Fikrət Yusifov: “Əldə olunan bu uğurların kökündə ölkə Prezidentinin bilavasitə təşəbbüsü və təşkilatçılığı ilə formalaşdırılmış əlverişli biznes mühitinin rolu əvəzedilməzdir”
"Standard & Poor's" beynəlxalq reytinq agentliyinin hesabatında Azərbaycan iqtisadiyyatında növbəti dövrdə 3 faiz iqtisadi artım proqnozlaşdırılır. Agentlik hesab edir ki, Azərbaycan iqtisadiyyatı 2018-ci ildən 2021-ci ilə qədər olan dövr ərzində orta hesabla 3 faiz artacaq.
“Fitch Ratings” beynəlxalq reytinq agentliyi isə hesab edir ki, Azərbaycanda mövcud olan geniş sosial və siyasi sabitlik davam edəcək. "Fitch Ratings" beynəlxalq reytinq agentliyi xarici valyutada emitentin defoltunun uzunmüddətli reytinqini sabit proqnozlu “BB+” səviyyəsində təsdiq edib. Agentlik proqnozlaşdırır ki, Azərbaycan iqtisadiyyatı bu il 2 faiz artacaq. Agentliyin rəyinə görə, bu, neftin yüksək qiymətləri, qaz hasilatı, eləcə də kənd təsərrüfatı və turizmin inkişafı hesabına olacaq.
Agentlik analitiklərinin məlumatına görə, Azərbaycanda makroiqtisadi sabitlik inflyasiyanın 3,2 faizə düşməsi fonunda yüksəlir. Bir sözlə, "Fitch Ratings" beynəlxalq reytinq agentliyinin reytinqində Azərbaycanda sosial, siyasi stabilliyin uzunmüddətli dövrdə qorunub saxlanacağı bildirilir. O baxımdan "Standard & Poor's" tərəfindən yüksək iqtisadi artım tempinin proqnozlaşdırılması birmənalı şəkildə məhz Azərbaycanda aparılan islahatların iqtisadi artıma birbaşa təsirindən xəbər verir. Ötən il iqtisadi stabilliyin əldə edilməsi, bu ilin ilk yarısında Azərbaycanın bütün makroiqtisadi göstəricilərində artımın qeydə alınması, ümumdaxili məhsuldakı artım, qeyri-neft ÜDM-dəki artım tempi, xarici ticarət balansındakı 4,5 milyard dollarlıq müsbət saldo, strateji valyuta ehtiyatlarımızın 44 milyard dollara çatması nəticə etibarilə ölkəyə daxil olan valyutanın həcminin artmasından xəbər verir. Bu arada Rusiyanın nüfuzlu iqtisadi təhlil mərkəzinin də Azərbaycanla bağlı proqnozu oxşardır. Ümumilikdə, 3 mərkəzin Azərbaycanla bağlı səsləndirdiyi proqnozlar üst-üstə düşür. Bütövlükdə, bu nəyin göstəricisidir və ekspertlər buna necə yanaşırlar?
Məsələyə münasibət bildirən iqtisad elmləri doktoru, professor Fikrət Yusifovun sözlərinə görə, bütün bunlar Azərbaycanda aparılan uğurlu iqtisadi siyasətin nəticəsidir: “2016-cı ilin dünya iqtisadi böhranının yaşatdığı çətinliklərdən sonra hökumətin ölkə iqtisadiyyatının stabilləşdirilməsi istiqamətində atdığı addımlar öz nəticələrini verməyə başladı. Belə ki, 2017-ci il stabilləşmə ili kimi yaddaşlarda qaldı. Həmən ilin sonlarına yaxın və 2018-ci ilin əvvəllərində ölkə Prezidenti cənab İlham Əliyev 2018-ci ilin yüksəliş ili olacağını bir neçə dəfə bəyan etdi. Belə də oldu. 2018-ci ilin birinci yarısı artıq geridədir və biz real sektorda çox yaxşı nəticələr əldə edildiyini görürük. İqtisadi dirçəliş səviyyəmiz bizə büdcəmizi dəyişərək onun gəlir və xərclərini artıra bilmək imkanları verdi. Büdcədən əlavə xərclərin həyata keçirilməsi, nəticə etibarilə, iqtisadiyyatın inkişaf sürətini bir qədər də artırmağa şərait yaradır. Bu gün ölkənin bütün bölgələrində tikinti-quraşdırma işləri görülür. Tikinti iqtisadi dirçəlişin ən əsas göstəricilərindən biridir.
Ötən dövr ərzində real sektorda ümumi artım 2,0 faiz təşkil etsə də, onun aparıcı sahəsi hesab olunan qeyri-neft sənayesi 8,8 faiz, kənd təsərrüfatı 7,6 faiz arta bildi. Bunlar yaxşı göstəricilərdir. Hesab edirəm ki, ilin sonuna doğru bu göstəricilər bir qədər də yaxşılaşacaq. Hesabat dövründə ölkənin valyuta ehtiyatları 44,3 milyard dollara çatdı. Neftin qiymətlərinin indiki səviyyəsində bu ehtiyatların ilin sonuna doğru 50 milyard dollara yaxınlaşacağı ehtimal olunur. Bu, Azərbaycanın maliyyə dayaqlarının daha da möhkəmlənməsi, milli valyutanın isə tam sabit qalması demək olacaq. Yarım ildə əldə olunan bu uğurların kökündə ölkə Prezidentinin bilavasitə təşəbbüsü və təşkilatçılığı ilə formalaşdırılmış əlverişli biznes mühitinin rolu əvəzedilməzdir. Real sektorda əldə olunmuş uğurlar bu sahəyə yatırılan investisiyalardan bilavasitə asılıdır. İstənilən investor isə ölkədə investisiya mühiti normal olduqda addım atır. Azərbaycanda bu gün biznes mühiti olduqca əlverişlidir. İnvestisiyaların və ixracın təşviqi ilə bağlı qaydaların tətbiq edilməsi isə bu mühiti daha maraqlı edir. Bütün bunlar Azərbaycanla bağlı proqnozların üst-üstə düşməsinə gətirib çıxarır”.
Vidadi ORDAHALLI
