"SOCAR Georgia Gas" Gürcüstanın regionlarını əhatə edən uzunluğu 594 min poqonometr olan qazpaylayıcı şəbəkəyə sahib olub. Gürcüstan hökumətinin rəsmi saytında verilən məlumata görə, qazpaylayıcı şəbəkənin dəyəri 21,3 milyon lari (9,5 milyon dollar) təşkil edir.
Qazpaylayıcı SOCAR Georgia Gas Kasp, Qardaban, Zestafon, Zuqdidi, Ozurqet, Laqodexi, Axmet və On bələdiyyələrini əhatə edir.
"Gürcüstanda qazpaylayıcı şəbəkəni nəinki biz, eləcə də dövlət tikir. SOCAR dövlətdən şəbəkəni ödəniş möhləti almaqla istehsal xərcləri ilə birgə alır və davam olaraq şəbəkəni işə qoşur. İndiyə qədər ödəniş möhləti ilə 40 milyon lariyə yaxın şəbəkə almışıq", - Bunu Trend-ə özəl olaraq SOCAR Energy Georgia-nın rəhbəri Mahir Məmmədov deyib.
Hazırki razılaşmanın şərtlərinə görə, 21,3 milyon lari 48 ay ərzində, 8,5 milyon lari isə 36 aya ödənilməlidir.
Qeyd edək ki, 2008-ci ilin noyabrında Azərbaycan ilə Gürcüstan arasında saziş imzalanıb. Sənəd 2009-cu ildən başlayaraq sonrakı beş il ərzində Gürcüstanın qaz bazarında ARDNŞ-nin fəaliyyətinin fəallaşdırılması imkanlarını nəzərdə tutur. Memoranduma əsasən, ARDNŞ layihənin həyata keçirilməsi üçün Gürcüstan hökuməti tərəfindən müəyyən edilən qaz istehlakçıları qruplarını (sosial qruplar) təmin edən "SOCAR Georgia Gas" törəmə müəssisəsini yaradıb.
Həmçinin, 2008-cil il dekabrın sonunda ARDNŞ və Gürcüstan hökuməti 30 paylayıcı qaz təsərrüfatı və paylayıcı qaz şəbəkəsinin istifadəyə verilməsi barədə müqavilə imzalayıb. Bu şəbəkələr Gürcüstanın Kaxeti, Mtsxeta-Mtianeti, Şida və Kvemo Kartli, Acarıstan, Quriya, İmereti, Sameqrelo regionlarını əhatə edir. 2009-cu ilin aprelində ARDNŞ azərbaycanlıların kompakt yaşadığı Gürcüstanın Marneuli rayonunun paylayıcı qaz şəbəkələrini istifadəyə alıb.
ARDNŞ yanvar-noyabrda Gürcüstana 300,43 milyon kubmetr qaz ixarc edib. Keçən il ARDNŞ Gürcüstana bir milyard kubmetrdən çox qaz ixrac edib. 2008-ci ildə bu göstərici 789 milyon olub. Gürcüstana qaz tədarükü 2008-ci ilin aprelində başlayıb.
2013-2016-cı illərdə Gürcüstanda 200 min abonent təbii qazla təmin olunub. Həmçinin 2014-2015–ci illərdə Abxaziya ilə sərhəddə yerləşən Tsxinvali regionunda 58 yaşayış məntəqəsində 13500 evə qaz çəkilib.
Bununla yanaşı, 2013-2017-ci illərdə ölkə üzrə 229 min abonent fərdi qaz sayğacları ilə təmin olunub.
