Vahid Məhərrəmov: “Kənd təsərrüfatı nəqliyyat vasitələrini idarə edən şəxslərin əksəriyyətinin həmin texniki vasitədən anlayışı olmur” Ərşad Hüseynov: “Kombayn tarlada aşırsa, bu, onu idarə edən şəxsin sürücülük bacarığının və texnikanın imkanlarının hansı vəziyyətdə olmasından xəbər verir”
Aqrar sahənin inkişafı üçün son zamanlar xarici ölkələrdən ölkəmizə müasir standartlara cavab verən nəqliyyat vasitələri gətirilir. Ancaq o vasitələri idarə edən şəxslərin peşəkar olmadığı iddia olunur.
Açıqlanan statistik rəqəmlərə əsasən, bu gün Azəbaycanda 80 minə yaxın kənd təsərrüfatı texnikası var, lakin bu texnikanı düzgün idarə edəcək kadrlar yetərincə deyil.
Baş Dövlət Yol Polis İdarəsinin Yol-Patrul Xidməti şöbəsinin rəisi Kamran Əliyev media nümayəndələrinə açıqlamasında qeyd edib ki, mayın 1-dən indiyə qədər kənd təsərrüfatı texnikalarının iştirakı ilə 13 hadisə olub, 10 nəfər ölüb, 22 nəfər yaralanıb. Təkcə bir hadisədə 6 nəfər həlak olub. O, kənd təsərrüfatı texnikalarının yollarda hərəkətinin təhlükəli olduğunu vurğulayıb.
Aqrar sahə üzrə mütəxəssis Vahid Məhərrəmov qəzetimizə açıqlamasında qeyd etdi ki, Azərbaycanda kənd təsərrüfatı texnikasını idarə edəcək kadrlara ehtiyac var: “Qeyd olunan sahədə kadr çatışmazlığının bir neçə səbəbi var. İlk olaraq bildirim ki, bu sahə gəlirli olmadığı üçün təşəbbüs göstərənlər azdır. Həmçinin, pay torpaqlarının sahəsi kiçik olduğu üçün həmin ərazidə nadir hallarda texnikadan istifadə olunur. Bu işlə sahibkar o halda məşğul olar ki, geniş ərazilər olsun və xidməti həyata keçirərkən yaxşı gəlir əldə etsin”.
Həmsöhbətimizin sözlərinə görə, gənclər öz arzu istəyi ilə kənd təsərrüfatı nəqliyyat vasitələrini idarə etmirlər. Ümumiyyətlə, bu sahəyə maraq yoxdur.
V.Məhərrəmov onu da vurğuladı ki, kənd təsərrüfatı nəqliyyat vasitələrini idarə edən şəxslərin əksəriyyətinin həmin texniki vasitədən anlayışı olmur: “Avtomobil sürmək anlayışı olduğu üçün düşünürlər ki, istənilən nəqliyyat vasitəsini idarə edə bilərlər. Ancaq unutmaq lazım deyil ki, aqrar sahə üçün lazım olan nəqliyyat vasitələrini idarə etməyə xüsusi təlim lazımdır. Bu sahəyə yanaşmanı dəyişmək lazımdır”.
Nəqliyyat sahəsi üzrə ekspert Ərşad Hüseynovun sözlərinə görə, neftdən sonra ixrac olunan məhsullar arasında kənd təsərrüfatı malları ikinci yerdə durur: “Bu məhsulların daşınmasında təhlükəsizlik son dərəcə vacib məsələdir. İqtisadi itkilərin olmaması, zərərin minimuma endirilməsi üçün bu texnikalardan istifadə bacarığı və texnikanın sazlığı vacibdir. Kənd təsərrüfatı sahəsindəki texnikadan istifadə üsulları barədə məlumatlı olmaq üçün peşə hazırlığına diqqət artırılmalıdır. Məlumata görə, hazırda 80 min civarında kənd təsərrüfatı texnikası var. Bu, ümumi nəqliyyat parkının beş-altı faizini təşkil edir. Bəzən ictimai rezonans doğuran yol-nəqliyyat hadisələrinin kənd təsərrüfatı texnikaları vasitəsilə törədilməsi gündəmə gəlir. Bu yaxınlarda traktorun qoşqu hissəsinin aşması buna misal ola bilər. Bununla yanaşı, ölkəmizdə fermerlərin bu texniki vasitələrin çatışmazlığı ilə bağlı problemləri biçin vaxtı mediada işıqlandırılır. Buna səbəb həmin vasitələrin qiyməti ilə bağlıdır. Bu texnikaların ölkəyə gətirilməsi iqtisadi məsələdir. Lakin mövcud texniki vasitələrə qulluq da vacib məsələdir. Kombayn tarlada aşırsa, bu, onu idarə edən şəxsin sürücülük bacarığının və texnikanın imkanlarının hansı vəziyyətdə olmasından xəbər verir”.
Günel CƏLİLOVA
