Vüqar Bayramov: “Nəticədə vətəndaşların sosial-iqtisadi vəziyyəti yaxşılaşıb”
“Maaşlar 14 il ərzində beş dəfədən çox, pensiyalar səkkiz dəfədən çox artıb və bir çox önəmli sosial layihələr icra edilib”. Məlum olduğu kimi, bunu Prezident İlham Əliyev “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının dördüncü ilinin yekunlarına həsr olunan konfransda giriş nitqində deyib.
Onun sözlərinə görə, sosial infrastrukturla bağlı böyük işlər görülüb: “3100-dən çox məktəb, 642 tibb müəssisəsi tikilmiş, yaxud təmir edilmişdir, 43 Olimpiya İdman Kompleksi inşa olunmuşdur. Bu da böyük vəsait tələb edən layihələrdir. Ancaq bu layihələr sosialyönümlü layihələrdir, ona görə investisiya proqramımızda daim bu layihələr var. Bu ilin investisiya proqramına əsasən də kifayət qədər sosial layihələr icra ediləcəkdir”.
Prezidentin açıqlamasından o da məlum olub ki, on dörd il ərzində ölkə əhalisi 1,5 milyon nəfər artıb: “Əlbəttə ki, əhali artımı hər bir ölkə üçün önəmli amildir. Eyni zamanda, bu, bizi daha da fəal işləməyə sövq etməlidir. Çünki artan əhali, eyni zamanda, bizdən buna adekvat iqtisadi inkişaf tələb edir. Biz 14 il ərzində ölkəmizdə 1,9 milyon iş yeri yaratmışıq ki, onlardan 1,4 milyonu daimi iş yeridir”.
Göründüyü kimi, ötən müddət ərzində dövlətin maddi imkanları yaxşılaşdıqca, bu, maaşların və təqaüdlərin artırılmasına şərait yaradıb. Nəticədə bu, xeyli sayda ölkə vətəndaşının sosial durumuna müsbət təsir göstərib.
Maraqlıdır, ötən müddət ərzində maaşların beş, pensiyaların səkkiz dəfədən çox artırılması əhalinin yaşayış səviyyəsinin yaxşılaşmasında özünü necə göstərib? Məsələyə münasibət bildirən iqtisadçı-ekspert Vüqar Bayramov buna bir neçə prizmadan yanaşdı. Onun fikrincə, artımlar sözügedən kateqoriyalardan olan şəxslərin sosial durumuna müsbət təsir edib: “Maaş və pensiyaların bir neçə dəfə artırılması sosial siyasətin tərkib hissəsidir. Ötən müddət ərzində əməkhaqqı və pensiyalarda artımlar müşahidə olunub. Bütün bunlar, nəticə etibarilə, əhalinin gəlirlərinə təsir göstərib. Nəticədə əhalinin gəlirləri artıb. Təbii ki, bütün bunlar sosial baxımdan vacib addımlar idi. Nəzərə almaq lazımdır ki, pensiya və maaşların artırılması vətəndaşların sosial təminatının gücləndirilməsi baxımından əhəmiyyət kəsb edir. Nəticədə vətəndaşların sosial-iqtisadi vəziyyəti yaxşılaşıb. Bir sıra regional proqramların həyata keçirildiyini nəzərə alsaq görərik ki, sosial məsələlər daim diqqət mərkəzindədir. Bu onu göstərir ki, sözügedən məsələlər hökümət üçün daim prioritet olaraq qalmaqdadır. Bu səbəbdən şərait yaranan kimi, əhalinin maaş və pensiyaları artırılır. Həmçinin, artımları inflyasiyanın təsirlərindən qorumaq üçün müəyyən tədbirlər görülür. Bunlardan biri də pensiyaların indeksasiya edilməsidir. Hesab edirəm ki, artımlar bununla məhdudlaşmayacaq. Yəni növbəti dövrlərdə də maaş və pensiyalar artırılacaq. Bu da əhalinin sosial vəziyyətinin daha da yaxşılaşmasına öz təsirini göstərəcək”.
Vidadi ORDAHALLI
