İlham Şaban: “Qeyd edim ki, “Socar Trading” başqa istiqamətlər üzrə də neft alqı-satqısı və daşınması ilə məşğul olur”
Azərbaycanın brendi olan SOCAR şirkəti yaxın vaxtlarda Qara dənizdəki Tuapse limanından Rusiyaya aid neft məhsullarının daşınması ilə məşğul olacaq. Bildirilir ki, SOCAR bununla bağlı Rusiyanın neft nəhəngi “Rosneft”lə müqavilə imzalayıb. SOCAR bu işləri “Rosneft”in təsisçisi olduğu “Cetracore Energy” şirkətilə görəcək. Şirkətdəki mənbə bildirib ki, anlaşmanın şərtlərinə görə, SOCAR bu işlərə ayın axırından start verəcək.
Şirkətin görəcəyi ilk əməliyyat 100 min tonluq sıxılmış qazı Tuapse limanı vasitəsilə Yunanıstana yola salmaq olacaq. Mənbə, həmçinin, bildirib ki, SOCAR bu həftə “Rosneft”dən alınan 60 ton yanacağın da boşaldılması işini görəcək.
Qeyd edək ki, Rusiyanın neft nəhəngi ilə SOCAR arasındakı əməkdaşlıq uzun illərdir davam edir. Hələ 2014-cü ildə “Rosneft”lə SOCAR arasında maye qazın kəşfiyyatı və çıxarılması ilə bağlı razılaşma əldə edilib. Rusiya şirkəti həm də Azərbaycanın “Abşeron” qaz yatağının işlənməsinə də maraq göstərirdi.
SOCAR-ın Rusiya neftinin də daşınması ilə məşğul olması nəyin göstəricisi sayıla bilər?
Neft məsələləri üzrə ekspert İlham Şaban qəzetimizə açıqlamasında bildirdi ki, bu məlumat barədə ətraflı izah verilmir: “Ancaq hesab edirəm ki, həmin daşınma ilə SOCAR-a yaxın olan “SOCAR Trading” məşğul olacaq. Burada qəbahətli və narahatedici nəsə görmürəm. Biz son illər ərzində “SOCAR Trading”in maliyyə portfelinə baxsaq, xeyli artım hiss edəcəyik. Ən maraqlısı isə budur ki, həmin vəsaitlərin çoxu Azərbaycan nefti ilə bağlı həyata keçirilən əməliyyatlardan deyil, üçüncü ölkələr vasitəsilə qazanılıb. Bu şirkət həm daşınmanı, həm də alqı-satqını həyata keçirir. 2018-ci ildə SOCAR-ın daha bir böyük layihəsi ərsəyə gəlir. Türkiyənin İzmir şəhərində SOCAR-ın “Star” adlı neft emalı zavodu işə düşəcək. Həmin zavodda dörd adda yanacaq istehsal ediləcək. 2019-cu ildə biz “SOCAR Trading”in bu işləri də görəcəyinin şahidi olacağıq. Novorosiyskdən yanacağın həmin zavoda daşınması işinin də sözügedən şirkətin görəcəyi gözlənir. Azərbaycan brendi olan bir şirkətin dünyanın neft bazarında belə sərbəst fəaliyyət göstərməsi bizim üçün çox sərfəli və qürurvericidir. Qeyd edim ki, “SOCAR Trading” başqa istiqamətlər üzrə də neft alqı-satqısı və daşınması ilə məşğul olur. Məsələn, Dubaydakı limandan yanacağın Asiya ölkələrinə daşınmasında da şirkət ön yerlərdədir”.
