Eyyub Hüseynov: “İnsanlar bazardan, mağazadan çox, gözlərinin qarşısında kəsilmiş əti almağa üstünlük verirlər”
Xəbər verildiyi kimi, Qida Təhlükəsizliyi Agentliyi (QTA) qida təhlükəsizliyi tələblərinə, sanitar-gigiyenik normalara uyğun olmayan heyvan kəsimi məntəqələrinin fəaliyyətini dayandırmaq üçün Daxili İşlər Nazirliyi və yerli icra hakimiyyəti orqanları ilə birlikdə reydlərə başlayıb.
Qurumun yaydığı məlumatda qetd olunur ki, “Heyvan kəsimi fəaliyyətinin tənzimlənməsi haqqında” Azərbaycan Respublikası Prezidentinin 11 iyun 2018-ci il tarixli Sərəncamının icrası ilə əlaqədar Qida Təhlükəsizliyi Agentliyi baytarlıq-sanitariya və gigiyena normalarına cavab verməyən yerlərdə, küçələrdə, yol kənarlarında heyvan kəsimi ilə məşğul olan şəxslərdən qanunsuz fəaliyyətlərini dayandırmağı tələb edib.
Bildirilib ki, qanunvericiliyin tələblərinə uyğun olaraq, Azərbaycan Respublikasının Daxili İşlər Nazirliyi və yerli icra hakimiyyəti orqanları ilə birlikdə bu cür fəaliyyətlərin aradan qaldırılması üçün reydlər davam etdiriləcək və qanunla müəyyən olunmuş qaydada ciddi tədbirlər həyata keçiriləcək.
Qida təhlükəsizliyi tələblərinə, sanitar-gigiyenik normalara uyğun olmayan heyvan kəsimi məntəqələrinin fəaliyyətinin dayandırılması üçün reydələrin keçirilməsinin əhəmiyyəti barədə danışan Azad İstehlakçılar Birliyinin (AİB) sədri Eyyub Hüseynov “Bakı-Xəbər”ə açıqlamasında qeyd etdi ki, gigiyenik normalara cavab verməyən ət kəsim məntəqələrinin fəaliyyətinin dayandırılması barədə dəfələrlə təşəbbüs qaldırılıb: “Hətta illər öncə sanitar-gigiyenik qayadalara uyğun formada ət kəsim məntəqələri də yaradıldı. Lakin insanlar həmin məntəqələrə müraciət etmirlər. İnsanlar daha çox gözünün qarşısında kəsilən ət kəsim məntəqələrindən ət almağa üstünlük verirlər. Əhali bazara gedib görür ki, yüzlərlə cəmdəyin üstündə agentliyin möhürü var. Əhali arasında belə bir fikir var ki, soyulmamış qoyunun dərisinin altından baytarlığın möhürü çıxır. Nə qədər ki, bu işlə məşğul olan qurumlar əhalinin rəğbətini, inamını qazanmayıblar, inzibati yollarla bunun qarşısını almaq mümkün olmayacaq”.
Həmsöhbətimiz hesab edir ki, ət kəsimi ilə bağlı çox ciddi problemlər var: “Paytaxt sanki qəssabxanaya dönüb. Harada gəldi, sağlamlığı məlum olmayan heyvanlar kəsilib satılır. Bəzi ət kəsim yerlərinə təmizlik aparmaq üçün su belə çəkilməyib. Bəzilərinin isə nə soyuducusu var, nə də kəsilmiş ətlərin sağlamlığını təsdiqləyən baytar möhürü. Ancaq buna rəğmən, yol kənarında heyvanların kəsim şəraitinə əməl edilməsə də, insanlar bazardan, mağazadan çox, gözlərinin qarşısında kəsilmiş əti almağa üstünlük verirlər. Bunun əsas səbəbi insanların baytar möhürünə inamsızlığı ilə bağlıdır. Ona görə də düşünürəm ki, yeni yaranmış qurum nəzarəti elə formada həyata keçirməlidir ki, istehlakçılarda inam yaransın”.
Günel CƏLİLOVA
