“Xərclərin isə 72,3 faiz səviyyəsində icra olunması Neft Fondunun vəsaitlərinə qənaət etməsi baxımından yaxşı göstəricidir”
Məlum olduğu kimi, Azərbaycan Respublikası Dövlət Neft Fondunun (ARDNF) 2017-ci il büdcəsinin gəlir və xərcləri təsdiq edilib. Prezident İlham Əliyev “Azərbaycan Respublikası Dövlət Neft Fondunun 2017-ci il büdcəsinin icrası haqqında” Sərəncam imzalayıb.
Sərəncama görə, ARDNF-in 2017-ci ildə gəlirləri 12 137,503 milyon manat, xərcləri isə 11 015,5 milyon manat təşkil edib.
Həmçinin, Azərbaycan Prezidenti ARDNF-nin 2018-ci il büdcəsinə dəyişiklikləri də təsdiqləyib.
Dəyişikliklərə əsasən, ARDNF-in 2018-ci il üzrə gəlirləri 15 310 823,9 min manatadək, xərcləri isə 11 480 221,8 min manatadək artırılıb.
İlk olaraq, ARDNF-in 2018-ci il üzrə gəlirləri 11 559 956,2 min manat həcmində, xərcləri isə 9 730 221,8 min manat həcmində təsdiq edilibdir. ARDNF-in büdcəsinin yenidən baxılması neftin qiymətlərinin dəyişilməsi ilə bağlıdır.
Neft Fondunun 2017-ci il üçün büdcəsinin gəlir və xərclərinin təsdiqlənməsi barədə fikir bildirən İqtisadiyyat Nazirliyi İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov "Bakı-Xəbər"ə açıqlamasında qeyd etdi ki, ARDNF-nun vəsaitlərindən qənaətlə istifadə etmək strateji baxımdan Azərbaycan üçün zəruri olan ən incə məsələlərdən biri sayılır: “Neft Fonduna yığılan vəsaitlər ölkəmizin valyuta ehtiyatlarının bir qismini təşkil edir. Məlumdur ki, 2014-cu ildə dünya bazarında neftin satış qiymətində dəyişiklik baş verdi. Vəziyyətlə əlaqədar olaraq Azərbaycan iqtisadiyyatına yaranan xarici təsirlərdən biz üzüağ çıxdıq. Bunun səbəbi isə valyuta ehtiyatlarımızın təhlükəsizliyinin təmin olunması idi. O zaman daxili valyuta bazarında sabitliyi təmin etmək üçün Neft Fondundan deyil, Mərkəzi Bankın rəsmi valyuta ehtiyatından vəsait sərf olundu”.
Həmsöhbətimiz hesab edir ki, Neft Fondunun vəsaitlərinə qənaət etmək, onların xərclənməsinin düzgün təşkil olunması Azərbaycan iqtisadiyyatının təhlükəsizliyi üçün önəmlidir: “Ötən il dövlət büdcəsindən gəlirlərin 12 faizdən yuxarı həyata keçirilməsi xüsusi əhəmiyyət kəsb edir. Xərclərin isə 72,3 faiz səviyyəsində icra olunması Neft Fondunun vəsaitlərinə qənaət etməsi baxımından yaxşı göstəricidir”.
Günel CƏLİLOVA
