“Vegas Optics” mağazalar şəbəkəsi - Səbinə Dadaşova: “Festivalda alış-verişi sevənlərin yüksək marağı müşahidə olunur” "Albatros" mağazası - Elman Cəfərov: “İstər yerli, istərsə də xarici ölkələrin vətəndaşları böyük maraqla fesivalda işrirak edirlər” “Newbalance” mağazası - Şəmistan Əlizadə: “Ticarət Festivalının keçirilməsi alış-veriş həvəskarlarının Bakıda cəmləşməsinə səbəb olub” Vergilər Nazirliyinin Media və Kommunikasiya Mərkəzi: “…100 AZN-dən çox alış-veriş edən yerli vətəndaşlar aldıqları məhsullardan tutulan ƏDV-nin müəyyən qismini geri ala biləcəklər”
Bir neçə gündür Bakıda İkinci Şopinq Festivalına start verilib. Məlumat üçün qeyd edək ki, Prezident İlham Əliyevin 2016-cı il 1 sentyabr tarixli "Azərbaycan Respublikasında turizmin inkişafı ilə bağlı əlavə tədbirlər haqqında” Sərəncamına əsasən, keçirilən festivalın təşkili Mədəniyyət və Turizm Nazirliyinin nəzdində fəaliyyət göstərən Azərbaycan Konqreslər Bürosuna həvalə edilib.
Ticarət festivallarının keçirilməsində məqsəd Azərbaycanın turizm və iqtisadi potensialının yüksəldilməsi, sahibkarlıq fəaliyyətinin təşviq edilməsi ilə ölkənin ticarət dövriyyəsinin artırılmasının stimullaşdırılmasıdır.
Bakıda təşkil olunan Şopinq Festival Qafqazda və Orta Asiyada ilk dəfə Azərbaycanda keçirilib. Bu isə nəinki Qafqaz respublikaları, hətta Fars körfəzi ölkələrində də ölkəmizə marağın yaranmasına səbəb olub.
Oktyabrın 15-dən başlayan ikinci Bakı Şopinq Festivalı noyabrın 15-dək davam edəcək. Məlumdur ki, ilk Bakı Şopinq Festivalı bu ilin 10 aprel – 10 may tarixlərində uğurla keçirilib. Aprel-may aylarında keçirilən festivalda paytaxtın və region sakinləri ilə yanaşı, o cümlədən ölkəmizə gələn turistlər də böyük həvəslə iştirak ediblər. Şopinq həvəskarları Bakıda keçirilən ticarət bayramından razılıqlarını sosial şəbəkə vasitəsilə ictimaiyyətə çatdırıblar. Xaricilər tək alış-verişdən deyil, eyni zamanda onların istirahəti üçün yaradılan şəraitdən də razı olduqlarını bildiriblər.
Analoji vəziyyət hazırda paytaxt ərazisində keçirilən festivalda da müşahidə olunur. Paytaxtın bir sıra ərazilərində fəaliyyət göstərən ticarət mərkəzləri və ayrı-ayrı mağazalar Şopinq Festivalına qoşulub.
Alış-veriş həvəskarları festivala qoşulmuş mağazalardan geyim, ətriyyat, elektronika, məişət texnikası, mebel və kosmetika məhsullarını endirimlə əldə edə bilirlər.
Onu da bildirək ki, bütün dünyada geniş yayılan “Tax Free” xarici vətəndaşlar tərəfindən alınan və kommersiya məqsədləri üçün nəzərdə tutulmayan mallara görə ödənilmiş əlavə dəyər vergisinin (ƏDV) geri qaytarılması sistemidir. Ötən ildən başlayaraq Azərbaycanda da bu sistem tətbiq olunur. Alınan malların ƏDV-si turistlərə geri qaytarılır. Onlar “Tax Free” loqosu olan mağazalarda alınan mallara görə ödədiyi ƏDV məbləğini ölkəni tərk edərkən hava limanında geri ala bilirlər.
Bu ildən başlayaraq, paytaxtımızda təşkil edilən Şopinq Festivalı sayəsində ölkəmizdə “Tax Free” anlayışı xarici ölkələrlə müqayisədə daha cəlbedici olub. Belə ki, digər ölkələrdə “Tax Free” yalnız xarici turistlərə şamil edilirsə, Azərbaycanda bu sistemdən yerli əhali də yararlana bilir. Azərbaycan vətəndaşları da aldıqları mallara görə ödədikləri ƏDV-nin bir qismini geri ala bilirlər.
Qeyd edək ki, “Baku Shoping Festival–Tax Free” nişanı olan mağazalardan 100 manatdan çox alış-veriş edən zaman məhsulların əlavə dəyər vergisinin (ƏDV) müəyyən qismi müştərilərə geri qaytarılır. ƏDV qaytarılması yalnız “Baku Shoping Festival – Tax Free” nişanı olan mağazalarda mümkündür. Nişan olmayan mağazalarda “Tax Free” sistemi tətbiq olunmur.
Bəllidir ki, alıcılar festival boyunca xüsusi hədiyyə kartları qazanacaq, eləcə də xüsusi uduşlu lotereyalar və endirim kuponları əldə edəcəklər. Turistləri və yerli alıcıları həvəsləndirmək üçün ticarət mərkəzlərində interaktiv oyunlar təşkil olunacaq. Bundan başqa, festival zamanı moda nümayişləri və digər müxtəlif əyləncə xarakterli tədbirlərin təşkili də nəzərdə tutulur. Festival boyunca Fəvvarələr meydanında "Fan” zonası fəaliyyət göstərəcək.
Onu da bildirək ki, ötən festivaldan fərqli olaraq, bu səfər hipermarketlər, supermarketlər şəbəkəsi də ilk dəfə olaraq qatılıb. Hətta bir sıra apteklər də festivalda ilkin olaraq təmsil olunurlar. Festivala qoşulan ticarət və xidmət obyektlərinin sayında ciddi artım var. Əgər ilk festivalda tərəfdaş qismində çıxış edən müəssisələrin sayı 33 idisə, budəfəki festivalda 111-dir. Bu da keçən dəfəkindən üç dəfə çoxdur. Birinci festivalda əlavə dəyər vergisini (ƏDV) cəmi 172 şirkət qaytarıb. Budəfəki festivalda isə 467 müəssisənin ƏDV-ni qaytarması nəzərdə tutulur. Bu tədbirə ümumilikdə 578 müəssisə qatılıb.
Festivalda paytaxtın əsas ticarət mərkəzlərində yerləşən əksər brend mağazalar iştirak edir. Əsas ticarət mərkəzləri ilə yanaşı, paytaxtın ayrı-ayrı yerlərində də Bakı Şopinq Festivalının loqosunun olduğu obyektlərə rast gəlmək olur. Alıcıların yolunu gözləyən bir sıra mağazalarda ƏDV-nin qaytarılmasından əlavə, mallara 30 faizə qədər endirim də edilir. İkinci Şopinq Festivalına qoşulmuş dükanlar ticarət bayramından razı qaldıqlarını bildirirlər.
“Vegas Optics” mağazalar şəbəkəsinin inzibatçısı Səbinə Dadaşova “Bakı-Xəbər”ə açıqlamasında qeyd etdi ki, çalışdığı dükan Ticarət Festivalına yeni qoşulub: “Festival yeni başlamasına baxmayaraq, alış-veriş sevənlərin marağı artıq müşahidə olunur. “Vegas Optics” mağazalar şəbəkəsində “Tax Free” sistemi tətbiq olunur. Alıcı marağı hiss olunur. Mən sizə deyim ki, alıcılar arasında daha çox yerli vətəndaşlar üstünlük təşkil edir”.
Onu da qeyd edək ki, “Vegas Optics” mağazalar şəbəkəsi yalnız Bakı Şopinq Festivalı çərçivəsində “Emporio Armani”, “Giorgio Armani”, “Roberto Cavalli”, “Swarowski” brendlərinə 30 faiz endirim təklif edir. Alıcılar oktyabrın 18-21-i tarixlərində “Emporio Armani” və “Giorgio Armani”, oktyabrın 21-24-də isə “Roberto Cavalli”, “Swarowski” brendlərinə tətbiq olunan endirimlərdən faydalana bilərlər.
"Albatros" mağazasının meneceri Elman Cəfərov qəzetimizə açıqlamasında bildirdi ki, festival yeni başlamasına baxmayaraq, alıcılar arasında həyəcan hiss olunur: “İstər yerli, istərsə də xarici ölkələrin vətəndaşları böyük maraqla fesivalda iştirak edirlər. Təbii ki, burda “Tax Free”nin rolu danılmazdır. Nəzərə almaq lazımdır ki, Ticarət Festivalı yeni başlayıb. Bu müddətdə alıcılar arasında yerli vətəndaşlarda fəallıq daha çox hiss olunur. Analoji vəziyyət xarici alış-veriş həvəskarında da hiss olunacaq”.
Bakı Şopinq Festivalında iştirak edən “Newbalance” mağazasının reklam meneceri Şəmistan Əlizadə bizimlə söhbətində vurğuladı ki, ticarət bayramının keçirilməsi alış-veriş həvəskarlarının Bakıda cəmləşməsinə səbəb olub: “Belə bir festivalın ölkəmizdə keçirilməsi yalnız müsbət qarşılanmalıdır. Bu tədbir ilk növbədə ölkənin tanıdılmasında mühum rol oynayır. Həmçinin, turizmin inkişafına və ölkə iqtisadiyyatına müsbət təsir edəcək”.
Bildirək ki, ayaqqabı almaq istəyənləri Amerikanın öndə gedən ayaqqabı istehsalçılarından biri olan və Bakıda “Park Bulvar”da fəaliyyət göstərən “New Balance” mağazasından 30 faizədək endirimlər gözləyir.
Vergilər Nazirliyinin Media və Kommunikasiya Mərkəzindən “Bakı-Xəbər”ə verilən məlumata görə, festival çərçivəsində “Baku Shoping Festival - Tax Free” nişanı olan mağazalardan 100 AZN-dən çox alış-veriş edən həm yerli, həm də xarici vətəndaşlar aldıqları məhsullardan tutulan ƏDV-nin müəyyən qismini geri ala biləcəklər. Həmin məbləğ nağd və ya bank hesabına köçürmə yolu ilə əldə edilə bilər.
Mərkəzdən o da bildirildi ki, “Tax Free” sistemi ölkəmizdə ötən ildən tətbiq edilir. Sistem ilkin olaraq Heydər Əliyev Beynəlxalq Hava Limanında təcrübədən keçirilib: “Əcnəbi turistlərin Azərbaycana cəlb edilməsini, onların ölkə ərazisində mal almasını stimullaşdıran bu sistem ölkəmizin turizm üzrə rəqabət qabiliyyətini artırır, xarici valyutanın daxil olmasını təşviq edir, nəticədə pərakəndə ticarətdə rəqabəti artırmaqla satış dövriyyəsini genişləndirir”.
Günel CƏLİLOVA
