İlqar Hüseynli: “Çünki birbaşa ünsiyyət və təmasların azalması bu sahədə neqativ halların azalmasına öz müsbət təsirini göstərir”
Azərbaycanda ünvanlı sosial yardım almaq üçün prosedurlar sadələşdirilir. Belə ki, ilkin olaraq yardım almaq üçün müraciət zamanı elektron ərizədə bəyannamənin doldurulması üçün tələb olunan sənədlərin sayı azaldılır. Sonrakı mərhələdə isə sosial yardımı almaq üçün, ümumiyyətlə, hər hansı bir sənəd toplamaq və ərizə bəyannaməsi verməyə ehtiyac olmayacaq.
Sosial yardım almaq üçün müraciət zamanı ailənin gəlirləri, tərkibinə daxil olanların pensiya və müavinətləri barədə məlumatlar vətəndaşdan istənilməyəcək. Artıq belə məlumatlar birbaşa mərkəzi informasiya bazalarından götürüləcək. Əmək və Əhalinin Sosial Müdafiəsi Nazirliyi tərəfindən atılan bu addımın əsas məqsədi sosial yardım üçün prosedurların sadələşdirilməsidir. Sadələşdirmə iki mərhələdə həyata keçiriləcək, birinci mərhələnin sentyabrın sonuna kimi yekunlaşdırılması planlaşdırılır.
Hazırda Əmək və Əhalinin Sosial Müdafiəsi Nazirliyi üzrə bütün məlumatların vahid elektron bazada toplanmasını nəzərdə tutan "Sosial Reyestr"in hazırlanması prosesi gedir. Bu proses başa çatdıqdan sonra ünvanlı dövlət sosial yardımın alınması üçün elektron müraciət zamanı hər hansı "ərizə-bəyannamə"nin doldurulmasına ehtiyac qalmayacaq. Sözügedən layihənin bu ilin sonunadək yekunlaşdırılması nəzərdə tutulur.
Qeyd edək ki, ötən il ünvanlı sosial yardım alanların sayı 80 min ailəyə yaxın olub. Bu ilin son 6 ayı ərzində isə bu rəqəm azalaraq 54 min ailə və ya 213 min nəfər təşkil edib. Ünvanlı sosial yardım 2006-cı ildən verilir. Həmin ildən indiyədək yüz minlərlə aztəminatlı ailə bundan yararlanıb. Ümumilikdə, bu sahədə prosedurların sadələşdirilməsinin əhəmiyyətini ekspertlər necə dəyərləndirirlər?
Məsələyə münasibət bildirən ekspert İlqar Hüseynlinin sözlərinə görə, ünvanlı sosial yardımın verilməsi ilə bağlı prosedurların sadələşdirilməsinin bir sıra əhəmiyyəti var: “Əvvəla prosedurların elektronlaşdırılmasına daha tez keçmək lazım idi. Çünki Azərbaycan tam olaraq elektron sistemə keçməklə bağlı qarşısına məqsəd qoymuşdu. Bu sahənin elektronlaşması və prosedurların sadələşdirilməsi daha çox insanın bundan faydalanmasına gətirib çıxaracaq. Çünki birbaşa ünsiyyət və təmasların azalması bu sahədə neqativ halların azalmasına öz müsbət təsirini göstərir. Ona görə də bu sahədə tətbiq olunan yenilikləri müsbət qiymətləndirirəm və səmərəli hesab edirəm. Nəticədə sosial yardım almaq istəyən vətəndaşlar mənasız get-gəllərdən, sorğu-sualdan xilas olacaqlar. Rahat şəkildə bundan sonra öz işlərini görəcəklər. Nəzərə almaq lazımdır ki, Səlim Müslümov və ondan əvvəlki nazirin fəaliyyəti dövründə ünvanlı sosial yardımın verilməsindən çox ciddi narazılıqlar var idi. Bu sahənin adı korrupsiyada çox hallanıb. Elə insanlar var ki, ünvanlı sosial yardım alırlar, amma belə baxanda onların buna ehtiyacı yoxdur. O mənada ki, həmin insanların müəyyən gəlir mənbələri var. Elələri var dövlət qurumlarında çalışır. Yəni bu mənada götürsək ümid var ki, daha belə neqativ hallar olmayacaq. Xeyli sənədlərin tələb olunmasına daha ehtiyac qalmayacaq. Bütövlükdə, prosesin sadələşdirilməsi vətəndaşların rahatlığının təmin olunmasında mühüm rol oynaya bilər. Bu da, öz növbəsində, daha çox ehtiyacı olan şəxsin ünvanlı sosial yardım almasına kömək edəcək. Ona görə də sözügedən yeniliklərin tətbiq olunmasını dəstəkləyirəm”.
Vidadi ORDAHALLI
