Günel Fərhadqızı: “Bu sahədə maarifləndirmənin aparılması güclənməlidir” “Təmaslar olmasa, kimin nə istədiyini və kimin nə etməli olduğunu koordinasiya etmək də çətin olacaq”
“Əhalinin artımı daim yeni iş yerlərinin yaradılmasını tələb edir. Hesab edirəm ki, keçən il bu istiqamətdə rekord nəticə əldə edilmiş, 177 min daimi iş yeri açılmışdır. Bu il də, əlbəttə ki, bu istiqamətdə işlər görüləcək. Bizim planlarımız, bölgələrə və böyük şəhərlərə qoyulan investisiyalar, əslində, iş yerlərinin yaradılmasını təmin edir. Böyük tikinti və infrastruktur layihələri, sənaye obyektlərinin işə düşməsi, əlbəttə ki, iş yerlərinin açılmasına şərait yaradır”.
Bunu Prezident İlham Əliyev yanvarın 29-da “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının dördüncü ilinin yekunlarına həsr olunan konfransda yekun nitqində deyib.
Dövlət başçısı bildirib ki, özünüməşğulluq proqramı daha da böyük həcmdə icra olunacaq: “Bu proqramı biz, demək olar ki, keçən il icra etməyə başlamışıq. İlkin nəticələr müsbətdir. Bu il isə atılan addımlar, aparılan islahatlar nəticəsində kifayət qədər böyük - 30 milyon manatdan çox vəsait olacaq və 6 min, bəlkə də 7 min ailə özünüməşğulluq proqramına cəlb ediləcək. Bu həm iqtisadi, həm də psixoloji cəhətdən çox gözəl layihədir, gözəl təşəbbüsdür. Çünki bu gün hələ də ağır vəziyyətdə yaşayan, dövlətdən sosial yardım alan vətəndaşlar özləri pul qazanacaqlar, öz ailələrini halal zəhmətləri ilə dolandıracaqlar və öz həyatlarını quracaqlar. Dövlət isə öz dəstəyini göstərəcək, lazım olan texnikanı, vasitələri pulsuz verəcək ki, onlar öz işlərini qura bilsinlər. Əgər biz hər il 6-7 min ailə üçün belə şərait yaratsaq, onda sosial yardıma heç kimin ehtiyacı olmayacaq”.
Prezident qeyd edib ki, “Ailə Biznesinə Asan Dəstək” layihəsi sürətlə inkişaf edəcək: “ABAD” mərkəzlər artıq yaradılır və mən, ümumiyyətlə, bu şəraitlə, imkanlarla tanış olmuşam. Bu da çox gözəl təşəbbüsdür. Bu, fermerlərə, ailə təsərrüfatlarına imkan verir ki, öz məhsullarını müasir formada yerli və xarici bazarlara çıxarsınlar. Yenə də dövlət bütün öhdəliyi, bütün yükü öz üzərinə götürür. Fermerlərə, ailələrə konteynerlər, metodik tövsiyələr verilir, şərait yaradılır ki, onlar öz həyatlarını daha da yaxşılaşdıra bilsinlər. Bu günə qədər bu imkanlardan yararlanan fermerlər yaxşı məhsul istehsal edirlər. Bal, mürəbbə, ət və süd məhsulları, suvenirlər istehsal olunur”.
Dövlət başçısı vurğulayıb ki, böyük biznes şirkətləri bu sahədə daha fəal olmalıdırlar: “Mən həm dövlət, həm özəl şirkətlərə müraciət edərək onları bu işlərə dəvət etmək istəyirəm. Ümumiyyətlə, mən biznesin sosial məsuliyyəti məsələləri ilə bağlı dəfələrlə öz fikirlərimi bildirmişəm. Dövlət iş adamlarına bu qədər şərait yaradır, həm siyasi dəstək, həm də maliyyə dəstəyi göstərir, iki milyard manatdan çox güzəştli kreditlər verilib. Fermerlərə bu qədər güzəştlər edilir, yanacaq, gübrə, subsidiyalar, texnika dövlət tərəfindən verilir. Fermerlər vergilərdən azaddırlar, təkcə torpaq vergisindən başqa. Ölkəmizdə biznes mühitinin yaxşılaşdırılması, islahatların aparılması istiqamətində bu qədər işlər görülür və beynəlxalq qurumlar da bunu qeyd edirlər. Bunun müqabilində iri biznes qurumları gərək öz sosial məsuliyyətini dərk etsinlər. Sosial məsuliyyət təkcə hansısa xeyriyyəçiliklə məşğul olmaq deyil. Sosial məsuliyyət, eyni zamanda, kiçik biznesə, ailə biznesinə dəstək göstərməkdir. Ona görə mən Prezident Administrasiyasına, müvafiq nazirliklərə, İqtisadiyyat Nazirliyinə, Kənd Təsərrüfatı Nazirliyinə, digər aidiyyəti qurumlara tapşırıram ki, bu məsələ ilə bağlı təkliflər hazırlasınlar. Bəlkə böyük biznes şirkətləri ilə bir görüş keçirsinlər və onları ailə biznesinə dəstək üçün bu proqrama cəlb etsinlər. Bu, ədalətli olar. Böyük şirkətlər, xüsusilə dövlətdən, dövlət siyasətindən yararlanıb böyük vəsait əldə edən şirkətlər kiçik sahibkarlara dəstək verməlidirlər”.
Göründüyü kimi, Prezident böyük biznes sahiblərini sosial məsuliyyətə dəvət edib və bunun necə olmasını izah edib. Bu tələbin yerinə yetirilməsi üçün hansı addımların atılması zəruridir?
İqtisadçı Günel Fərhadqızı qəzetimizə açıqlamasında bildirdi ki, Prezidentin bu təklifi olduqca vacibdir: “Dövlət başçısı həssas məqama toxunub. İqtisadiyyatın bel sütununu orta biznes təşkil edir. Bu, eyni zamanda, orta təbəqəni formalaşdırır. Ölkə başçısı haqlı olaraq qeyd edir ki, böyük şirkətlərin inkişafı üçün dövlət tərəfindən münbit şərait yaradılıb. Həmin güzəştlərin və dəstəyin nədən ibarət olduğunu ölkə başçısı bildirib. Məhz yürüdülən bu cür ardıcıl, güzəştli siyasətin nəticəsidir ki, ölkəmizdə böyük biznes adamları formalaşıb və onların idarə etdiyi şirkətlər yaradılıb. İqtisadiyyatda təmərküzləşmənin olması təbiidir. Yəni get-gedə rəqabətdə böyük şirkətlər digərlərindən önə çıxır. Ancaq bu heç də o demək deyil ki, onlar yalnız özlərini düşünməlidirlər. Azərbaycanda özəl sahibkarlığın inkişafına tamamilə fərqli münasibət var. Ölkə başçısının sadaladığı güzəştlər nadir ölkələrdə ola bilər. Bunu dövlət milli burjuaziyanın formalaşması üçün edib. Gənc ölkə olmağımıza baxmayaraq, biz iqtisadi sahədə ciddi uğurlara imza atmışıq. Yəni bizim bir çox iri şirkətlərimiz ayaq üstə durmağı bacarıb. İndiki mərhələdə onlar sosial məsuliyyətlərini dərk etməlidirlər. Ölkə başçısı haqlı olaraq qeyd etdi ki, bunu yalnız xeyriyyəçilik kimi anlamaq lazım deyil. Yəni hərdən kimlərəsə nəsə paylamaqla iş bitmir. Yerlərdə ailə bizneslərinin inkişafı üçün böyük şirkətlərin dəstəyi vacibdir. Pilot layihələr kimi bəzi işlər görülüb və yaxşı da nəticə verib. Bunu inzibati yolla etmək də olmaz. Hesab edirəm ki, bu sahədə maarifləndirmənin aparılması güclənməlidir. Böyük şirkətlərə məsələnin mahiyyəti daha aydın şəkildə izah edilməlidir. Onların kiçik biznes nümayəndələrilə görüşlərini intensivləşdirmək lazımdır. Təmaslar olmasa, kimin nə istədiyini və kimin nə etməli olduğunu koordinasiya etmək də çətin olacaq. Belə sosial məsuliyyət hər bir böyük Azərbaycan şirkətinin üzərinə düşür. Çünki ölkədəki münbit şəraitdən yararlanaraq varlanıblar. İndi bir az da xərcləmək lazımdır ki, digər sahələr də inkişaf etsin. Əminəm ki, Prezidentin çağırışından sonra bu sahədə ciddi irəliləyiş olacaq”.
Regionların sosial-iqtisadi inkişafı üzrə Dövlət Proqramı Prezident İlham Əliyevin müəllifi olduğu və çox uğurla həyata keçirilən mükəmməl iqtisadi strategiyadır. Bunu “Trend”ə Milli Məclisin deputatı Aydın Hüseynov deyib. A.Hüseynov bildirib ki, sosial-iqtisadi inkişafa yönəlmiş dövlət proqramlarının həyata keçirilməsi birbaşa neftdən gələn gəlirlərin çox düzgün yerləşdirilməsi, infrastrukturların yenilənməsi və bütövlükdə ölkə iqtisadiyyatının inkişafını təmin etmiş oldu: “İqtisadiyyatımız 14 il ərzində 3.2 dəfə artıb. Bu nailiyyətlər dövlət proqramlarının icrasının nəticəsidir. Böyük nailiyyətlərimizin əsasında Prezident İlham Əliyevin müəllifi olduğu mükəmməl dövlət proqramları və eyni zamanda, bu proqramların, görülən işlərin və nəticələrin dövlət başçısı tərəfindən daim nəzarətdə saxlanması dayanır”.
Deputat vurğulayıb ki, Prezident İlham Əliyev yanvarın 29-da Heydər Əliyev Mərkəzində “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının dördüncü ilinin yekunlarına həsr olunan konfransda çıxışı zaman sosial məsuliyyətlə bağlı sahibkarlara öz tövsiyələrini verdi.
A.Hüseynov qeyd edib ki, dövlət sahibkarlar üçün hər cür şərait yaradıb, onlara güzəştli kreditlər verilir: “Dövlətin dəstəyindən faydalanan sahibkarlar da gərək öz sosial məsuliyyətlərini dərk etsinlər, kiçik sahibkarlığın inkişafına öz töhfələrini versinlər”.
Məhəmmədəli QƏRİBLİ
