Rəsul Cahangirli: “Görülən işlər sayəsində bölgələrdə əhalinin məşğulluq səviyyəsi xeyli yaxşılaşıb”
2003-cü ildə İlham Əliyev Prezident seçildikdən sonra Azərbaycanın iqtisadi inkişafında yeni bir mərhələ başladı. Belə ki, ölkədə regionların inkişafı ilə bağlı önəmli qərarlar qəbul olundu.
Prezidentin 2004-cü il 11 fevral tarixli, 24 nömrəli Fərmanı ilə “Azərbaycan Respublikası regionlarının sosial-iqtisadi inkişafı Dövlət Proqramı (2004-2008-ci illər)” təsdiq edildi. Həmin proqram ölkədə uğurla həyata keçirilən davamlı sosial-iqtisadi inkişaf strategiyasının mühüm tərkib hissəsidir. Daha sonra 2009-2013-cü illər üçün növbəti analoji poqramın qəbul olunmasına qərar verildi. Ən nəhayət, 2014-2018-ci illəri əhatə edən üçüncü belə proqram qəbul olundu. Artıq 4 ildir ki, sözügedən proqramdan irələ gələn vəzifələrin icrasi ilə bağlı işlər görülür.
Regionların inkişafı sahəsində qəbul edilən və uğurla həyata keçirilən dövlət proqramları sayəsində bir sıra işlər görülüb. Bu, qeyri-neft sektorunun davamlı inkişafına, regionlarda kommunal xidmətlərin və sosial infrastruktur təminatının keyfiyyətinin yüksəldilməsinə, sahibkarlıq mühitinin daha da yaxşılaşdırılmasına, investisiya qoyuluşunun artmasına, yeni müəssisələrin və iş yerlərinin açılmasına, nəticədə əhalinin məşğulluğunun artırılmasına və yoxsulluq səviyyəsinin azaldılmasına təkan verib.
Maraqlıdır, bəs ekspertlər bunu necə dəyərləndirirlər? Sözügedən proqramların qəbul olunmasından Azərbaycan regionları nə əldə etdilər?
Məsələyə münasibət bildirən ekspert Rəsul Cahangirlinin sözlərinə gərə, sözügedən proqramlar regionların və o cümlədən, ümumən ölkə iqtisadiyyatının inkişafına ciddi təkan verib: “Məsələ ondadır ki, regionların sosilal-iqtisadi inkişafına dair dövlət proqramlarının qəbulu və qarşıya qoyulan vəzifələrin uğurlu icrası sayəsində ölkənin bütün bölgələrinin siması tamamilə dəyişib. Regionlar sürətlə inkişaf etməyə başlayıb. Bölgələrin infrastrukturu yenidən qurulub. Kənd yolları asfatlaşdırılıb, rayonların ucqar kəndləri belə qazlaşdırılıb. Ən ucqar dağ kəndləri belə təbii qazla təchiz olunub. Bununla yanaşı, yaşayış məntəqələrinin içməli su ilə təmin olunması istiqamətində xeyli iş görülüb. Xüsusən də uzun illər içməli su təchizatından əziyyət çəkən aran rayonlarının bir sıra kəndləri davamlı və keyfiyyətli su ilə təmin olunub. Rayonlarda rabitə sistemi yüksək səviyyədə qurulub və əhaliyə göstərilən rabitə xidmətlərinin keyfiyyəti xeyli yüksəlib. Bütün bunların nəticəsində, demək olar ki, şəhərlə kənd arasındakı fərq aradan qaldırılıb. Görülən işlər sayəsində bölgələrdə əhalinin məşğulluq səviyyəsi xeyli yaxşılaşıb. Regionlarda müasir tələblərə cavab verən yeni iş yerlərinin açılması, qeyri-neft sektorunun inkişafı, daha çox valyuta gətirən strateji əhəmiyyətli kənd təsərrüfatı məhsullarının istehsalının artırılması üçün bütün imkanlardan istfadə edilməsi əhalinin məşğulluğunu daha da artırıb. Bütün bunların nəticəsində regionlardan paytaxta və digər böyük şəhərlərə iş dalınca üz tutanların sayı əvvəlki illərlə müqayisədə xeyli azalıb. Ona görə də bununla bağlı qəbul olunan proqramları və ondan irəli gələn işlərin görülməsini müsbət dəyərləndirirəm”.
Vidadi ORDAHALLI
