Fatimə Hacıbəyli: “Ticarət Festivalını maraqlı edən cəhətlərdən biri də şopinqə qoşulan mağazalarda müxtəlif səviyyədə endirimlərlə yanaşı, müştəri məmnuniyyətini artırmaq üçün xüsusi kampaniyaların da təqdim olunmasıdır” Aynurə Həsənova: “Şopinq Festivalı ilə bağlı ticarət mərkəzlərində alıcı bolluğu yaşanır”
Oktyabrın 15-dən start verilən Bakı Şopinq Festivalı noyabrın 15-nə qədər davam edəcək. Bu müddət ərzində şopinqsevərlər böyük həvəslə paytaxt ərazisində fəaliyyət göstərən alış-veriş mərkəzlərindən, dükanlardan istədikləri məhsulu əldə edə biləcəklər.
Bir ay müddətində müştərilər dünya brendlərinə məxsus geyim, elektronika, məişət texnikası, mebel, ətriyyat və kosmetika, eləcə də digər məhsulları Bakıda yerləşən 400-dən çox ticarət obyektindən xüsusi kampaniya və endirimlərlə əldə edə biləcəklər. Bəllidir ki, həmin mallara “Tax Free” imkanı təqdim olunur.
Ticarət Festivalında yerli vətəndaşlarla yanaşı, xaricilər də iştirak edir. Dünyanın istənilən ölkəsinin vətəndaşı böyük həvəslə Bakıda keçirilən Şopinq Festivalına qatılmaq üçün Bakıya gəlib. Onlar şəhəri gəzməklə yanaşı, şopinq də edirlər.
İstənilən sahədə çalışan şəxslər, o cümlədən tələbələr belə Ticarət Festivalından yararlanırlar.
İkinci Şopinq Festivalı yeni başlamasına baxmayaraq, ticarət bayramında kimlərin iştirak etdiyini və ya edəcəyini öyrənmək məqsədilə sorğu keçirdik.
Cərrah Aynurə Həsənova festivalda iştirak etdiyini dilə gətirdi. O bizimlə söhbətində bildirdi ki, işi ilə əlaqədər olaraq tez-tez xarici ölkələrdə olur: “Bir dəfə Türkiyədə keçirilən Şopinq Festivalında iştirak etmişəm. Mən sizə deyim ki, Azərbaycanda keçirilən ticarət bayramı digər ölkələrdə keçirilən festivaldan qat-qat fərqlənir. Fərqli cəhəti isə turistlərə yaradılan şərait və onlarla nəzakətli şəkildə davranmaqdır. Bizim ölkə qonaqpərvər olduğu üçün, istənilən səbəblə bağlı ölkəmizə gələn turistlərə hörmətlə yanaşırıq və çalışırıq ki, onlar bizdən razı qalsınlar”.
A.Həsənova onu da vurğuladı ki, ticarət mərkəzlərində alıcı bolluğu yaşanır. Elə dükan var ki,orada xaricilər maraq göstərir, bəzisində isə yerli vətəndaşlar.
“Vəfa” Sosial İctimai Birliyinin rəhbəri Fatimə Hacıbəyli bizimlə söhbətində bildirdi ki, birinci festivalda iştirak edib və çox razı qalıb: “Şopinq sevən şəxs olaraq bu dəfə də festivalda iştirak edəcəm. Şopinq faydalarından yararlanmaq istəyirəm. Həmçinin, insanları bu festivala cəlb edən tərəflərdən biri də
əyləncədir. Bəllidir ki, gənclərimiz əyləncəyə meyllidir. Onlar festival iştirakçılar üçün yaradılan oyun və musiqi şənliklərində iştirak etməyə böyük həvəs göstərirlər.
Eyni zamanda, Ticarət Festivalını maraqlı edən cəhətlərdən biri də şopinqə qoşulan mağazalarda müxtəlif səviyyədə endirimlərlə yanaşı, müştəri məmnuniyyətini artırmaq üçün xüsusi kampaniyaların da təqdim olunmasıdır”.
Həmsöhbətimiz onu vurğuladı ki, davamlı şopinq festivallarının keçirilməsi Azərbaycanın iqtisadi inkişafına müsbət təsir göstərəcək
Qeyd edək ki, Prezident İlham Əliyevin 2016-cı il 1 sentyabr tarixli “Azərbaycan Respublikasında turizmin inkişafı ilə bağlı əlavə tədbirlər haqqında” Sərəncamına əsasən, festivalın təşkili Mədəniyyət və Turizm Nazirliyinin nəzdində fəaliyyət göstərən Azərbaycan Konqreslər Bürosuna həvalə edilib. İlk Bakı Şopinq Festivalı bu il aprelin 10-dan mayın 10-dək uğurla keçirilib.
Günel CƏLİLOVA
