Flora Qasımova: “Ölkə əhalisinin fasiləsiz içməli su ilə təminatı həm onları bir sıra məişət qayğılarından azad edib, həm də əhalinin sağlamlığının qorunmasına, yaşayış məntəqələrində antisanitariya vəziyyətinin aradan qaldırılmasına təsir edib”
"Ölkə üzrə fasiləsiz içməli su ilə təminat 67 faizə çatıb". Bu barədə Prezident İlham Əliyev yanvarın 29-da Heydər Əliyev Mərkəzində keçirilən “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının dördüncü ilinin yekunlarına həsr olunan konfransda giriş nitqində deyib.
"2004-cü ildə ölkə üzrə fasiləsiz içməli su ilə təminat 26 faiz idi, hazırda bu, 67 faizə çatıb, Bakı şəhərində 81, bölgələrdə isə 43 faizdir. Ona görə bu sahəyə bu il və gələcək illərdə böyük sərmayə qoyuluşu nəzərdə tutulur ki, biz bu məsələni də həll edək. Demək olar ki, bir çox şəhərlərimizdə içməli su və kanalizasiya layihələri uğurla başa çatıb. Oğuz-Qəbələ-Bakı kimi nəhəng su kəməri, - bu da tarixi hadisədir, - inşa edilib. Ceyranbatanda dünyanın ən böyük sutəmizləyici qurğusu tikilib. Bu gün bu qurğudan çıxan sular keyfiyyətinə görə Dünya Səhiyyə Təşkilatının standartlarına cavab verir", - dövlət başçısı qeyd edib.
Ölkənin fasiləsiz içməli su təminatının 67 faizə yüksəlməsi insanların sağlamlığına nə kimi rol oynayır?
Millət vəkili Flora Qasımova “Bakı-Xəbər”ə açıqlamasında qeyd etdi ki, su həyat və sağlamlıq mənbəyidir. Bu baxımdan ölkənin su təchizatının yaxşılaşması yönündə mühum işlər görülüb və görülməkdə davam edir: “Müxtəlif illərdə Prezident İlham Əliyevin iştirakı ilə bölgələrdə yeni su xətlərinin istifadəyə verilməsi mərasimi keçirilib. Beləliklə də əhalinin bir hissəsi içməli su ilə təmin edilib. Demək olar ki, Azərbaycanın əksər yerində insanlar içməli su ilə təmin olunur. İçməli su təminatının 26 faizdən 67 faizə yüksəlməsi əhalidə böyük məmnunluq yaradır, həmçinin, ekologiyanın, torpaqların çirklənməsinin də qarşısını alır”.
Həmsöhbətimizin sözlərinə görə, ölkə əhalisinin fasiləsiz içməli su ilə təminatı həm onları bir sıra məişət qayğılarından azad edib, həm də əhalinin sağlamlığının qorunmasına, yaşayış məntəqələrində antisanitariya vəziyyətinin aradan qaldırılmasına təsir edib.
Onun fikrincə, içməli su layihələri bir çox şəhərlərdə artıq icra edilib, 24 saat fasiləsiz təmiz, Dünya Səhiyyə Təşkilatının standartlarına uyğun içməli su verilir. Bu layihələr davam edəcək. Regionların hər birində əhaliyə 24 saat fasiləsiz, təmiz içməli su verilməlidir. Bununla bərabər, çaylar boyu yerləşən kəndlərdə təmizləyici qurğular yaradılıb: “Regionların sosial-iqtisadi inkişafı dövlət proqramlarına uyğun olaraq bölgələrin içməli su təchizatı və kanalizasiya infrastrukturu yenidən qurulur. Artıq su və kanalizasiya layihələrinin icra olunduğu şəhərlər və rayon mərkəzlərinin sayı günü-gündən artır”.
Günel CƏLİLOVA
