Seyid Camal Əzimbəyli: “Bunun həm də təbliğat nöqteyi-nəzərdən müəyyən əhəmiyyəti var”
İqtisadiyyat Nazirliyinin və Türkiyənin Azərbaycandakı Səfirliyinin birgə həyata keçirdiyi layihələr çərçivəsində Cəbrayıl rayonunun Cocuq Mərcanlı kəndində istixana və arıçılıq təsərrüfatları yaradılıb.
İyulun 27-də bu təsərrüfatlar Cocuq Mərcanlı sakinlərinin istifadəsinə verilib. Bununla əlaqədar adıçəkilən kənddə tədbir keçirilib. Tədbirdə çıxış edən iqtisadiyyat naziri Şahin Mustafayev bununla bağlı bir sıra məqamlara toxunub. Azərbaycanda regionların, xüsusilə sərhəd rayonlarının inkişafına böyük diqqət və qayğı göstərildiyini vurğulayan iqtisadiyyat naziri birgə layihənin Cocuq Mərcanlının sosial-iqtisadi inkişafında və sakinlərin məşğulluğunun təmin olunmasında əhəmiyyətini qeyd edib. Bildirilib ki, burada məhsullar "Cocuq Mərcanlı" brendi altında istehsal olunacaq. İqtisadiyyat naziri assosiasiya rəhbərlərini və sahibkarları Cocuq Mərcanlıda layihələrin icrasına dəvət edib.
Cəbrayıl rayonunun Cocuq Mərcanlı kəndində 15 ədəd hər biri 160 kvadratmetr sahəyə malik polietilen örtüklü tunel tipli istixanalar qurulub. Birgə həyata keçirilən layihələr çərçivəsində, həmçinin, Cocuq Mərcanlıda 15 ailənin hər birinə 10 arı ailəsi olmaqla 150 arı ailəsi verilib. Birgə layihənin birinci mərhələsi çərçivəsində 30-dan çox Cocuq Mərcanlı sakininin məşğulluğu təmin edilib. Türkiyə ilə birgə layihə çərçivəsində suvenir istehsalı müəssisəsinin tikintisinə başlanıb. Müəssisənin bu ilin sonuna istifadəyə verilməsi nəzərdə tutulur. Burada istehsal olunacaq məhsullar "Cocuq Mərcanlı" brendi ilə satışa çıxarılacaq. Həmçinin, heyvandarlıq kompleksinin yaradılması işlərinə başlanıb. Birgə layihələrdə türkiyəli mütəxəssislərin təcrübəsindən də istifadə olunacaq.
Göründüyü kimi, Prezident İlham Əliyevin qətiyyəti sayəsində Cocuq Mərcanlının bərpa edilməsi sürətlə həyata keçirildi. İndi də "Cocuq Mərcanlı" brendi ilə məhsul istehsal olunub satışa çıxarılacaq. Ümumən bunun nə kimi əhəmiyyəti var?
Məsələyə münasibət bildirən şərqşünas Seyid Camal Əzimbəylinin sözlərinə görə, bir neçə aspektdən bunun böyük əhəmiyyəti var: “Bu bir daha onu göstərdi ki, Azərbaycan erməni vandalları tərəfindən məhv edilən yaşayış məntəqələrini bərpa etmək gücündədir. Hansı ki, işğalçı Ermənistan ordusu həmin ərazilərdə daşı-daş üstə qoymayıb. Xüsusən də Dağlıq Qarabağın ətrafında yerləşən 7 rayonun timsalında bu özünü daha qabarıq göstərir. Cocuq Mərcanlıda aparılan quruculuq işləri göstərdi ki, Azərbaycan işğaldan azad edilən yaşayış məntəqələrini bərpa etməklə yanaşı, orada məşğulluğun təmin edilməsini də yüksək səviyyədə həyata keçirir. Bunu bir daha əyani şəkildə bütün dünyaya göstərdi. İnşallah, işğal altında olan digər yaşayış məntəqələri də azad olunacaq və Cocuq Mərcanlıda görüləcək işlər həmin ərazilərdə də həyata keçiriləcək. Bununla həm də bütün dünya gördü ki, məcburi köçkünlər öz dədə-baba yurdlarına qayıtmaq və orada yaşayıb quruculuq işləri ilə məşğul olmaq istəyirlər. Hesab edirəm ki, bunun həm də təbliğat nöqteyi-nəzərdən müəyyən əhəmiyyəti var. O baxımdan hər birimiz bu məsələdə üzərimizə düşən işləri yerinə yetirməyə və bu işə töhfə verməyə çalışmalıyıq. İnanıram ki, işğal altında olan digər kənd və qəsəbələr də azad olunacaq. Həmin yaşayış məntəqələri həm bərpa olunacaq, həm də orada yaşayanların məşğulluğu təmin olunacaq”.
Vidadi ORDAHALLI
