Zakir Əhmədov: “Ötən il ixrac olunan elektrik enerjisinin dəyəri 50 milyon 968 min dollar təşkil edib”
“Son 14 il ərzində Azərbaycanda 30 elektrik stansiyası tikilib. Bu müddət ərzində generasiya gücümüzün 2500 meqavat artırılmasına nail olduq. Bu il bu rəqəm 2900 meqavata çatacaq”. Bunu Prezident İlham Əliyev “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının dördüncü ilinin yekunlarına həsr olunan konfransda deyib.
Dövlət başçısı qeyd edib ki, 2004-cü ildə elektrik enerjisi idxal edilirdisə və buna görə valyuta ödənilirdisə, hazırda nəinki Azərbaycan tam şəkildə təmin edilir, eyni zamanda, elektrik enerjisi ixrac etməyə başlamışıq: “Bu məqsədlə, əlbəttə ki, həm ölkə ərazisində, həm də üç qonşu ölkə – Rusiya, İran və Gürcüstan ilə elektrik xətlərimizi birləşdirmişik. Eyni zamanda, Gürcüstan vasitəsilə Türkiyəyə də elektrik enerjisinin ixracı üçün yaxşı imkanlar mövcuddur”.
Ölkə başçısı vurğulayıb ki, energetika hər bir iqtisadiyyatın bel sütunudur, təməlidir: “Ona görə biz, ilk növbədə, bu məsələlərlə məşğul olmağa başlamışıq. Bu gün ölkəmizin uğurlu, sürətli inkişafı bu elektrik stansiyalarının mövcud olması ilə sıx bağlıdır. Biz indi sənaye istehsalımızı, iqtisadi gücümüzü artırırıq. Yeni müəssisələr, yeni yaşayış kompleksləri yaradılır, əhali artır. Biz bunların hamısını nəyin hesabına enerji ilə qidalandıra bilərdik?! Ona görə, ilk növbədə, bu məsələ həll olundu. Növbəti illərdə əminəm ki, biz elektrik enerjimizdən daha səmərəli şəkildə istifadə etməliyik və bərpa olunan enerji növlərinin inkişafı ilə bağlı addımlar atılacaq”.
Ümumilikdə, Azərbaycan elektrik enerjisinin ixracını necə reallaşdıra bilər və ekspertlər buna necə yanaşırlar? Sözügedən məsələni dəyərləndirən ekspert Zakir Əhmədovun fikrincə, Azərbaycanın bu sahədə mövcud potensialı tam istifadə edilsə, o zaman böyük həcmdə elektrik enerjisi ixrac etmək mümkündür: “Azərbaycan Gürcüstan, Türkiyə vasitəsilə bəzi Şərqi Avropa ölkələrinə elektrik enerjisi ixrac edə bilər. Çünki sözügedən ölkələrdə sənayenin inkişafı elektrik enerjisinə tələbatı artırır. Elektrik enerjisinin istehsalı ilə bağlı onların təbii mənbələri çox məhduddur. Belə olan halda, idxal olunan təbii qaz hesabına işə salınan istilik elektrik stansiyalarında əldə olunan enerji baha başa gəlir. Bu səbəbdən həmin ölkələrə elektrik enerjisinin ixracı mümkündür. O cümlədən, Rusiyanın da müəyyən subyektlərinə elektrik enerjisi ixrac etmək olar. Rəsmi məlumata görə, 2017-ci ildə Azərbaycandan 1 milyard 160 milyon 196 min kilovat/saat elektrik enerjisi ixrac olunub. Ötən il ixrac olunan elektrik enerjisinin dəyəri isə 50 milyon 968 min dollar təşkil edib. İlk baxışdan əldə olunan 50 milyon dollar az hesab oluna bilər. Ancaq ixrac artırılsa, o zaman daha çox gəlir əldə olunacaq. Nəzərə almaq lazımdır ki, keçən il ölkənin elektrik enerjisi ixracı 2016-cı illə müqayisədə 2 dəfəyədək artıb. 2016-cı ildə Azərbaycandan 28,3 milyon dollarlıq elektrik enerjisi ixrac olunub. Göründüyü kimi, arada böyük fərq var və bunu daha da artırmaq olar”.
Vidadi ORDAHALLI
