Zakir Əhmədov: “Hesab edirəm ki, SOCAR-ın digər sahələrdə olduğu kimi, bu yöndə də fəaliyyəti uğurludur”
SOCAR İon-Adriatik Qaz Kəməri (IAP) layihəsi üçün operator yaratmaq şərtlərini açıqlayıb. Məlum olub ki, Azərbaycan qazının Avropaya tədarükü üçün nəzərdə tutulan şirkət 2018-ci ilin sonuna qədər yaradılacaq. Bu barədə SOCAR-ın Balkan rəhbəri Murad Heydərov mətbuata açıqlamasında bildirib.
Daha əvvəl şirkətin yaradılması prosesinin 2018-ci ilin sentyabrına qədər başa çatdırılması planlaşdırıldığını xatırladıb: “Bu planlar sentyabrdan sonra daha tez həyata keçirilə bilər”.
SOCAR-ın Balkan rəhbəri IAP-ın həyata keçirilməsi prosesinin normal getdiyini qeyd edib.
O deyib ki, SOCAR layihədə iştirak etmir, lakin texniki məsləhətçi kimi çıxış edir, iştirakçılarla əməkdaşlıq edir və onlara köməklik göstərir: “Bununla bağlı şirkətin yaradılması layihənin inkişafında çox böyük addım olacaq”.
Qeyd edək ki, 2007-ci ildə Xorvatiya, Monteneqro və Albaniya Trans-Adriatik Boru Kəmərinə (TAP) birləşdirilməsi ehtimal edilən IAP üzrə bəyannamə imzalayıblar. Daha sonra Bakıda “Cənub Qaz Dəhlizi” Məsləhət Şurasının dördüncü iclası çərçivəsində bununla bağlı sənəd imzalanıb. IAP vasitəsilə Azərbaycan qazı Cənub-Şərqi Avropada bir neçə dövlətə veriləcək. 516 kilometr uzunluğunda olacaq boru kəməri Albaniya, Çernoqoriya, Bosniya və Herseqovinadan keçəcək və Xorvatiyada başa çatacaq. Boru kəməri ildə 5 milyard kubmetr qaz ötürmək gücünə malik olacaq.
Sözügedən məsələ ilə bağlı fikirlərini “Bakı-Xəbər”lə bölüşən ekspert Zakir Əhmədovun sözlərinə görə, bütün bunlar Azərbaycan qazının vaxtında Avropa bazarına çıxarılacağının göstəricisidir: “Azərbaycan qazının Avropaya tədarükünü nəzərdə tutan şirkətin vaxtında yaradılacağına şübhə etmirəm. Nəzərə almaq lazımdırır ki, TAP-la bağlı işlərin böyük hissəsi həyata keçirilib. Bütün bunlar onu göstərir ki, Azərbaycan qazı uğurla 2020-ci ildə Avropa bazarına çıxarılacaq. Azərbaycan qazını almaq istəyən ölkələr içərisində Cənubi Avropa ölkələri də var. Hansı ki, Albaniya, Çernoqoriya, Bosniya və Herseqovina, Xorvatiya bura daxildir. 516 kilometr uzunluğunda olacaq İon-Adriatik Qaz Kəməri TAP-la birləşdiriləndən sonra həmin dövlətlər də Azərbaycan qazından faydalana biləcəklər. Nəzərə almaq lazımdır ki, bazarda qaz alıcılarının sayı nə qədər çox olsa, bu bir o qədər Avropaya ixrac ediləcək qazın həcminin artırılmasına şərait yaradacaq. Bu da, öz növbəsində. digər mənbələrdən də “Cənub Qaz Dəhlizi” layihəsinə qazın tədarük olunmasına stimul verəcək. Ona görə də bu istiqamətdə görülən işlərə, həyata keçirilən layihələrə kompleks şəkildə yanaşmaq lazımdır. Hesab edirəm ki, SOCAR-ın digər sahələrdə olduğu kimi, bu yöndə də fəaliyyəti uğurludur. Ona görə ki, SOCAR beynəlxalq şirkət olaraq özünü doğruldub”.
Vidadi ORDAHALLI
