Əli Əlirzayev: “Emal sənayesinin inkişafı ilə bağlı fransız şirkətləri töhfə verə bilərlər”
Məlum olduğu kimi, bu günlərdə Prezident İlham Əliyevin Fransaya rəsmi səfəri baş tutdu. Səfər çərçivəsində dost ölkənin rəsmi şəxsləri ilə keçirilən görüşlər, aparılan danışıqlar hər iki ölkə arasında münasibətlərin yüksək səviyyədə inkişafını göstərdi.
Prezidentin Parisə səfəri çərçivəsində Fransanın 11 şirkətinin nümayəndələri ilə səmərəli görüşlər aparılıb, Azərbaycanla Fransa şirkətləri arasında 2 milyard dollardan çox dəyərində müqavilələr imzalanıb.
Fransa Azərbaycanın ən böyük iqtisadi tərəfdaşlarından biridir və bu münasibətlərin potensialı olduqca çoxşaxəlidir. Nəzərə almaq lazımdır ki, Fransa öz iqtisadi inkişafına görə dünyanın aparıcı sənaye dövlətlərinin “böyük yeddiliyi”nə daxildir. Fransa dünyanın 5-ci iqtisadi gücüdür. O, dünya ÜDM-nin 5 faizini və dünya ticarətinin 6 faizini formalaşdırır. Avropada ümumi iqtisadi göstəricilərinə görə isə Almaniyadan sonra ikinci yerdə durur. Bütün bunlar kifayət qədər cəlbedicidir və Azərbaycan kimi dinamik və inkişaf edən iqtisadiyyata sahib olan bir ölkənin diqqətini cəlb etməyə bilməz. Azərbaycanda 50-yə yaxın Fransa şirkəti fəaliyyət göstərir. Prezident İlham Əliyevin Fransaya səfəri və keçirilən çoxsaylı görüşlər iki ölkə arasında əməkdaşlığın yeni mərhələyə qədəm qoyduğunu göstərir. Səfər çərçivəsində Fransanın qeyri-neft sektorunda fəaliyyət göstərən iri şirkətlərinin Azərbaycana xüsusi maraq göstərmələri diqqəti cəlb edir. Çünki bu, Azərbaycana investisiyaların cəlb edilməsi, qeyri-neft sektorunun inkişafı baxımından mühüm əhəmiyyət kəsb edir.
Bütün bunların fonunda, Fransa şirkətləri Azərbaycanda qeyri-neft sektorunun hansı sahələrinə daha çox maraq göstərirlər? Hansı sahələr sözügedən şirkətlər üçün daha çox cəlbedici ola bilər?
Sözügedən məsələyə aydınlıq gətirən iqtisadçı-alim Əli Əlirzayev bir sıra məqamlara toxundu: “Fransa şirkətlərinin özünəməxsus strukturu və sənaye ənənəsi var. Eyni zamanda bu dövlət qədim və inkişaf etmiş bir ölkədir. Fransada qida sənayesi, şərabçılıq inkişaf etmiş bir sahədir. Qeyri-neft sektorunun infrastruktur sahələri inkişaf edib. Mədəni və ictimai iaşə sahələri inkişaf edib. Bir məqamı qeyd edim ki, investisiya kommersiya baxımından cəlbedicidirsə və sərmayə qoymaq üçün əlverişli zəmin varsa, şirkətlər buna maraq göstərirlər. Azərbaycanda kənd təsərrüfatının bir sıra sahələri Fransa şirkətləri üçün cəlbedici ola bilər. Bura qida sənayesi, şərabçılıq, kənd təsərrüfatı məhsullarının emalı sahələri daxildir. Bu sahələrdə Fransa şirkətləri üçün potensial böyükdür. Nəzərə almaq lazımdır ki, bu vəsait təkcə Azərbaycan bazarı üçün qoyulmur. Həm də qonşu ölkələrin bazarları üçün bunu edirlər. Lap elə Fransanın özünə istehsal olunan məhsulları daşımaq olar. Ona görə də Fransanın iqtisadiyyatı, sənaye potensialı nə qədər Azərbaycan iqtisadiyyatı ilə əlaqəli olsa, bu bir o qədər yaxşıdır. Çünki bu ölkənin iqtisadiyyatı çoxşaxəlidir. Emal sənayesi Fransada daha çox inkişaf edib. Hesab edirəm ki, Azərbaycanda sözügedən sahənin inkişafı ilə bağlı fransız şirkətləri töhfə verə bilərlər. Azərbaycanda müxtəlif məhsulların ikinci dəfə emalı ilə bağlı imkanlar var. Konserva və şərab sənayesinin inkişafında Fransa şirkətləri yaxşı iqtisadi yardım edə bilərlər. Ən nəhayət, Azərbaycanın tikinti sahəsində də Fransa şirkətləri müəyyən işlər görə bilərlər. Tikinti materiallarının emalı və istehsalı bura daxildir”.
Vidadi ORDAHALLI
