Qulu İsmayılov: “Bu amillərə əməl olunacağı təqdirdə daha yaxşı nəticələr əldə ediləcək”
Yanvarın 29-da Heydər Əliyev Mərkəzində “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının dördüncü ilinin yekunlarına həsr olunan konfrans keçirilib. Azərbaycan Respublikasının Prezidenti İlham Əliyevin də iştirak etdiyi həmin konfransda Azərbaycan regionlarının sosial-iqtisadi inkişafı Dövlət Proqramının icrası müzakirə edilib və gələcəkdə görülməsi zəruri olan işlərdən danışılıb.
Ölkə başçısı bildirib ki, bütövlükdə, Azərbaycan regionlarının sosial-iqtisadi inkişafı dövlət proqramlarının icrası çox uğurla gedir: “Üçüncü proqram da uğurla icra edilir, qarşımızda duran bütün vəzifələr icra edilir və artıqlaması ilə icra edilir. Deməliyəm ki, birinci proqramın qəbul edilməsi tarixi hadisə idi. Həyat bunu əyani şəkildə göstərir. 2004-cü ilin əvvəllərində qəbul edilmiş proqram, demək olar ki, Azərbaycan regionlarında dönüş yaratdı. Azərbaycan regionlarının sürətli inkişafı məhz birinci proqramın icrası ilə bağlı idi.
Mən 2003-cü ildə Prezident seçkiləri ərəfəsində bəyan etmişdim ki, əgər Azərbaycan xalqı mənə etimad göstərərsə, ilk növbədə, Azərbaycan regionlarının problemləri ilə məşğul olacağam. Söz vermişdim ki, Azərbaycan regionlarında sosial-iqtisadi inkişaf sürətlə gedəcək. Son 14 il ərzindəki reallıqlar bunu göstərir ki, verilən bütün vədlər artıqlaması ilə yerinə yetirildi”.
Tədbirdə bir neçə rayonun icra başçısı çıxış edib və proqram çərçivəsində rəhbərlik etdikləri rayonlarda görülən işlərlə bağlı hesabatlar veriblər. Ölkə başçısı yekun nitqində proqramın icra edilməsilə bağlı icra hakimiyyətlərinin roluna da toxunub: “Bu gün bölgələrə sərmayə qoyan daha çox yerli iş adamlarıdır. Əlbəttə, burada təbii ki, iqlim amili də var. İndi hansısa məhsulu yetişdirmək üçün müəyyən bir regionda sərmayə qoyulmalıdır. Eyni zamanda, rayonlarda yaşanan mühit, mövcud olan ab-hava, investisiya iqlimi də rol oynayır. Ona görə yerli icra orqanları bu işlərdə daha fəal olmalıdırlar”.
Prezident sonda icra başçılarına daha aktiv fəaliyyət göstərməyin zəruriliyini bildirib. Ümumən rayonların inkişaf proqramlarının yerinə yetirilməsində yerli icra hakimiyyəti orqanlarının rolunu necə qiymətləndirmək olar?
Ekspert Qulu İsmayılov qəzetimizə bildirdi ki, bundan qabaqkı toplantıda icra başçılarının qarşısına müvafiq tapşırıq qoyulmuşdu: “Təbii ki, söhbət regionların inkişafından gedirsə, burada prosesin ən vacib halqası yerli icra hakimiyyətləridir. Dövlət üzərinə düşəni edir. Lazımi infrastruktur layihələrinin icrasına külli miqdarda pul ayırır. Ancaq bununla da kifayətlənmək olmaz. Bilirsiniz ki, bizim olduqca əlverişli iqlim şəraitimiz və münbit torpaqlarımız var. İcra hakimiyyətləri ora investisiya cəlb edə bilərlər. Bu tapşırıq keçən toplantıda verilmişdi. Gördünüz ki, Prezidentin əlində hansı rayonun özünü necə göstərməsi ilə bağlı siyahı vardı. Nəticələr elan olunandan sonra məlum oldu ki, bəzi rayonlar bu istiqamətdə ciddi fərqləniblər. Təbii ki, belə nəticələrin əldə olunması üçün gərgin əmək sərf etmək lazımdır. Ən əsası da rayonda elə mühit yaradılmalıdır ki, ora investisiya qoyulmasında maraqlı olsunlar. Bundan əlavə, qarşıya qoyulan tapşırıqların icrası həm də intizamlı idarəetmə tələb edir. Bir çox layihələrin icrası, abadlıq işlərinin aparılması ilə bağlı məsuliyyətin böyük hissəsi icra hakimiyyətlərinin üzərinə düşür. Konkret rəqəmlər açıqlanmadığı üçün, biz hansı rayonun bu sarıdan geridə olduğunu söyləyə bilmərik. Ancaq ümumi anlamda deyə bilərəm ki, bəzi rayonlarda proqramın icrası lazımi şəkildə həyata keçirilməyib. Təbii ki, nəticələri qənaətbəxş olmayan həmin rayonlar barədə ciddi ölçü götürüləcək. Qarşıya qoyulan proqramın uğurlu alınması üçün icra hakimiyyətləri daha da məhsuldar iş ortaya qoymalıdırlar. Bura investisiya cəlb etmək bacarığı, rayonun idarə olunmasına düzgün kadr seçimi, nizam-intizamlı idarəetmə, xarici əlaqələrin yaxşı qurulması və inzibati idarəetmədə süründürməçiliyin olmaması aiddir. Bu amillərə əməl olunacağı təqdirdə daha yaxşı nəticələr əldə ediləcək”.
Məhəmmədəli QƏRİBLİ
