Rüfət Quliyev: “Qiymət dəyişikliyi nəqliyyat infrastrukturunun daha da təkmilləşdirilməsi istiqamətində görülən işlərin sürətləndirilməsinə müsbət təsir göstərəcək” Azər Badamov: “Gediş haqlarından gələn əlavə vəsait yeni metro stansiyalarının tikintisinin sürətləndirilməsinə, müasir avtobusların alınmasına, xidmətlərin səviyyəsinin yüksəlməsinə xidmət edəcək"
Məlum olduğu kimi, Tarif (qiymət) Şurasının növbəti iclası keçirilib.
Tarif (qiymət) Şurasının iclasında müraciətlərə baxılıb və metro nəqliyyatında sərnişindaşıma xidmətinin tarifi 1 gediş üçün 30 qəpik, Bakı şəhərində, eləcə də digər şəhər və rayonlarda sərnişindaşıma xidməti tarifinin yuxarı həddi müntəzəm şəhərdaxili avtobus marşrutları üzrə 1 gediş üçün 30 qəpik, şəhərətrafı və qəsəbələrarası avtobus marşrutları üzrə məsafədən asılı olaraq 1 gediş üçün 30-90 qəpik, müntəzəm şəhərlərarası avtobus marşrutları üzrə 1 kilometr üçün 2,4 qəpik təsdiq edilib.
Qeyd edək ki, yeni tariflər bu gündən qüvvəyə minəcək.
Tarif Şurasının məlum qərarına fikir bildirən Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Rüfət Quliyev “Bakı-Xəbər”ə açıqlamasında qeyd etdi ki, qiymət artımı qaçılmaz idi: “Tarif Şurasının avtobus marşrutlarında və metroda sərnişindaşıma xidmətləri tariflərini artırması əhali arasında populyar olmasa da, qaçılmaz qərardır. Bunu başa düşmək lazımdır. Qiymət dəyişikliyi nəqliyyat infrastrukturunun daha da təkmilləşdirilməsi istiqamətində görülən işlərin sürətləndirilməsinə müsbət təsir göstərəcək.
Nəzərə almaq lazımdır ki, ölkədə ictimai nəqliyyatda gediş haqqı uzun müddət arayla qaldırılıb. Hansı ölkədə məsələn, 10 il ərzində nəqliyyatda gediş haqqı qiyməti artırılmayıb? Bir tərəfdən nəzərə almaq lazımdır ki, dövlət bu sahələrə kifayət qədər böyük yatırımlar qoyur. Yeni metro stansiyaları açılır, mövcud stansiyalar təmir olunur, yeni avtobuslar və taksilər alınır. Təbii ki, bu sahələrə çəkilən xərclər ildən-ilə artır. Buna baxmayaraq, dövlət nə qədər imkan varsa, ictimai nəqliyyatda qiymət artımına getmir, dotasiyalar ayırır, köməklik göstərir. Qiymət artımı 8-10 ildən bir baş verir”.
Millət vəkili onu da vurğuladı ki, enerji daşıyıcılarının qiyməti və sərnişindaşıma sahəsində çalışan işçilərin də əməkhaqqı artıb. Təbii ki, bu da əlavə xərclər deməkdir: “Rusiya, Qazaxıstan və digər MDB, region ölkələri ilə müqayisə etsək, görərik ki, bizdə ictimai nəqliyyatda gediş haqqı yenə də aşağıdır. Onu da bildirim ki, ictimai nəqliyyatda gediş haqqının bahalaşması səbəblərindən biri də dünyada baş verən proseslərlə bağlıdır. Dünyada hər şeyin qiyməti qalxır, istənilən valyutanın məzənnəsi aşağı düşür”.
Millət vəkili Azər Badamovun sözlərinə görə, ictimai nəqliyyatda xidmətlərin müasirləşdirilməsi üçün hər il dövlət büdcəsindən kifayət qədər maliyyə vəsaiti ayrılır. Qiymətlərin ucuz olması xidmətlərin müasirləşdirilməsində çətinlik yaradır, bu sahəyə dövlət büdcəsindən ayrılan dotasiyanın da artmasına gətirib çıxarır. Vəziyyət də həmişə belə davam edə bilməz. Dünyanın hər yerində xidmət sahələri həm xidmət göstərir, həm də pul qazanırlar. Amma bizdə isə daim dövlətin himayəsindədir. Düşünürəm ki, bunun üçün qiymətlərdə müəyyən artıma zərurət yaranmışdı. Düşünürəm ki, gediş haqlarından gələn əlavə vəsait yeni metro stansiyalarının tikintisinin sürətləndirilməsinə, müasir avtobusların alınmasına, qeyd olunan xidmət sahələrində iş fəaliyyətinin yaxşılaşdırılmasına, xidmətlərin səviyyəsinin yüksəlməsinə xidmət edəcək".
Həmsöhbətimiz onu da vurğuladı ki, dünya ölkələri ilə müqayisədə Azərbaycanda ictimai nəqliyyat və metronun qiyməti ən aşağı səviyyədədir: “10 ilə yaxındır ki, ölkəmizdə nəqliyyat xidmətlərinə görə qiymətlər dəyişdirilməmiş qalır. Lakin bu müddət ərzində nəqliyyat infrastrukturunun yenidən qurulması istiqamətində əsaslı tədbirlər həyata keçirilib. Yəni ictimai nəqliyyat və metro infrastrukturu müasir standartlara uyğun yenidən və əsaslı şəkildə qurulub”.
Günel CƏLİLOVA
