Fikrət Yusifov: “100 min hektar suvarılmayan torpaqlara su verilməsi aqrar sektorda məhsul istehsalı həcmini artırmağa, daxili bazarda məhsul tələbatını tam şəkildə ödəməyə və ixrac potensialını genişləndirməyə zəmin yaradacaq”
“Bu il ən azı 100 min hektar suvarılmayan torpaqlara su verilməlidir. Beləliklə, biz 2017-2018-ci illərdə 200 mindən çox hektara suyun təminatını təşkil edəcəyik”. Bunu Prezident İlham Əliyev regionların 2014-2018-ci illərdə sosial-iqtisadi inkişafı Dövlət Proqramının icrasının dördüncü ilinin yekunlarına həsr olunmuş konfransdakı nitqində deyib.
Bir neçə önəmli kanal layihələrinin icra ediləcəyini diqqətə çatdıran Prezident İlham Əliyev bildirib ki, bunun üçün Dövlət İnvestisiya Proqramında kifayət qədər vəsait nəzərdə tutulur. “Dövlət İnvestisiya Proqramında bu məsələ ilə bağlı olan bütün layihələr ilin sonuna qədər icra edilməlidir. Meliorativ tədbirlərin yaxşılaşdırılması və sudan səmərəli istifadə edilməsi üçün pivot suvarma sistemlərinin geniş tətbiqi təmin olunmalıdır. Bu məqsədlə ölkəmizdə pivot qurğularının istehsalı təşkil olunur ki, artıq xaricə vəsait getməsinin qarşısını alaq və özümüzü bu qurğularla özümüz təmin edək. Fermer təsərrüfatlarında, xüsusilə böyük aqroparklarda bu sistemlərdən mütləq istifadə olunmalıdır. Çünki bu, məhsuldarlığı böyük dərəcədə artırır və sudan səmərəli istifadə olunmasına imkan yaradır”, - deyə dövlət başçısı qeyd edib.
Bu il ərzində 100 min hektar suvarılmayan torpaqlara su verilməsinin vacibliyi barədə danışan “Ekonomiks” Beynəlxalq İqtisadi Araşdırmalar Birliyinin sədri, iqtisad elmləri doktoru, professor Fikrət Yusifov “Bakı-Xəbər”ə açıqlamasında qeyd etdi ki, qeyri-neft sektorunun inkişafı istiqamətində hökumət tərəfindən son iki il ərzində çoxlu sayda qərar qəbul edilib. Bu sahədə çox ciddi addımlar atılıb. Aqrar sahənin inkişafı ilə bağlı görülən hər bir işi xüsusi qeyd etmək lazımdır: “Nəzərə almaq lazımdır ki, biz aqrar ölkəyik. Bu səbəbdən də kənd təsərrüfatının inkişaf perspektivləri çox yüksəkdir. Buna görə də ölkə başçısı İlham Əliyev aqrar sahənin inkişafını xüsusi olaraq diqqətdə saxlayır. Məlumat üçün bildirim ki, son 14 il ərzində ölkədə 4 böyük su anbarı tikilib. Bu su anbarlarının tikilib istifadəyə verilməsi nəticəsində suvarılan sahələrin həcmi artıb. Vaxtilə istifadə olunmuş, sonradan istifadəsi dayandırılmış torpaqların əkin dövriyyəsinə qaytarılması prosesi yaşanır. Ötən il 100 min hektar əkin sahəsinin dövriyyəsi baş tutdu. Bu il də əlavə olaraq 100 min hektar torpağın əkin dövriyyəsinə verilməsi məsələsi artıq hədəf kimi müəyyən olunub. 4 böyük su anbarının tikilməsi və infrastruktur imkanlarının formalaşdırılması şərait yaradacaq ki, vaxtilə istifadə olunmuş torpaq sahələri yenidən əkin dövriyyəsinə daxil edilsin”
Həmsöhbətimizin fikrincə, 100 min hektar suvarılmayan torpaqlara su verilməsi aqrar sektorda məhsul istehsalı həcmini artırmağa, daxili bazarda məhsul tələbatını tam şəkildə ödəməyə və ixrac potensialını genişləndirməyə zəmin yaradacaq .
Günel CƏLİLOVA
