Əli Əlirzayev: “Sözügedən rayonların inkişafı ətraf rayonların da iqtisadi inkişafına təkan verəcək”
“Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının dördüncü ilinin yekunlarına həsr olunan konfransda Prezident İlham Əliyev ötən ilin nəticələrinə görə ən çox investisiya yatırılan rayonları sadalayıb.
Onun sözlərinə görə, ötən ilin nəticələrinə əsasən, 5 rayonda investisiya layihələrinin ümumi məbləği 100 milyon manatı keçəcək: “Keçən il sərmayə qoyuluşuna görə ilk onluğa aşağıdakı rayonlar daxil edilib - Salyan, Qəbələ, Qazax, Lənkəran, Abşeron, Ağstafa, Sumqayıt, Xaçmaz, Gəncə, İsmayıllı. Keçən il ən çox investisiyalar bu rayonlara qoyulub. Ancaq ümumi həcminə görə 100 milyon manatdan çox olan sərmayə layihələri beş rayonda icra ediləcək. Onların arasında birinci yerdə Abşeron rayonudur. Qoyulacaq sərmayənin həcmi 250 milyon manat səviyyəsində gözlənir. İkinci yerdə Sumqayıt şəhəridir, 186 milyon manat. Üçüncü yerdə Saatlı rayonudur, 152 milyon manat. Dördüncü yerdə Salyan rayonudur, 126 milyon manat. Beşinci yerdə Qəbələ rayonudur, 116 milyon manat. Yəni həcmi 100 milyon manatdan artıq olan layihələr rayon üçün, əlbəttə ki, çox yaxşı rəqəmdir”.
Dövlət başçısının fikrincə, bütün bunlar çox böyük rəqəmdir və çox yaxşı göstəricidir. Həmçinin, sözügedən məsələnin ciddi təhlil ediləcəyini bildirib. O da məlum olub ki, bu işdə həm dövlət qurumları, həm də iş adamları və yerli icra orqanları birgə işləyirlər.
Ümumilikdə, 5 rayonun hər birinə 100 milyondan çox sərmayənin qoyulması həmin rayonların və ölkənin inkişafında nə kimi rol oynayacaq?
Məsələyə münasibət bildirən iqtisadçı-alim Əli Əlirzayevin sözlərinə görə, bu həm sözügedən rayonların, həm də ölkənin inkişafına müsbət təsir göstərəcək: “Rayonların sosial-iqtisadi inkişafı bir çox sahələrin inkişafından asılıdır. Bura yol infrastrukturu, sahibkarlığa kömək, məşğulluq və rayonun potensialı daxildir. Nəzərə almaq lazımdır ki, regionlar ölkənin potensialının 60 faizindən çoxunu özündə ehtiva edir. Elə sahələr var ki, mövcud iqtisadi potensialın böyük hissəsi regionlarda yerləşir. Məsələn, kənd təsərrüfatının 80 faizi regionlarda yerləşir. Eyni zamanda, emal müəssisələrinin böyük hissəsi regionlarda cəmləşib. Sumqayıt şəhərində, Abşeron, Saatlı, Salyan, Qəbələ rayonlarında həm infrastruktur, həm də iqtisadi potensial yaxşı vəziyyətdədir. Belə olan halda, qoyulan investisiyalar özünü doğruldacaq və həmin rayonlar daha da inkişaf edəcək. Rayonlar nə qədər çox inkişaf etsə, bu bir o qədər orada yaşayan insanların rifah halına müsbət təsir göstərəcək. Həmçinin, rayonların mərkəzdən asılılığını azaldacaq. Sözügedən rayonların inkişafı, ətraf rayonların da iqtisadi inkişafına təkan verəcək. Nəzərə almaq lazımdır ki, hansısa rayonda böyük zavod tikilirsə, ətraf rayonlardan da ora işləməyə gələnlərə imkan yaradır. Ona görə də rayonlara qoyulan sərmayələrin həcminin artması müsbət haldır. Nəzərə almaq lazımdır ki, qoyulan vəsait bir neçə ildən sonra öz bəhrəsini verəcək. Sərmayəni elə istiqamətlərə qoymaq lazımdır ki, həmin istiqamət rayonun iqtisadi inkişafına ciddi təsir göstərsin. Çalışmaq lazımdır ki, sahibkarlıq rayonlarda daha da çiçəklənsin. Belə olarsa, o zaman rayonlarla paytaxt arasında iqtisadi inkişaf fərqi xeyli azalacaq”.
Vidadi ORDAHALLI
