Rəsul Cahangirli: “Azərbaycanın sənaye parkları və qeyri-neft sektoruna dair digər layihələri tam işə düşdükdən sonra ölkədəki iqtisadi mənzərə əhəmiyyətli şəkildə dəyişəcək”
Azərbaycanda mövcud olan geniş sosial və siyasi sabitlik davam edəcək. Məlum olduğu kimi, bu proqnoz "Fitch Ratings" Beynəlxalq Reytinq Agentliyi tərəfindən təqdim edilib. Belə ki, "Fitch Ratings" Beynəlxalq Reytinq Agentliyi xarici valyutada emitentin defoltunun uzunmüddətli reytinqini sabit proqnozlu “BB+” səviyyəsində təsdiq edib.
Agentlik proqnozlaşdırır ki, Azərbaycan iqtisadiyyatı bu il 2 faiz artacaq. Agentliyin rəyinə görə, bu, neftin yüksək qiymətləri, qaz hasilatı, eləcə də kənd təsərrüfatı və turizmin inkişafı hesabına olacaq.
Agentlik analitiklərinin məlumatına görə, Azərbaycanda makroiqtisadi sabitlik inflyasiyanın 3,2 faizə düşməsi fonunda yüksəlir. Bunun səbəblərindən biri kimi manatın sabit məzənnəsi qeyd edilib.
Həmçinin, bank sektorunda dollarlaşma səviyyəsinin azaldığı qeyd edilir. Depozitlər üzrə dollarlaşmanın səviyyəsi 67 faizdən 63 faizə, kreditlər üzrə isə dollarlaşmanın səviyyəsi 41 faizdən 39 faizə düşüb.
Daha sonra hesabatda qeyd edilir ki, neftin yüksək qiymətləri, “Cənub Qaz Dəhlizi” layihəsinin reallaşması “Şahdəniz” qaz-kondensat yatağının hazırlanmasının ikinci mərhələsi çərçivəsində hasil edilən karbohidrogen ehtiyatlarının ixracatının artmasına təkan verəcək: “Daxili balansın profisitinin artımı Dövlət Neft Fondunun aktivlərinin və beynəlxalq rezervlərin həcmini bərpa etməyə kömək edəcək”.
Diqqətçəkən məqamlardan biri də ondan ibarətdir ki, agentlik bu il Azərbaycanda gözlənilən 2 faizlik iqtisadi artımın təkcə neft və qaz hesabına olmayacağını bəyan edib. Qeyd olunub ki, iqtisadi artım kənd təsərrüfatı və turizmin inkişafı hesabına olacaq. Bu baxımdan sözügedən məqamı ekspertlər necə dəyərləndirirlər?
Məsələyə münasibət bildirən ekspert Rəsul Cahangirlinin sözlərinə görə, proqnozda səslənən fikirlər reallığı əks etdirir: “Məsələ ondadır ki, 2016-cı ilin əvvəllərindən Azərbaycan iqtisadiyyatında aparılan sistemli islahatlar artıq öz bəhrəsini verir. Çünki sözügedən islahatların fəlsəfəsi ölkənin qeyri-neft sektorunun inkişafına nail olmaq, neftdən asılılığı minimum səviyyəyə endirməkdir. Məlum olduğu kimi, ölkə iqtisadiyyatının inkişafına dair Strateji Yol Xəritəsi qəbul olunub. Sözügedən sənəddə iqtisadiyyatın ayrı-ayrı sahələrinin inkişafına dair proqramlar var. Həmin proqramlardan irəli gələn prinsiplərin həyata keçirilməsi ilə bağlı işlər görülür. Bunun nəticəsidir ki, əvvəlki illərlə müqayisədə həm kənd təsərrüfatı məhsullarının istehsalı, həm də ixracı artır. Artım tendensiyası bundan sonra da davam edəcək. Ən azından, işlərin gedişi onu göstərir. Digər tərəfdən, ilbəil Azərbaycana turist axını artır. Xüsusən də ölkədə keçirilən bir sıra beynəlxalq səviyyəli yarışmalardan sonra bu tendensiya bir az da güclənib. Turizmdən gələn gəlirlərin yaxın illərdə iqtisadi artımda daha ciddi çəkiyə malik olacağı gözlənir. Bir məqamı qeyd edim ki, Azərbaycanın sənaye parkları və qeyri-neft sektoruna dair digər layihələri tam işə düşdükdən sonra ölkədəki iqtisadi mənzərə əhəmiyyətli şəkildə dəyişəcək”.
Vidadi ORDAHALLI
