilə bağlı ekspertlərin gözləntiləri nədən ibarətdir?
Məsələyə münasibət bildirən ekspert Rəsul Cahangirlinin sözlərinə görə, ictimai nəqliyyatda gedişhaqlarının artırılması sərnişinlərə göstərilən xidmətin səviyyəsinin yüksəlməsinə gətirib çıxaracaq: “Məsələ ondadır ki, tariflər xidmətin səviyyəsinə uyğun müəyyən edilir. Bir sıra mərşrut xətlərində avtobusların sayı az olduğundan, aradaki interval böyüyürdü. Bu da haqlı olaraq sərnişinlərin narazılığına səbəb olurdu. Hesab edirəm ki, məlum qiymət artımından sonra məsələ öz həllini tapacaq. Bununla yanaşı, sərnişindaşıma ilə məşğul olan sahibkarlar bunun sayəsində yeni avtobuslar alacaqlar. Ona görə də qiymət artımı ilə bağlı sahibkarların arqumenti başadüşüləndir. Çünki avtobusda gediş haqları son 11 ildə sabit qalıb. Təbii ki, o dövrlə müqayisədə sərnişin daşınmasının maya dəyərinin strukturu, eləcə də keyfiyyəti xeyli dəyişib və artıb. Bakıda yeni modern avtobuslar xətlərə buraxılıb. Bu baxımdan normalda bahalaşmanı əsaslandırmaq üçün xeyli ciddi əsaslar var və bunu danmaq olmaz. Məsələn, “Bakubus” avtobuslarına xidmət adi avtobuslara xidmətdən çox bahadır. Birincisi, sürücülərə yüksək maaş verilir, 8 saatlıq iş rejimində çalışılır, məzuniyyət hüququ tanınır və s. Bütün bunlar xidmətin maya dəyərini artırır. Ona görə də hesab edirəm ki, belə bir qərarın verilməsi sərnişindaşımada xidmətin səviyyəsinə müsbət təsir göstərəcək”.
Vidadi ORDAHALLI
