Vüqar Bayramov: “Dünya Bankının iqtisadi artımla bağlı proqnozu bu ilin iqtisadi yekunları və gələn il üçün gözləntilərin məcmusu kimi qiymətləndirilməlidir”
Dünya Bankı qarşıdakı iki il ərzində Azərbaycanda iqtisadi artım olacağını proqnozlaşdırır. Dünya Bankının (DB) yenilənmiş proqnozunda bildirilir ki, regionun təxminən bütün ölkələrində sürətli, əvvəlki proqnozdan daha yaxşı iqtisadi inkişaf müşahidə olunmaqdadır:
“Buna səbəb son aylarda istehsalın və ixracın artmasıdır. Regionun ixracının orta həcmi qlobal orta göstəricidən çoxdur. Rusiya və Belarus resessiyadan çıxıb. Yalnız neftin kəskin ucuzlaşmasından əziyyət çəkən Azərbaycanda bu il iqtisadi geriləmə proqnozlaşdırılır. Regionun iqtisadi artımı ilə bağlı proqnozun yüksəlməsi işsizliyin kəskin azalması, inflyasiyanın normallaşması, büdcə kəsirinin azalması ilə əlaqədardır”.
DB-nin proqnozuna əsasən, neftin bahalaşmasına baxmayaraq, 2017-ci ildə Azərbaycan iqtisadiyyatı 1,4 % azalacaq. Bankın proqnozu göstərir ki, cari ildə qeyri-neft sektoru sürətli inkişafını davam etdirəcək, neft hasilatı isə azalacaq.
Bankın proqnozuna əsasən, 2018-ci ildə Azərbaycanın ÜDM-i 0,9 %-lik artım nümayiş etdirəcək. Bunun əsas səbəbi kimi “Şahdəniz-2” layihəsinin işə düşməsi göstərilir. DB 2019-ci ildə Azərbaycanda 1,5 %-lik iqtisadi artım proqnozlaşdırır.
Növbəti iki il ərzində Azərbaycan iqtisadiyyatının 1,5 faiz artacağı fikrinə münasibət bildirən iqtisadçı-ekspert Vüqar Bayramov “Bakı-Xəbər”ə açıqlamasında qeyd etdi ki, Dünya Bankının öncəki hesabatlarında da 2018-ci ildə Azərbaycan iqtisadiyyatında artımın olacağı bildirilirdi: “Azərbaycan iqtisadiyyatında artımın olması barədə irəli sürülən fikirlər həqiqəti əks etdirir. İqtisadi əsaslara nəzər salsaq görərik ki, 2017-ci ildə iqtisadi stabillik əldə olundu. Nəticə etibarilə makro iqtisadi sabitlik 2018-ci ildə iqtisadi artım üçün zəmin formalaşdırdı. Eyni zamanda, cari il ərzində neftin satış qiyməti də stabil oldu. Neftin mövcuq qiymətləri çərçivəsində Azərbaycan dövlət gəlirlərini artıra bildi. Həmçinin, 2017-ci ildə Azərbaycan həm dövlət rezervlərinin artırılmasına nail olub, həm də ixrac və idxal sahəsində irəliləyiş yaşandı. İxrac və idxalda 4,5 milyard dollarlıq müsbət saldoya malik olmağımız ölkəyə daxil olan valyutanın həcminin artırılması baxımından vacib idi. Bu səbəbdən də 2017-ci ilin xarici ticarət və dövlər rezervləri ilə bağlı müşahidə edilən artımlar qarşıdakı illərdə dövlət və özəl mənbələrdən vəsaitin xərclənməsinə zəmin yaradır”.
İqtisadçının fikrincə, 2018-ci il dövlət büdcəsində gəlirlərin 4 milyard artırılması proqnozlaşdırılır. Bu da praktiki olaraq büdcədən ayırmaların artırılması baxımından vacib məqamlardan biridir. Dünya Bankının iqtisadi artımla bağlı proqnozu bu ilin iqtisadi yekunları və gələn il üçün gözləntilərin məcmusu kimi qiymətləndirilməlidir. Qarşıdakı illərdə Azərbaycanda iqtisadi artım yenidən yaşanacaq.
Günel CƏLİLOVA
