Aydın Hüseynov: “Kənd təsərrüfatının inkişaf etdirilməsi, ölkənin ərzaq təhlükəsizliyinin təmin olunması, ixracyönümlü, rəqabətqabiliyyətli aqrar məhsulların istehsalı üçün təbii şərait və su təminatı ilə yanaşı, müasir texnikalardan istifadə mühüm şərtdir”
Qeyri-neft sektorunun inkişafında kənd təsərrüfatının payı nə qədərdirsə, aqrar sahənin üzərinə düşən vəzifələrin öhdəsindən gəlmək üçün müasir texnika və avadanlıqların rolu da o səviyyədədir. Həqiqətən indiki vaxtda kənd təsərrüfatı məhsullarının istehsalını, məhsuldarlığı artırmaq üçün yeni texnika və avadanlıqsız keçinmək mümkün deyil.
Aqrar sahənin inkişaf etdirilməsi üçün hökumət tərəfindən mütəmadi olaraq sahibkarlara dəstək göstərilir. Bu sahədə bir sıra stimullaşdırıcı tədbirlər həyata keçirilir. Danılmaz faktdır ki, artıq uzun illərdir Azərbaycanda fermerlərə güzəştli kreditlər ayrılır, “Aqrolizinq” Açıq Səhmdar Cəmiyyəti tərəfindən gətirilən texnikalar əlverişli şərtlərlə sahibkarlara icarəyə verilir.
Məlumdur ki, Nazirlər Kabinetinin 2014-cü il 13 avqust tarixli Qərarına əsasən, “Aqrolizinq” ASC tərəfindən yeni alınan, lizinqə verilən və lizinq yolu ilə satılan texnikaya güzəştlərin tətbiq edilməsi qaydaları təsdiq edildikdən sonra texnikanın dəyərinin 40 faizi həcmində fermerlərə güzəştin verilməsi onların texnika təminatında ciddi dönüş yaradıb. Bu güzəşt nəticəsində kənd təsərrüfatı texnikasını lizinqə götürmək və almaq istəyən fermer, sahibkar və kənd təsərrüfatı məhsulları istehsalçılarının sayında böyük dinamika müşahidə olunur. Məsələn, 2005-2013-cü illərdə cəmi 5718 fiziki və hüquqi şəxs texnika almaq üçün ASC-yə müraciət edibsə, Nazirlər Kabinetinin qərarından ötən dövrdə (2014-2016-cı illər) belələrinin sayı əvvəlki 9 ildə lizinq alanların sayının 62 faizindən çox olub.
Son illər ərzində Azərbaycan kənd təsərrüfatının müasir texnologiya və texnoloji aavadanlıqlarla təminatı barəsində danışan Milli Məclisin Aqrar siyasət komitəsinin üzvü, millət vəkili Aydın Hüseynov “Bakı-Xəbər”ə açıqlamasında qeyd etdi ki, aqrar sahənin inkişaf etdirilməsi ölkə iqtisadiyyatının prioritet istiqamətlərindən biridir: “Xüsusilə də qeyri-neft sektoru sahəsində kənd təsərrüfatı önəmli rol oynayır. Kənd təsərrüfatının inkişaf etdirilməsi, ölkənin ərzaq təhlükəsizliyinin təmin olunması, ixracyönümlü, rəqabətqabiliyyətli aqrar məhsulların istehsalı üçün təbii şərait və su təminatı ilə yanaşı, müasir texnikalardan istifadə mühüm şərtdir”.
Millət vəkilinin sözlərinə görə, Kənd Təsərrüfatı Nazirliyinin tabeliyində “Aqrolizinq” fəaliyyət göstərir. Həmin qurum vasitəsilə sahibkarlara, fermerlərə kənd təsərrüfatı avadanlıqları icarəyə verilir. Bu sahəyə dövlət tərəfindən mütəmadi olaraq köməklik göstərilir: “Həmçinin, onu da demək lazımdır ki, dövlət vasitəsilə müasir kənd təsərrüfatı avadanlıqlarının alınması ilə bağlı görülən işlər davam etdirilir”.
Günel CƏLİLOVA
