Pərviz Heydərov: “…çox böyük gözləntilər var”
2018-ci ilin yanvar-fevral aylarında ölkənin ümumdaxili məhsulu əvvəlki ilin eyni dövrünə nisbətən 1,3 faiz artaraq 11541,5 milyon manat təşkil edib. Açıqlanan statistik rəqəmlərə əsasən, ÜDM istehsalının 48,3 faizi sənaye, 9,6 faizi ticarət; nəqliyyat vasitələrinin təmiri sahələrində, 6,5 faizi nəqliyyat və anbar təsərrüfatı sahələrində, 6,2 faizi tikintidə, 2,7 faizi kənd təsərrüfatı, meşə təsərrüfatı və balıqçılıq, 2,6 faizi turistlərin yerləşdirilməsi və ictimai iaşə, 1,6 faizi informasiya və rabitə sahələrində, 15,9 faizi digər sahələrdə istehsal olunub, məhsula və idxala xalis vergilər isə ÜDM-in 6,6 faizini təşkil edib.
2017-ci ilin ilk iki ayı ilə müqayisədə iqtisadiyyatın qeyri-neft sektorunda istehsal olunmuş əlavə dəyər 2,3 faiz artıb, neft sektorunda isə eyni səviyyədə qalıb.
Ötən ilin əvvəli ilə müqayisədə ölkə iqtisadiyyatının 1,3 faiz inkişafı barədə danışan iqtisadçı-ekspert Pərviz Heydərov “Bakı-Xəbər”ə açıqlamasında qeyd etdi ki, 2017-ci ildən etibarən ölkə iqtisadiyyatında tənəzzül prosesi dayanıb: “Məlum olduğu kimi, əvvəlki illərdə iqtisadiyyatda tənəzzül qeydə alındı. Bu da dünya bazarında neftin qiymətinin dəyişməsi ilə əlaqədardır. Lakin hökumətin vaxtında gördüyü tədbirlər nəticəsində 2016-cı ilin ikinci yarısından etibarən iqtisadiyyatda inkişaf hiss olunmağa başladı. Bu hal 2017-ci il üçün iqtisadiyyatda bərpa prosesinin başlaması haqqında proqnozlar irəli sürməyə imkan yaratdı. Bəllidir ki, ötən il ərzində ümumdaxili məhsul istehsalında 0,1 faiz artım qeydə alınıb. Bu isə o deməkdir ki, cari il ərzində iqtisadi artımın daha da genişlənməsi üçün əlverişli zəmin mövcuddur. Çünki ölkədən kənar bir sıra məhsulların qiymətində stabillik müşahidə olunur. O cümlədən, Azərbaycanla qarşılıqlı ticarət əlaqələrində olan ölkələrin də valyutalarında sabitlik hökm sürür. Həmin ölkələrin iqtisadiyyatında stabilləşmə prosesi yaşanır. Tənəzzül qeydə alınan yerlərdə Azərbaycan hökumətinin vaxtında gördüyü tədbirlər nəticəsində bu il üçün iqtisadi artımın yüksək qeydə alınacağı barədə çox böyük gözləntilər var”.
Həmsöhbətimiz onu da bildirdi ki, ölkədə görülən işlər sayəsində qarşıdakı illərdə iqtisadi inkişaf daha da artacaq.
Günel CƏLİLOVA
