Müslüm İbrahimov: “Avropa ölkələrində tək Azərbaycanın üzüm şərabı deyil, eyni zamanda nar şərabı da məşhurdur və tələbat da yüksəkdir”
Qeyri-neft ixracının dəstəklənməsi fonunda xarici bazara tanıdılması nəzərdə tutulan məhsul növlərindən biri şərabçılıqdır. Azərbaycan hökumətinin qarşısında duran vacib məsələlərdən biri bu sahədə ixracın artırılması, həmçinin, ixrac coğrafiyasının genişləndirilməsidir.
Şərabçılığın inkişafı məqsədilə bir sıra mühum işlər görülməkdə davam edir. Xatırladaq ki, bu yaxınlarda Prezident İlham Əliyev "2018–2025-ci illərdə Azərbaycan Respublikasında şərabçılığın inkişafına dair Dövlət Proqramı”nın təsdiq edilməsi haqqında” Sərəncam imzalayıb. Dövlət Proqramının məqsədi şərab və şərabçılıq məhsullarına tələbatın ortamüddətli perspektivdə yerli ehtiyac və ixracat imkanları nəzərə alınmaqla ödənilməsi, şərab istehsalı müəssisələrinin fəaliyyətinin genişləndirilməsi və müasir texnologiyalar əsasında qurulması, xammal təminatının yaxşılaşdırılması, şərabçılıq məhsullarının ixracının artırılması və kənd əhalisinin məşğulluq səviyyəsinin yüksəldilməsi üçün ölkədə üzümçülüyün və şərabçılığın inkişafını stimullaşdırmaqdan ibarətdir. Görülən işlər sayəsində Azərbaycan şərab ixracını artırıb.
Azərbaycan Şərab İstehsalçıları və İxracatçıları Assosiasiyasının rəhbəri Elçin Mədətov media nümayəndələrinə açıqlamasında qeyd edib ki, 2018-ci ilin birinci yarısında Azərbaycan şərab məhsullarının ixracı 4 milyon dolları keçib, bu da 2017-ci ilin eyni dövrünün göstəricisindən 80 faiz çoxdur. 2018-ci ilin sonuna biz şərab ixracının 100 faizlik artımını gözləyirik.
Ötən illə müqayisədə şərab ixracında 80 faiz artım olması barədə fikir bildirən iqtisad elmlər doktoru Müslüm İbrahimov "Bakı-Xəbər"ə açıqlamasında qeyd etdi ki, şərabçılığın inkişafı ilə bağlı Prezident İlham Əliyev tərəfindən sərəncam imzalanıb. Bu sahədə önəmli işlərin aparılması ilə bağlı lazımi tapşırıqlar verilib: “Bu sahənin inkişafı üçün həm daxili, həm də xarici bazarda marketinq tədqiqatları aparıldı. Görülən işlər sayəsində şərab istehsalı artdı. Danılmaz faktdır ki, üzüm istehsalı artıb. Bu, şərabçılıq sahəsi üçün xammalın artırılmasına səbəb olub”.
Həmsöhbətimizin sözlərinə görə, şərab ixracının artırılmasında önəmli işlər aparılır: “Xarici ölkələrdə ticarət evlərinin açılması şərabçılığın ixracına öz təsirini göstərdi. Bir sıra Avropa ölkələrində açılan ticarət evlərində Azərbaycana məxsus şərablar mövcuddur. Eyni zamanda, ölkəmizə gələn xarici turistlər Azərbaycan şərabı ilə tanış olandan sonra həmin məhsuldan öz ölkələrinə də alıb aparırlar”.
M.İbrahimov onu da vurğuladı ki, Azərbaycan şərabının şöhrəti artıq dünya ölkələrində yayılır: “Məlumat üçün bildirim ki, müxtəlif növ şərabın istehsal olunması və onların xaricə ixracı olduqca əhəmiyyətlidir. Avropa ölkələrində tək Azərbaycanın üzüm şərabı deyil, eyni zamanda nar şərabı da məşhurdur və tələbat da yüksəkdir”.
İqtisadçının fikrincə, yaxın vaxtlarda şərab ixracında 100 faizlik artım qeydə alınacaq.
Günel CƏLİLOVA
