Fikrət Yusifov: “Bank ölkəmizdə özəl sektorun maliyyələşdirilməsində, bir çox infrastruktur və digər layihələrin reallaşdırılmasında yaxından iştirak edir”
Avropa Yenidənqurma və İnkişaf Bankı (AYİB) yaxın bir müddətdə Azərbaycan manatında istiqrazların buraxılmasına ümid edir. Bu barədə mətbuata bankın baş ofisindən bildirilib.
Eyni zamanda, bankın həmməruzəçisi bununla bağlı bir sıra məqamlara toxunub: “Hazırda biz manat istiqrazlarının istehsalı ilə bağlı Azərbaycanın Maliyyə Bazarlarına Nəzarət Palatası ilə müzakirələri davam etdiririk. Milli valyutada istiqrazların buraxılması məsələsi bizim üçün prioritet olaraq qalır. Biz Palataya yaxından əməkdaşlıq etdiyi üçün təşəkkür edirik. Yaxın gələcəkdə istiqrazların emissiyaya başlaya biləcəyinə ümid edirik”.
Qeyd edək ki, AYİB hələ 2016-cı ildə Azərbaycanda manat istiqrazlarının buraxılması niyyətini açıqlayıb. Əvvəllər AYİB-in yerli nümayəndəsi bildirib ki, istiqrazlar ilk növbədə Azərbaycanda satılacaq, sonra isə onların xarici bazarlara yerləşdirilmə məsələsinə baxıla bilər.
Agentliyin müxbiri, həmçinin, qeyd edib ki, bank milli valyutada kreditlərin verilməsini davam etdirməyi planlaşdırır: “AYİB yerli valyutada kreditin verilməsində çox maraqlıdır”.
Bank yerli valyutada Azərbaycana ilk korporativ krediti 2017-ci ilin sonunda ayırıb. Azərbaycan 1992-ci ildən AYİB ilə əməkdaşlıq edir. Əməkdaşlığın başlamasından bəri bank Azərbaycanın maliyyə, korporativ, infrastruktur və enerji sektorunda 165 layihəyə 3 milyard dollardan çox sərmayə qoyub. Eyni zamanda, investisiyaların 26 faizi özəl sektorun payına düşür.
Bütün hallarda, AYİB-in manatla istiqrazların buraxılmasına səy göstərməsi manata inamın güclənməsi baxımından nə kimi əhəmiyyət kəsb edir?
Məsələyə münasibət bildirən iqtisad elmləri doktoru, professor Fikrət Yusifov buna bir neçə kontekstdən yanaşdı: “Artıq uzun illərdir Azərbaycan hökuməti ilə Avropa Yenidənqurma və İnkişaf Bankı arasında səmərəli əməkdaşlıq formalaşıb. Bank ölkəmizdə özəl sektorun maliyyələşdirilməsində, bir çox infrastruktur və digər layihələrin reallaşdırılmasında yaxından iştirak edir. Azərbaycan və AYİB arasında mühüm layihələrdən biri “Cənub Qaz Dəhlizi” layihəsidir. AYİB-in Direktorlar Şurasının “Cənub Qaz Dəhlizi” layihəsinin tərkib hissəsi olan TANAP layihəsinin maliyyələşdirilməsinə vəsait ayırmasını təsdiq etməsi isə bankın Azərbaycan iqtisadiyyatına və onun aparıcı sahəsi olan enerji sektoruna nə qədər güvənməsindən xəbər verir. Elə bunun nəticəsidir ki, Avropanın aparcı maliyyə institutu artıq uzun müddətdir özünü tam sabit aparan Azərbaycan manatında istiqrazların buraxılışını təşkil etmək istəyir. Bu addım Azərbaycanın milli valyutasına beynəlxalq aləmdə inamın artmasına səbəb olmaqla, xarici investorların Azərbaycan manatına daha çox güvənməsi üçün də çox mühüm bir addım olacaq. Ona görə də buna müsbət yanaşıram”.
Vidadi ORDAHALLI
