Vahid Əhmədov: “Bu mexanizm elə işləməlidir ki, Azərbaycanda insanlara verilən qidaların tərkibində keyfiyyət cəhətdən problem olmasın”
Məlum olduğu kimi, Prezident İlham Əliyev Qida Təhlükəsizliyi Agentliyinin fəaliyyətinin təmin edilməsi ilə bağlı əlavə tədbirlər haqqında sərəncam imzalayıb.
Sözügedən sərəncama əsasən, Azərbaycan Respublikasının Qida Təhlükəsizliyi Agentliyinin maddi-texniki bazasını gücləndirmək, qida təhlükəsizliyinin təmin edilməsi ilə bağlı həyata keçirilən işlərin səmərəliliyini daha da artırmaq və sistemliliyini təmin etmək məqsədilə Azərbaycan Respublikası İqtisadiyyat Nazirliyinin, Kənd Təsərrüfatı Nazirliyinin və Səhiyyə Nazirliyinin balansında olan laboratoriyalar və onların yerləşdiyi binalar Qida Təhlükəsizliyi Agentliyinin balansına verilib. Buna baxmayaraq, sözügedən nazirliklər bu laboratoriyalardan ödənişsiz istifadə edə biləcəklər. Bununla əlaqədar hər üç qurumdan agentliyə keçəcək ştat vahidinin müəyyənləşdirilməsi Nazirlər Kabinetinə tapşırılıb.
O da məlumdur ki, ərzaq məhsullarının qlobal istehsalı artdıqca, qida təhlükəsizliyi risqi də artır. Bu da kifayət qədər mürəkkəb problemdir. Qida təhlükəsizliyi əsas ərzaq məhsullarının müəyyən hissəsini idxal edən Azərbaycan üçün də aktual problemdir. Bu sahədə müəyyən kompleks tədbirlər görülür. Kənd təsərrüfatı sahəsində istehsalın artırılması, tələbatın yerli ərzaq məhsulları hesabına təmin olunması ilə bağlı işlər görülür. Bu baxımdan Prezidentin bununla bağlı sərəncamını ekspertlər necə dəyərləndirirlər?
Sözügedən məsələni dəyərləndirən millət vəkili Vahid Əhmədovun fikrincə, Qida Təhlükəsizliyi Agentliyinin yaradılmasında əsas məqsəd son vaxtlar Azərbaycanda ərzaq məhsullarında yaranmış problemi aradan qaldırmaqdır: “Prezident İlham Əliyev ərzaq təhlükəsizliyinin təmin edilməsinə daim çox böyük diqqət ayırır. Buna görə də dəfələrlə hökumətin iclaslarında bu məsələ müzakirə olunub. Dövlət başçısı hökumət qarşısında ərzaq təhlükəsizliyinin təmin olunmasını məqsəd kimi qoyub. Bu sahədə yaranmış bütün problemləri nəzərə alaraq, Prezident qida təhlükəsizliyinin təmin edilməsi məqsədilə agentlik yaradılması barədə sərəncam verdi. Eyni zamanda, İqtisadiyyat, Səhiyyə və Kənd Təsərrüfatı nazirliklərinin tabeliyindəki müəyyən qurumları həmin agentliyin tərkibinə daxil etdi. Belə ki, buraya birbaşa qida ilə əlaqədar laboratoriyalar, fitosanitar, karantin və s. mərkəzlər daxildir. Bu mexanizm elə işləməlidir ki, Azərbaycanda insanlara verilən qidaların tərkibində keyfiyyət cəhətdən problem olmasın. Hesab edirəm ki, Prezidentin bu qərarı əhəmiyyətli və vaxtında atılmış addımdır. Bu agentlik öz işini normal qura bilsə, Azərbaycanda qida ilə əlaqədar ciddi problemlər yaşanmayacaq. Bu günə qədər ərzaq məhsullarının keyfiyyətinin aşağı olması, qida ilə əlaqədar meydana gələn xəstəliklər, müxtəlif cür bakteriyaların yaranması, ət kəsimi ilə bağlı yaranan problemlər və s. aradan qaldırılacaq və qidalar əhaliyə tam təmiz şəkildə təqdim olunacaq. Prezident Qida Təhlükəsizliyi Agentliyinin effektiv fəaliyyət göstərməsi üçün 3 nazirliyin tərkibindəki laboratoriyalar və bir sıra idarələri həmin agentliyin ixtiyarına verdi ki, proses tamamlansın və bu sahədəki problemlərlə bağlı həmin agentlik məsuliyyət daşısın”.
Vidadi ORDAHALLI
