Fikrət Yusifov: “Ötən ildə və cari ilin iki ayı ərzində qeyri-neft sənayesi, aqrar sektor daha üstün inkişaf edib”
Artıq sübut olunmuş həqiqətdir ki, şaxələndirilmiş və dayanıqlı iqtisadiyyatın əsasını sabit əlverişli makroiqtisadi mühit təşkil edir. Müşahidələr göstərir ki, böhranla əlaqədar dünya ölkələrində makroiqtisadi sabitliklə bağlı ciddi problemlər qalmaqdadır. Ancaq bundan fərqli olaraq Azərbaycanda makroiqtisadi sabitlik təmin edilib. Bununla bağlı yaranan çətinliklər həll olunub.
Təsadüfi deyil ki, ötən illər ərzində Azərbaycan Dünya İqtisadi Forumunun Qlobal Rəqabətlilik Hesabatında dünyanın 10 ən sabit makroiqtisadi mühitə malik ölkələri arasında qərarlaşıb. Görünən odur ki, Azərbaycanda reallaşdırılan iqtisadi islahatlar ölkənin qlobal reytinq göstəricilərinin əhəmiyyətli yüksəlməsi ilə də müşayiət olunub. Azərbaycanda sosial-iqtisadi inkişafı sürətləndirən mühüm amillərdən biri qarşıya qoyulan hər bir hədəfin reallaşdırılması üçün konkret fəaliyyət proqramlarının işlənib hazırlanmasıdır. Bunun nəticəsidir ki, ölkədə makroiqtisadi sabitlik təmin olunub. Regionların sosial-iqtisadi inkişafına dair dövlət proqramlarının icrasının əhəmiyyətini xüsusi qiymətləndirmək lazımdır. Nəticədə qısa zaman ərzində ölkə iqtisadiyyatında mütərəqqi inkişaf meylləri özünü göstərməyə başlayıb. Bu çərçivədə atılan ardıcıl addımlar, Azərbaycanda işsizlik probleminin aradan qaldırılması, regionların tarazlı inkişafı, qeyri-neft sektoruna diqqətin artırılması, sahibkarlığın inkişafı yeni iş yerlərinin açılması istiqamətində konkret nəticələrlə müşayiət olunub. Onu da qeyd edək ki, son illərdə ölkədə qeyri-neft sektorunun inkişafında mühüm rol oynayan xarici investisiyalar üçün də əlverişli münbit şərait yaradılıb. Çünki Azərbaycanda ümumdaxili məhsulun və xarici ticarət dövriyyəsinin daim artımı, ixtisaslı əmək ehtiyatlarının çoxluğu ölkənin beynəlxalq ticarət təşəbbüslərində fəal iştirakına stimul verir. Azərbaycanda davamlı iqtisadi inkişafı təmin edən ən mühüm şərtlərdən biri sahibkarlığın inkişaf etdirilməsi, biznes və investisiya mühitinin davamlı olaraq yaxşılaşdırılmasıdır. Sahibkarlığın inkişafı, özəl bölmənin tərəqqisi Azərbaycan hökumətinin prioritetlərindən biridir. Bu məqsədlə mütərəqqi qanunvericilik bazası möhkəmləndirilir, bu sahəyə səmərəli dövlət dəstəyi mexanizmləri formalaşdırılır. Beynəlxalq təcrübədə uğurla sınaqdan çıxan modellər, mexanizmlər tətbiq olunur. Eyni zamanda, investorların hüquqları etibarlı şəkildə qorunur, inzibati prosedurlar sadələşdirilir.
Maraqlıdır, bəs ekspetlər buna necə yanaşırlar? Yəni dünya ölkələrində makroiqtisadi sabitliklə bağlı problemlərin yaşandığı bir dövrdə Azərbaycanda makroiqtisadi sabitliyə necə nail olunub?
Məsələyə münasibət bildirən “Ekonomiks” Beynəlxalq İqtisadi Araşdırmalar Birliyinin sədri, iqtisad elmləri doktoru, professor Fikrət Yusifov bunu bir sıra amillərlə əlaqələndirdi: “Azərbaycanda makroiqtisadi sabitlik ilk növbədə son illər ərzində hökumətin reallaşdırdığı iqtisadi strategiya nəticəsində mümkün olub. Bu strategiyanın ana xəttini ölkə iqtisadiyyatının qeyri-neft sektorunun daha sürətlə inkişaf etdirmək təşkil edir. Son iki ildən artıq bir dövrdə hökumət ölkədə real sektorun sürətlə inkişafını təmin edə biləcək çox ciddi qərarlar qəbul edib. Bu qərarlara uyğun olaraq da zəruri addımlar atılıb. Nəticələr artıq özünü göstərməyə başlayıb. Ötən ildə və cari ilin iki ayı ərzində qeyri-neft sənayesi, aqrar sektor daha üstün inkişaf edib. Eyni zamanda, real sektorun digər sahələrində də yaxşı nəticələr əldə olunub. Bu sıraya xüsusilə turizm və tranzit yükdaşımalar sahəsində əldə olunan nəticələri əlavə etmək lazımdır. Azərbaycan manatı son bir ildə tam sabitlik nümayiş etdirir. Dünya bazarlarında neftin qiymətlərinin yüksəlməsi və bunun hesabına ölkənin valyuta ehtiyatlarının artması makroiqtisadi sabitliyin təmin edilməsində aparıcı rol oynayır. Hesab edirəm ki, Azərbaycan iqtisadiyyatında müsbət tendensiya bundan sonra da davam edəcək”.
Vidadi ORDAHALLI
