Vüqar Bayramov: “Dəymiş ziyanın məbləğinin müəyyən edilməsi ilə bağlı araşdırma aparılmalıdır” Pərviz Heydərov: “Qanunsuz yolla pensiya təyin edən şəxslər dəymiş ziyanı cərimə şəklində ödəyə bilərlər”
“Araşdırmalar nəticəsində pensiya təyinatı sahəsində ciddi qanunsuzluqlar, saxta sənədlər tərtib olunmaqla pensiya təyinatlarının aparılması halları aşkar edilib, belə hallarla bağlı hüquq-mühafizə orqanlarına məlumat verilib”. Bunu bir neçə gün öncə əmək və əhalinin sosial müdafiəsi naziri Sahil Babayev nazirlikdə keçirilən müşavirədə bəyan edib.
O qeyd edib ki, ümumilikdə, pensiya təyinatı sisteminin elektronlaşdırılması ilə bu sahədə şəffaflıq tam təmin ediləcək: “Stasionar və səyyar formada sosial xidmətlər sahəsində də ciddi nöqsanlar mövcuddür, sosial xidmət müəssisələrində ştat vahidləri üzrə işə qəbul edilənlərin sayı ilə faktiki işləyənlərin sayı arasında fərqlər aşkar olunur, belə halların aradan qaldırılması üçün tədbirlər görülür.
Həmçinin, risq qrupu xəstəlikləri ilə əlaqədar cari ilin birinci rübündə aparılmış əlillik təyinatları araşdırılarkən yanlışlıqlar aşkar edilib, həmin şəxslərə yönələn pensiya, müavinət və təqaüd ödənişləri dayandırılıb. Ödənilmiş vəsaitin dövlət büdcəsinə bərpası üçün təxirəsalınmaz tədbirlər görülüb”. Artıq cari ilin ikinci rübünə dair əlillik təyinatları üzrə araşdırmalar aparılır. Araşdırmalar ikinci və üçüncü qrup əlillik təyinatlarını da əhatə edəcək”.
Qeyd olunduğu kimi, pensiya təyinatı sistemində vaxtilə qanunsuzluqlar mövcud olub. Qanunsuz pensiya təyinatı səbəbindən dövlətə ziyan dəyib. Dövlətə dəyən ziyanı hansı şəkildə ödəmək olar? Ümumiyyətlə, böyük məbləğdə maliyyə ziyanı necə ödəniləcək?
İqtisadçı-ekspert Vüqar Bayramov “Bakı-Xəbər”ə açıqlamasında qeyd etdi ki, dəymiş ziyanın məbləğinin müəyyən edilməsi ilə bağlı araşdırma aparılmalıdır. Böyük məbləğdə maliyyə ziyanının dəydiyi aşkar olunarsa, o zaman cinayət işi açılmalıdır.
Həmsöhbətimizin sözlərinə görə, ziyanın qaytarılması ilə bağlı xüsusi araşdırmanın aparılmasına ehtiyac var. Eyni zamanda, yeni mexanizmlərin hazırlanması vacibdir. Etiraf edək ki, ziyanın qaytarılması ilə bağlı hazırlanacaq mexanizmlər heç də asan olmayacaq.
İqtisadiyyat Nazirliyi İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov "Bakı-Xəbər"ə açıqlamasında qeyd etdi ki, pensiya təyinatı ilə bağlı qanunsuzluqların aşkar olunması və bu sahədə yaşanan və yaşana biləcək problemlər aradan qaldırılmalıdır: “İlk olaraq qanunsuz pensiya ödənişləri dayandırılmalıdır. Təəssüf ki, həmin ana qədər ödənilən vəsaitin kompensasiyasının müvafiq mexanizmi mövcud deyil. Yaxşı olar ki, qanunsuz yolla pensiya təyin edən şəxslər qanun çərçivəsində cəzalandırılsınlar. Qanunsuz yolla pensiya təyin edən şəxslər müəyyən edilməlidir. Aidiyyəti qurumlarda çalışan həmin şəxslər müvafiq qaydada dövlətə dəymiş ziyanı cərimə şəklində ödəyə bilərlər”.
Günel CƏLİLOVA
