Rəsul Cahangirli: “Azərbaycanda həm neft-qaz, həm də qeyri-neft sektoruna İtaliya şirkətlərinin ciddi maraq göstərəcəyi gözlənir”
Xəbər verildiyi kimi, İtaliyanın neft-qaz şirkəti "Saipem" Azərbaycanda fəaliyyət üçün yeni imkanlar axtarır. Şirkətdən bildirilib ki, onlar Azərbaycandakı tərəfdaşları olan "Bos Shelf"lə əməkdaşlıq edirlər və "Abşeron" qaz yatağının istismarında iştirak kimi ölkədə yeni imkanlar axtarırlar.
Həmçinin, qeyd olunub ki, "Saipem"in Azərbaycanda uzun və uğurlu əməkdaşlıq tarixi var, əsasən hər iki ölkənin institutlarının açıq və konstruktiv yanaşmaları sayəsində: "Biz "Saipem" üçün vacib ölkəyə çevrilən Azərbaycanda daimi fəaliyyət göstəririk. "Şahdəniz" qaz-kondensat yatağının işlənməsi layihəsində iştirakımızla yanaşı, biz Azərbaycan qazının Avropaya nəqlinin bütün istehsalat-satış zənciri boyu işləyirik. Biz Azərbaycan və Gürcüstanda Cənubi Qafqaz boru kəmərinin genişləndirilməsi layihəsində iştirak etmişik, Albaniya və İtaliyanın sahil xətləri arasında Adriatik dənizindən keçərək Transadriatik Boru Kəmərinin (TAP) ofşor hissəsinin tikintisi layihəsini əldə etmişik".
Qeyd edək ki, bu günlərdə İtaliya prezidenti Sercio Mattarella Azərbaycanda səfərdə olub və Prezident Əliyevlə görüşüb. Səfər çərçivəsində bir sıra məsələlər müzakirə olunub. Səfər göstərdi ki, iki ölkə arasında münasibətlərin inkişaf dinamikası yüksəkdir və müxtəlif sahələr üzrə əməkdaşlıq əlaqələri daim genişlənir. Azərbaycan və İtaliya arasında siyasi sahədə olduğu kimi, iqtisadi əməkdaşlıq da uğurla davam edir. Hazırda İtaliya ölkəmizin əsas ticarət tərəfdaşlarından biridir. Şübhəsiz ki, ikitərəfli əlaqələrin inkişafında qarşılıqlı rəsmi səfərlərin əhəmiyyəti mühüm önəm daşıyır. Bunu müstəqillik illərində İtaliyanın Azərbaycan iqtisadiyyatına 530 milyon dollardan çox investisiya yatırması, Azərbaycanın isə İtaliyaya 135 milyon dollar investisiya qoyması faktından da aydın görə bilərik. İtaliya ilə Azərbaycan arasında iqtisadi əlaqələr əsasən neft-qaz, qeyri-neft sektoru, sənaye sahələrini əhatə edir. İtaliyanın 99,4 faiz idxalı Azərbaycan neftinin hesabına həyata keçirilir.
Bütün bunların fonunda, "Saipem" kimi böyük şirkətin ölkənin neft-qaz sektoruna maraq göstərməsi İtaliya Prezidentinin bu günlərdə Azərbaycana səfər etməsinin nəticəsi sayıla bilərmi?
Məsələyə münasibət bildirən ekspert Rəsul Cahangirli bunu istisna etmədi: “Şübhəsiz ki, bu amilin rolu var. Məsələ ondadır ki, İtaliya kimi güclü bir dövlətin Prezidentinin Azərbaycana səfər etməsi böyük hadisə idi. Nəzərə almaq lazımdır ki, İtaliya Prezidenti Sercio Mattarellanın Bakıya səfəri çox yüksək səviyyədə keçdi. İki ölkə başçısı arasında məhsuldar görüş keçirildi. İqtisadi və digər sahələrlə bağlı tərəflər arasında razılaşmalar əldə olundu. İtaliya Prezidentinin Azərbaycana səfəri istər İtaliya, istərsə də digər ölkələrin mətbuatında geniş işıqlandırıldı. İtaliya Azərbaycan neftinin əsas alıcılarından biridir. Ölkənin dünyaca tanınmış neft-qaz şirkətləri var ki, onlardan biri də "Saipem"dır. Sözügedən şirkət neft-qazçıxarma sahəsində böyük təcrübəyə malikdir. Əlbəttə, indiki məqamda şirkətin belə bir təşəbbüslə çıxış etməsi təsadüfi deyil. Bu, İtaliya Prezidentinin Azərbaycana etdiyi yüksək səviyyəli səfərin nəticəsidir. Səfər o qədər uğurlu keçdi ki, bundan sonra çoxsaylı İtaliya şirkətinin Azərbaycana maraq göstərəcəyi gözlənir, özü də iqtisadiyyatın müxtəlif sahələrinə. Yəni Azərbaycanda həm neft-qaz, həm də qeyri-neft sektoruna İtaliya şirkətlərinin ciddi maraq göstərəcəyi gözlənir”.
Vidadi ORDAHALLI
