Qadir Bayramlı: “Son 5 il ərzində bu sahənin inkişafına xüsusi diqqət göstərilir və görülən işlər sayəsində həm istixanaların sayı, həm də məhsulun həcmi artır”
Azərbaycanda həyata keçirilən iqtisadi islahatlar sahibkarlıq fəaliyyətinin genişlənməsinə imkanlar yaradıb. Yeni istehsal və xidmət müəssisələri, o cümlədən yeni sənaye müəssisələri, sosial infrastruktur obyektləri yaradılıb, əhalinin həyat səviyyəsi yüksəlib. Sahibkarlara verilən güzəştli kreditlərin həcminin artması rayonların da iqtisadiyyatına müsbət təsir göstərir.
Sahibkarlığın inkişafı məqsədilə istixanaların sayı artırılır. Açıqlanan statistik rəqəmlərə əsasən, 2018-ci il iyul ayının 1-nə ölkədə ümumi sahəsi 1,3 min hektar olan 2907 vahid istixana fəaliyyət göstərib.
Dövlət Statistika Komitəsinin yaydığı məlumatda qeyd olunur ki, ötən ilin müvafiq dövrü ilə müqayisədə istixanaların ümumi sayında 4,2 faiz, onların sahəsində isə 6,8 faiz artım olub.
Ötən ilin müvafiq dövrü ilə müqayisədə bu ilin yanvar-iyun aylarında istixanalarda yetişdirilən əsas məhsullardan olan pomidorun istehsalı 4,3 faiz artaraq 173,1 min ton, xiyarın istehsalı isə 2,7 faiz artaraq 7,8 min tona çatıb.
Ötən ilin müvafiq dövrü ilə müqayisədə istixanaların sayının 4,2 faiz artması barədə fikir bildirən Azərbaycan Dövlət İqtisad Universitetinin dosenti Qadir Bayramlı “Bakı-Xəbər”ə açıqlamasında qeyd etdi ki, Azərbaycan istixanalarla bağlı təcrübəyə malikdir: “Sovet dönəmində istixanalarda yetişdirilən meyvə-tərəvəz həm daxili bazarı təmin edirdi, həm də xaricə çıxarılırdı. 1990-cı illərin əvvəllərindən etibarən yaşanan qaz problemi ilə əlaqədər olaraq istixanalarda tənəzzül dövrü yaşandı. Ancaq son 5 il ərzində bu sahənin inkişafına xüsusi diqqət göstərilir. Görülən işlər sayəsində həm istixanaların sayı, həm də məhsulun həcmi artır. Qış mövsümündə böyük şəhərlərin əhalisini məhsulla təmin etmək baxımından istixanalar əhəmiyyətlidir”.
Həmsöhbətimizin sözlərinə görə, istixanaların sayının artması Azərbaycanın ixracat imkanlarını artıra bilər və əvvəlki ənənələr bərpa olunar: “Ancaq istixanaların inkişafı üçün bir sıra şərtlər nəzərə alınmalıdır. İlk öncə istixanalar zəruri istiliklə təmin olunmalıdır. Amma elə qiymətlə təmin olunmalıdır ki, bu onlar üçün sərfəli olsun. Həmçinin, istixana işi ilə məşğul olanlar güzəştli kreditlə təmin olunmalıdırlar”.
Ekspert onu da bildirdi ki, Azərbaycanda mövcud olan istixanalar klassik metodlarla fəaliyyət göstərirlər: “Nəzərə almaq lazımdır ki, hazırda dünyada müasir qaydalar əsasında istixanalar fəaliyyət göstərir. Müasir standartlara uyğun formada istixanalar qurularsa, nəticə daha da yaxşı olar”.
Q.Bayramlı qeyd etdi ki, istixanaların inkişafı əhalinin gəlirinin artmasına təsir göstərər, eyni zamanda, müəyyən iş yerlərinin sayının artmasına səbəb olar.
Günel CƏLİLOVA
